Ciasa di Ladins a Bulsan: fitadins nia cis contenc
scrit ai 04 July 2007 da les 19:49:30 da noeles |
|
- I problems dla Ciasa di Ladins: fit, garaje, speises, nia-ladins
-
- DEPLÙ COSSES DESPLAJOULES DA ABITÉ TLA CIASA DI LADINS DL IPES A BULSAN - PLURES DI FITADINS
 Entourn a la Ciasa di Ladins à Bulsan él bendebot de melcontent, a meteman dai fitadins ladins che à tout cuartier laite. Les abitazions é en prinzip scialdi beles, ence sce ales é enjignedes ite con "mobiliar a la bona". Na cossa che ne plej daldut nia é che les abitazions ne é nia autonomes. Ales ne é nia cumpedadours separac dla forza eletrica, dl'ega y dl sciaudament. Per chestes speises vives paia i fitadins n forfait de 70 euro al meis y a la fin dl ann déssel vegnì paié do, sce al ne basta nia.
Canche i fitadins ova fat domanda ti òven dit che l afit fossa sté entourn ai 250 euro, sen pàiei 300 euro al meis, plu les speises (per entourn 30 m2), unfat sce ai se tegn su demé n per de dis a l'edema o tresfora. N auter fat desplajoul é che al ne é pro les abitazions deguna garaje y propi studenc y laoranc che vegn ju da les valedes y ne à nia tout residenza tl comun de Bulsan ne ciafia nia da mete ju liberamenter l auto dlongia ciasa, ma ai mess avei n enscidit "bolin" per les zones coloredes. Na garaje mess endere vegnì afiteda dal Ipes y paieda souraprò (40-50 euro al meis). Les cianeves é spo en pert tant tumies, do che al fova trafonù ite ega, che an ne pò nia lascé ju valch, se baudien.
La chestion di folestiers che abiteia entratant tla ciasa ne ti scusa nience a n valgugn, nia ajache ai é nia-ladins, ma ajache sie comportament ne corespon nia dagnora a les regoles de ciasa, tant che an se à pluré plu outes pro l Ipes. Te valch abitazions, pensedes per 1 o 2 persones, déssel avei abité laite plu persones zenza autorisazion. Valch un à ence audì mascins da lavé che jiva demeztroi y à constaté che al fova te na toileta per i andicapés al plan-tera n scich nia da creie. Les speises ti vegnissa a la fin dl ann spo ratedes a ciaria de duc i fitadins, ajache al mancia cumpedadours. L Ipes à fat tla fineda, do avei audì les plures, finalmenter n relevament y à ence constaté violazions.
Dut chest ne fossa bonamenter nia suzedù, sce la gestion dla Ciasa, fata su con n credit tl fabriché sozial a ben dl grup linguistich ladin, ti fossa vegnuda sourandeda a na assoziazion o a n comité ladin che se essa tout a cuer i debujegns di fitadins ladins, sciche an se ova perauter damané, anter l auter ence da la presidenta dla Consulta da enlaouta, Dolores Dariz y dantaldut da Carlo Willeit. El ova enrescì do l import a ben di ladins pro l Ipes amudlé ti agn passés. Sen cioda chisc mesi de ne jì nia plu a ben di ladins. Les condizions podessa deventé pioures. La situazion melciafieda podessa ester na rejon da sprigolé demez fitadins ladins tl davegnì.
|
