benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La delibera marora: l redadour dla USC se para
scrit ai 09 June 2007 da les 19:27:56 da noeles

Politica


Stricola, stricola, les desvalivanzes é minimales 

LINGAZ EN MOVIMENT - LA DELIBERA MARORA "MAREO-LADIN STANDARD" À ABÙ BENDEBOT DE RONDENIS, POSITIFS Y NEGATIFS

La descuscion sun la delibera marora va inant ence sun la USC, oláche l prof.univ. dr. Paul Videsott à tout posizion, slomenan la USC (y nia demé) de ne avei nia fat sie mestier endretura te chesta chestion. La USC é pieda via dal pont al orden dl dì che dij en sostanza dut, fins y intenzions: “Adoranza dl lingaz ladin tla varianta de Mareo (che contegn les formes plu vedles dl lingaz) tla redazion de ac publics, tl lingaz scrit ofizial”: che al vegne adoré y ensegné tles scolines y tles scoles de oblianza dl comun l “mareo”, l ladin che i mutons à emparé da sia oma y che ai rejona dutaorela a ciasa; che i maestri maroi posse adoré sie “ladin” pro l’ejam de trilinguism; che al vegne adoré ti media l mareo per les chestions che reverda la jent y la vita marora y ence te gliejia tesc per mareo desche l ordinament diozejan miena canche al rejona de liturgia tl lingaz dla oma”.  Clermenter vuelen chilò auzé l "mareo" a status de "idiom/lingaz per sie cont", ti dan laprò na aura de "vedl", ajache al contegn enzai "les formes plu vedles". Chest ne vuel l redadour dla Usc Iaco Rigo, enstes de Mareo, y trueps nia glotì y al vegn ence metù dant les rejons. Da l'autra pert méssen constaté che avisa da Mareo peiel via iniziatives per l standard interladin, dantfora da Paul Videsott, dal comun tres la seconda pert dla delibera, ma ence da d'autri. Homo linguisticus ladin.



 

 

 

Vigni mel é bon per valch - Touta de posizion de Erwin Valentin sun la chestion

N troi lonch devers l Ladin Standard scrit
Ladin standard: sté chic sen fossa avisa desche sce l'America, n iade che ala é vegnuda descorida, ne fossa nia vegnuda coloniseda, de Paul Videsott

La delibera marora y la vera di dialec - Touta de posizion de Carlo Willeit

Ciugn é pa i doveis dl istitut? Da sie comunicat veiden cler l contrast con i paragrafs dl statut dl istitut

La USC di Ladins, pert Val Badia, à tout su dal 1989 inant plu o manco la forma de scrive deda dant dal istitut ladin MdR che se à cristalisé do trueps agn de unificazion ortografica y morfologica, nia enultima per avei na plata scrita armoniousamenter che dess ester de ejempl. Nia da se fé demarevueia perchel che l redadour, Iaco Rigo, defen chest model che se à desmostré valgamia d'utl, nia demé tla USC. Volei mete man de scrive les "particolarités marores", vuel automaticamenter dì messei ence dé pro cheles "badiotes", cheles de "mesaval", cheles da "Rina", cheles da "Colfosch" y e.i. Al vuel dí mete sotissoura n sistem scrit che à apeina metù man da se stabilisé te publicazions de carater souralocal. Pàiel la mueia? Iaco Rigo dij de nò.
Stricola, stricola sautel fora che anter mareo y badiot dla auta él aldò de Videsott does de majeres desferenzies: l articul masculin "le" tl mareo y l partizip plural sun -ês olàche an à tl rest dla valeda -à. Les autres é finezes fonetiches y declinazions verbales. Bàstel chest per declaré l mareo n "idiom autonom" enfinamai dal scrit unifiché de encuei? Almanco una de chestes carateristiches, l articul "le" é vegnù sourantout tl scrit unifiché dla Val Badia y l auter essa a poura nia ence lerch desche varianta, ajache chesta é belavisa ence la forma tl LS. Videsott scriv te sia touta de posizion de does "variantes prinzipales" (una dess vegnì ca da na latinité de Puster, l "mareo" y l'autra da na latinité dla Val d'Isarch, l "ladin"). Lois Craffonara scriv de "einzelne Sprachelemente", de n valgugn elemenc linguitics singui.Te sie vocabolar mareo végnel dé dant deplù detais: sun na cherta figureiel endut  "6 variantes ladines dla Val Badia", oben "Mundarträume", raions idiomatics. Dutes les variantes mostra su trac che ales partesc con les unes y valch iade con les autres, enfinamai l badiot ti someia valch iade deplù al mareo che no al idiom de "mesa-val" (da San Martin), penson a la declinazion di verbs (al jea, al jê; al gnea - al gnê, una dles fusties che dij che mareo-idiom da La Val-badiot enfin al idiom fodom, piova via da formes valives .... l idiom de "mesa-val": al jô, al podô che ti someia depierpul deplù al gherdeina y che se cuer ence con la forma standard interladina sun -ova). La forma de "mesaval" ti someia endò al mareo te de autres cosses. L idiom de Rina é depierpul  "marorisé" tla fonetica, ma artegn certes carateristiches morfologiches de "mesaval-badiotes" y en à ence enstes n valgunes. Coche chisc svilups é vegnus a se l dé, se perd tl scur y ti nioi dla storia. Segur él che zacan, te raions isolés geograficamenter con n rai limité de comunicazion, desche tla conformazion dla Val Badia, entravégnel plu saurì y debota mudazions linguistiches che te raions de planura p.ej. oláche i rejonadours mess comuniché te n certl plu ampl. La situazion dialetala é tla Val Badia encuei alangrovia enscì: i maroi rejona "mareo", chi da Rina, San Martin, Antermeia, Lungiarü y La Val rejona ladin, y soura Chi Pontac rejónen "badiot" con Colfosch che rejona da "la su". Dut adum n pice ablesc de variazions da n raion dialetal al auter nia delimitedes, ma che se entreceia. Dificoltés da se capì: net degunes.

