benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La delibera marora: n comentar de Erwin Valentini
scrit ai 03 June 2007 da les 23:27:21 da noeles

Ladin Standard


Vigni mel é bon per valch

LA DELIBERA DE MAREO, SCE ALA ESSA DA VEGNÌ METUDA EN PRATICA, FAJESSA PLU DE MEL CHE DE BEN, MA ALA MOSTRA SU LES CONTRADIZIONS 

La delibera dl comun de Mareo sun l’adoranza dl lingaz ladin à descedé su cotant de reazions y polemiches y al ne é nia da se en fé demarevueia ajache sia fazion va soura i confins comunai fora. L prum impat podessa ester per enscì dì orizontal: la maniera marora de "regolé" la comunicazion anter comun y valedes podessa "fé tacia d’uele» tla Ladinia. Nia da se fé de marevueia sce ence i nia maroi perten de dì la sia sun la dezijion de Mareo!

 



TOUTA DE POSIZION DL DR. PAUL VIDESOTT

Al me sa demarevueia tanc che miena de messei dì la sia sun la delibera marora zenza savei coche ala é vegnuda a se l dé y zenza capì sies intenzions. Ma co pa ence – enfin a sen, prest does edemes do la senteda, n’à no la USC, no Noeles.net raté debujegn da intervisté chi che à porté inant chesta delibera – depierpul che sun d’autri argomenc, ence cotant manco emportanc, pòn lieje plates entieres de intervistes. Na gran lauda de chest vers al assessour F. Mussner, che m’à dé ocajion da ti splighé personalmenter mia posizion te na discuscion longia y daverta.
A la redazion de Noeles.net y a d’autri che se scandaliseia segn per la delibera marora, volessi ti recordé l manifest „Ladinia 2005“, che ence ei à sostegnì y firmé. Les prumes 5 teses dij:

1. La souravivenza di Ladins dles Dolomites sciche popul caraterisé per cultura y identité é garantida demé da la souravivenza de sie lingaz. Per ti ester a les tendenzes dl’omologazion che carateriseia nosc temps él encueicondì plu che zenza debujegn de na politica linguistica unitara y efizienta per dut l teritore storich olache i Ladins é da ciasa, chest vuel dì les valedes de Gherdeina, Badia con MAREO, Fascia con Moena, Ampez y Fodom con Col S. Lizia.
2. DUTES les varietés linguistiches chersciudes su storicamenter te chest teritore é esprescion viventa y originala dl lingaz ladin: ales raprejenteia n patrimone essenzial per dut l popul ladin. A DUTES ti végnel reconesciù la medema y valiva dignité y DUTES dess ester reconesciudes a vigni livel da les istituzions.
3. VIGNI varieté ladina à l dert de mesures de sostegn y protezion per podei se svilupé y se mantegnì tl davegnì, y chest ciamò deplù tles valedes olache l ladin é tla dificolté per gauja de condizions soziales y giuridiches nia favorables.
4. La souravivenza y l svilup armonich di singui idioms ladins pò a la longia vegnì garantis cotant plu saurì tres l’elaborazion de n lingaz scrit unitar: chest é encuencondì un di obietifs primars y fondamentai per vigni politica de sconanza dla comunité ladina tles Dolomites.
5. L lingaz scrit unifiché, o Ladin Standard, é fondamental desche simbol dl’identité dl popul ladin y de sia unité: al é tl medem temp na “ombrela de protezion” che permet ence a les varietés locales de se mantegnì, de se svilupé inant y de se defene da les interferenzes di lingac vejins.

A me me pèrel che Mareo ae, con sia delibera, avisa atualisé chest program. Ma i me lasce gen consié da dutes les autres 446 persones che à firmé l „Manifest“ do da mi, coche chestes frases tant cleres (DUTES les varietés linguistiches; VIGNI varieté ladina, Standard desche „ombrela de protezion“) é da interpreté. Fin a dailò fossi content sce Noeles.net y n valgugn de si letours desmostrassa n pue plu de coerenza. I essan duc demé da davagnè.

Paul Videsott

Ma la fazion dla delibera é potenzialmenter plu ampla, ala met en descuscion la pratica linguistica aplicheda enfin a sen da les istituzions ladines. Da una na pert ti dàla n colp al "usus" dl ladin de mesaval tla Val Badia (p.ej. te scola) y, en alternanza con l gherdeina, tles istituzions zentrales (ence tl’université) dla provinzia de Bulsan. Nia da se fé de marevueia, ence chilò, sce chi che à laoré per normé l’adoranza dl ladin a livel de valeda, perauter con la benedescion dles autorités de Bulsan, se lasce su contra na dezijion che met sotessoura l resultat de plu de cincanta agn de bries. Da l’autra pert ofizialiseia per l prum iade n comun, ence sce demé te n contest limité, l’adoranza dl ladin standard (LS) y chesta é na novité revoluzionara sce an conscidra che Sudtirol ti à saré la porta al LS. La dezijion dl consei de comun marou, che con n at formal se met contra la linia dla SVP « ladina », lascia antervedei les prumes sfessures tla politica linguistica ladina de Bulsan.

