La pruma Gran Vera sun cd-rom

L cd cuei adum fotos, letres y documenc che conta co che la jent ladina à vivù chi temps

de Lorenzo Soratroi

Te chisc dis él vegnù metù fora en distribuzion la seconda edizion dl nuef laour de la Luciana Palla; l Cd Rom soura la Pruma Gran Vera su per les Dolomites. La pruma edizion de 1000 toc é vegnuda “brujeda” te pueces edemes, comaneda dai Istituc, museums dla vera y da esperc de storia. Y al ne podova nia ester autramenter.

L CD cuei adum fotos, letres y documenc che conta coche ai à vivù chi burc agn de vera les popolazions ladines.An ne rejona nia de eserzitesc, de bataies de mines y contramines, ma dla vita dles popolazions che pativa evenc plu gragn de ales enstesses. Deportazion, desdruzion, smembramenc de comunités entieres: chest à volù dì la pruma vera per les popolazions ladines entourn al Sela che se essa ciapé bel sun l confin, n pruma linea. Desvalifs i argomenc tochés ti “ sfueis multimediai” del Cd Rom: i saudés, i prijoniers, l’economia de vera, i mudamenc daite dles medemes comunités, la militarizazion dla sozieté, l reclam de vera y politica y enscì inant. La vera vegn conteda doman che la storia à fat suzede i avenimenc, con testimonianzes, letres y documenc trac fora te duc chisc agn dai archifs de Stat y dai somas. L Cd pò ester vedù a plu liviei: les prumes vijions é plu basedes sun les fotos, al n’é plu de 400 laite, ma a jì plu inant y plu sot, pòn analisé la documentazion coiuda adum y per n valgugn documenc, ence se fè na stampa. La consultazion dl Cd é saurida y ala fossa adateda ence per les scoles. Per chesta seconda edizion, él vegnù metù laprò ence n bel pice liber, con test per todesch. Chest laour nuef dla studiosa fodoma, Luciana Palla, é vegnù prejenté con suzes a la manifestazion de Belum clameda “ Oltre le Vette” y al é vegnù dé fora da l’Union di Ladins da Fodom, con l contribut dla Provinzia de Bulsan - Assesorat a la cultura ladina.