benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Ciasa di Ladins a Bulsan: nia assé enteres o criters massa riei da ademplì?
scrit ai 03 July 2007 da les 18:04:20 da noeles

Politica


Ciasa di Ladins a Bulsan: 6 sun 32 cuartiers a nia-ladins 

CARLO WILLEIT: I CRITERS É MASSA STRENC - IPES: AL NE FOVA NIA DOMANDES ASSÉ DE LADINS

La Ciasa di Ladins fata su tla raion dla ex-fiera str. Roma à Bulsan da pert dl Ipes  con n credit a ben di ladins che Carlo Willeit se ova embasté l am de enrescì do avisa, é endò ruveda sun i foliec. Gauja: entourn al 20% dles abitazions ti é bele vegnudes dedes via a nia-ladins.  Al ne fova nia bastan domandes végnel dit dal Ipes y l assessorat ova fat fora che les abitazions ne podova nia resté vuetes. Enscì àn lascé ite ence nia-ladins, 6 endut enfin a sen. L lim de enrediment per giaté na abitazion é de 22.000 Euro nec (do avei detrat l 25%), n enrediment che puec laoranc o studenc arjonj do rata. L contrat de afit à na dureda de 5 agn y aladò dles regoles en doura ne él nia renovabel. Al é na ciasa de 32 abitazions per 36 persones (4 abitazions é a let dopl), dutes con cianton da cujiné. Ametus é studenc, ma nia dles scoles autes sot ai 18 agn y laoranc che viv a Bulsan y contourns, ma nia ladins fascians, fodoms o ampezans. Criters true massa strenc dij Carlo Willeit di Ladins.



32 mini-abitazions per ladins a Bulsan
Les domandes pò vegnì dedes ju da endoman inant, 1 de setember - Informazions pro la Consulta Ladina de Bulsan o Ipes

Ciasa alberch per ladins - Carlo Willeit se à batù dassen per sia realisazion

La frazion LADINS dla provinzia y dl comun de Bulsan se à festidié agn alalongia  per crié  na strutura residenziala y laprò n zenter  sozial-cultural di ladins a Bulsan, cie che ti spetova aladò dla lege al grup ladin. Devenjan nia pueces dificoltés à chesta frazion metù a jì l projet con l aiut plu o manco demé dla presidenta dl Istitut per l fabriché alesieré, Rosa Franzelin-Werth che ti é steda do dal prum moment enfin a che la ciasa é steda en pe. Al ne dova nia demé ester na ciasa-dormituere, ma n zenter sozial con valch strutura per duc i ladins a Bulsan (p.ej. senta dla comunanza, na picera biblioteca). Nia de dut chest. Depierpul che la frazion Ladins volova condizions de amiscion lerges (amiscion de studenc de scoles autes, lim de enrediment plu aut, destanzes, ladins da fora dla provinzia y e.i), éles vegnudes arestrentes dal assessorat sot a Cigolla, sun consei de Mussner y dla Svp, tant che do y do vegnirà i cuartiers bonamenter dés via a nia-ladins", se tem Carlo Willeit.  Al é ben da fé pude, enjonta Willeit: "i criteres  de amiscion fova vegnus laorés fora dai LADINS  en acordanza  con les regoles generales y con i debujegns di ladins y a la fin él ence vegnù damané da ti lascé l'aministrazion dla ciasa a na assoziazion ladina a Bulsan. La cossa fova enjigneda aladò che dut essa podù jì a bon fin, ma i referenc dla politica provinziala à out la cossa do sie plajei pernanche la ciasa é steda en pe. Contra les propostes y protestes di LADINS  ài aprové criters de amiscion riei y en pert nia da ademplì per i ladins, deliberan souraprò che la ciasa é da aministré demé dal Istitut provinzial (Ipes) zenza coliament con organisazions ladines. Enscì é la destinazion dla ciasa  a foresc' ,o a chi che la politica provinziala vuel, bele programeda dampertfora. Te na tel situazion fova la enaodazion dla ciasa zenza envit a chi che se à poester cruzié deplù nia demé n segn de basseza, ma ence de coerenza politica".
L conseier di Liberai (die Freiheitlichen) à fat na mozion tl consei provinzial. L assessour competent, Luigi Cigolla (enstes fascian), dij (original): "Es ist so, dass jede Sprachgruppe eigene Merkmale bzw. Volkstümlichkeiten, Mundart und Sprache verfolgen sollte. Deshalb sollten auch die Ladiner in Bozen ein eigenes Haus bekommen. Die ladinische Sprachgruppe hat diesbezüglich einen eigenen Kreditbetrag ausgenutzt. Man kann als Hauptzielsetzungen sagen: Verteidigung der Mundart, der volkstümlichen Merkmale und der Sprache.  Laut Auskunft des Wohnbauinstitutes gibt es 32 Wohneinheiten in diesem Haus der Ladiner, in dem auch Ausländer untergebracht sind. Nachdem nicht genügend Ladiner dieses Haus bewohnen, sind 6 Wohneinheiten EU-Bürgern zugewiesen worden.  Man muss klar sagen, dass jeder Mieter laut den Voraussetzungen -Einkommen, Punktezahl -, die festgelegt sind, Anrecht auf eine Wohnung hat. Die gleichen Voraussetzungen gelten auch für die Ladiner. Es gibt keine Ausnahme und keine Abweichung von diesem Grundsatz."; traduzion: ala é enscì che vigni grup linguistich à sies mersces y si costums, sia rejoneda y sie lingaz che ai dess rencuré. Davia de chest ova ence i ladins la rejon de avei a Bulsan na sia ciasa paieda tres n credit a sie ben (pro l Ipes, ndr). I fins prinzipai é: defendura dla rejoneda y dles usanzes. Aladò dles informazions dl Ipes él te chesta Ciasa (tla streda Roma, raion ex-fiera a Bulsan) 32 abitazions, te cheles che al aloseia ence 6 nia-ladins te 6 abitazions. An mess dì cler che vigni fitadin à l dert de giaté na abitazion aldò di criters de davagn y de ponc. Les medemes condizions vel ence per i ladins. Al ne é  y al ne vegn fat degunes ezezions  da chest prinzip".
La resposta de Leitner:"Sce l fin fova chel de mete en pe a Bulsan na "Ciasa di Ladins" per promueve sie lingaz, spo ne arjònjen chest nia nia con lascé via les abitazions a nia-ladins y per esperienza sàn che an ne se sent spo nia plu da ciasa te na tel strutura y perchel saràl ciamò plu rie da la emplenì. Chest ne é nia tl enteres dl grup ladin y de chi che se à engajé per mete su la ciasa."

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.467 seconc