Giovanni Mischì dij che an ne dess nia mete l azent sun "ladin de mesa-val" ma sun "ladin scrit unifiché dla Val Badia" che dess ester la plataforma per passé via al ladin standard (LS). La soluzion dl scrit unifiché fova la plu logica canche an à messù p.ej. dé fora n liber de gliejia o n liber de scola y an messarà l fé ence tl davegnì". Erwin Valentini rata: "Mantegnì la spezifizité linguistica va ben ma a forza de spidicé su dut rìsc’en de resté con nia tla man, vuel dì de desdruje l lingaz ladin enstes. Con d’autres paroles, la souravivenza di idioms y enultima dl lingaz ladin depen da n sforz de convergenza y no de autonomia o de separazion di idioms. De chest vers podessa la delibera marora mete a jì n moviment zentrifugal dret pericolous per la unité dla Ladinia". Lois Craffonara: "Cie en él pa, sce l LS ne passassa nia o nia tant atira. Ala ne ciala nia fora tant empermetoul: Gherdeina sarà l'ultima che l sourantol, Ampez é dret dalonc, ta Fodom él na gran rassegnazion y te Fascia ne vuelen atualmenter nience introduje l LS tla aministrazion locala, ma an laora pro na sort de "inter-fascian". Dess te chest contest  labil la Val Badia dé su sia arjonta de n ladin scrit unifiché de valeda?" Lingaz en moviment, Rigo: "la discuscion é naouta daverta, ence per merit dla deliberazion sun la adoranza dl mareo y dl ladin dolomitan dl consei de comun de Mareo. La USC scrivarà inant te dutes les variantes (miné él ampezan, fodom, gherdeina ....), ence badiot de mesa-val (?), ajache i respeton y i conservon - enchin a che l ladin unifiché ne tolarà nia ite la funzion dl ladin de mesaval badiot (?) - l laour dles unions culturales y dl istitut ladin fat tla Val Badia da 50 agn encà.

 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: La delibera marora: l redadour dla USC se para (ponc: 1)
da Claudio ai 09 June 2007 da les 17:24:48
(Infos sun l utilisadour | Ti mané n messaje privat)
"che al vegne adoré ti media l mareo per les chestions che reverda la jent y la vita marora". Sen capesci ence miec la letra de Nicol Alberti d'Al Bagn che é consiadour te comun, che ova ghiré te na letra a la USC che al ti vegnissa metù ite dut per mareo ai maroi (articui, comentars etc.). Bonamenter ne sàl nia da desfarenzié "badiot" da "scrit de mesaval".



Re: La delibera marora: l redadour dla USC se para (ponc: 1)
da Claudio ai 23 June 2007 da les 15:48:28
(Infos sun l utilisadour | Ti mané n messaje privat)
Tla ultima USC fòvel sen ence na bela touta de posizion dl aconsiadour Stachio Erlacher. Sia analisa é propi da sotescrive .... al fossa bel, sce ence noeles.net la trascrivessa.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.364 seconc