I Verc l'à dlì con saré i joufs
SIA MOZION É VEGNUDA DESBUTEDA ENCUEI TL CONSEI PROVINZIAL - AL É ENDERE NA TRIEVA TEMPORARA
I Verc l'à dlì. Nience ei, tout fora la posizion laudoula dl conseier Heiss, ne tol en consciderazion la situazion particolara dla comunité ladina sternuda entourn ai Creps dl Sela y demé lieda adum tres chestes stredes soura i joufs. Encuei se ài endò damané tl consei provinzial de Bulsan na scluta temporara di joufs dolomitans ence demé da la pert sudtiroleisa al trafich individual. Damané se damànei na scluta da messel enfin a setember da les 10 dantmesdì a les 4 domesdì, dijan che n daz ne cleca nia per tegnì dalonc l trafich. Ma sie l daz che na scluta temporara ne é naoutatant nia sun meisa. Al mancia la acordanza con les provinzies vejines.Dal jouf de Ciaulonch devers Corvara.
L govern provinzial ova bele en l ann passé metù n iade sun somas l plan dla scluta, ence sce Mussner ova bele abù na gran busia de enjigné ca dut. Zenza avei arjont na acordanza con les provinzies vejines, enscì Durnwalder, ne vegniràl pié a mans degugn plans concrec. Chest vegn ence pretenù da n decret ministerial che limiteia la scluta dles stredes de enteres souralocal. Enteressant él che en chest iade dìjen per refudé la mozion di Verc ence, cie che les stredes soura i joufs é veramenter: n liam sozial anter les valedes ladines che les deida conduje plu damprò. Mete su sieves y saredes vuel dì scarzé via chisc liams. Samben l problem dl trafich é dantman y an dess chirì soluzions, ma chestes ne dess nia fé la comunicazion anter les valedes ciamò plu sfadiousa . Sce l referendum da souramont essa da jì a bon fin, fossa belavisa chestes stredes les soules arteries de azes y de contat.