Te na touta de posizion te noeles.net se fej l prof. P. Videsott demarevueia che tanc miena de messei dì la sia sun la delibera marora. Ie me esse fat plutost de marevueia sce al ne fossa sté deguna reazion dal moment che la delibera à, sciche i on dit dessoura, na fazion potenziala che va cotant soura i confins de Mareo fora. Les chestions de lingaz reverda y enteresseia duc, tamben a livel personal che istituzional, ajache ales é liedes adum con nosta maniera de pensé y de sentì (identité culturala), de se vedei (autocoscienza)y de ester vedus (identificazion etnica), donca de vive tla sozieté.

P. Videsott giustificheia la delibera, sotrissan che ala é dl dut en sintonia con les 11 teses dl manifest « Ladinia 2005 », manifest sotescrit da 446 persones. Desche un di prums firmatars de chest document (adum con P. Videsott y Fabio Chiocchetti) volessi dì la mia sun chest pont. Les teses 2 y 3 met dant, al é veira, che dutes les varietés linguistiches à la medema y valiva dignité y à perchel l dert de mesures de sostegn per podei se mantegnì y svilupé inant. L azent é sun la medema dignité y al ne é nia rie da capì che chilò volòven dantaldut rebuté la descriminazion che vegn gonot fata da badioc y gherdeines (che se rata gen i soui dret ladins) dl vers dla ladinité (chi mec talians) de Souramont. Les does teses zitedes dessoura ne spezificheia nia coche chestes mesures dess cialé fora ma la tesa nr. 4 é dret clera sun chest pont: "La souravivenza y l svilup armonich di singui idioms ladins pò a la longia vegnì garantis cotant plu saurì tres l’elaborazion de n lingaz scrit unitar ». Con d’autres paroles, la souravivenza di idioms y enultima dl lingaz ladin depen da n sforz de convergenza y no de autonomia o separazion di idioms. De chest vers podessa la delibera marora mete a jì moviment zentrifugal dret pericolous per la unité dla Ladinia.

L manifest « Ladinia 2005 »pita n cheder general per na politica linguistica panladina, la chestion é co l mete en pratica. Pò i ladins se permete de adoré deplù formes de lingaz scrit (la chestion reverda demé la maniera de scrive y no la forma orala, che resta te vigni caje chela di idioms). Sce a trueps ti sà la situazion atuala, olache vigni valeda adora sia « Schriftsprache », vignuna con sia gramatica, vocabolars, suporc didatics per les scoles, massaries informatiches (coretour ortografich, etc,.) n luxus fora de mesura, la situazion deventassa assolutamenter grotesca sce an metessa sen man de ti dé l status de lingaz scrit ence ai sot-idioms, sciche l mareo, l badiot (aut) y a cie moda pa no ence ai sot-dialec sciche al dialet da La Val o al « baié da la su » de Calfosch ?. La chestion é dantaldut economica: olà tòlei pa i 25-30.000 ladins les ressurses umanes y finanziares per mete en pratica te na maniera efizienta na tel multilinguism? Mantegnì la spezifizité linguistica va ben ma a forza de spidicé su dut rìsc’en de resté con nia tla man, vuel dì de desdruje l lingaz ladin enstes.

 Mareo per i maroi
 Carlo Willeit: tl vilin ladin à ence l mareo sia lerch
 La delibera marora sun la bota ciauda
 La delibera marora: lingaz en moviment
 La delibera marora: n comentar de Erwin Valentini
La delibera dl comun de Mareo, sce ala essa da vegnì metuda en pratica, fajessa do mie vedei plu de mel che de ben. Ma vigni mel é bon per valch ; ala à bele abù l merit de mete en mostra les contradizions dla politica linguistica dles istituzions (culturales y politiches) de nosta region. La chestion dl ladin scrit reverda duc y perchel fòssel gran ora che ala vegnissa debatuda publicamenter y no anter i cater murs di istituc y di partic De chest vers é steda la delibera dl comun de Mareo n gran vare inant ence sce, do mie vedei, tla direzion faleda, ajache ala ti à dé na sburla a la democratisazion dla descuscion te chest ciamp.

Erwin Valentini

 

Comentar dla redazion de Noeles.net

La redazion de noeles.net é dla minonga che la adoranza di idioms vele per l rejoné, ma per l scrit déssen adoré l ladin standard. Coerenc con chesta posizion à noeles critiché la delibera n. 210/03 de Mussner y ultimamenter la delibera dl comun de mareo che volessa l idiom ence scrit te scola, te comun y te gliejia. Chest é do nosta minonga falé.

 

 

 

 

 

 

Articui spezialisés che pò Ves enteressé:

N troi lonch devers l Ladin Standard scrit
Ladin standard: sté chic sen fossa avisa desche sce l'America, n iade che al é vegnuda descorida, ne fossa nia vegnuda coloniseda, de Paul Videsott

 

 

 

 

 

 

 
 
 
 

 

 
Comentars y d'autres toutes de posizion
 

 La delibera marora: n comentar de Erwin Valentini

 N comentar a les chestions entourn al referendum

 I Bantustans, i vilins ladins
 Comentar al comunicat dl istitut MdR
 Mussner - Chiocchetti: does posizions dassen desvalives
 Comentar a la intervista de Mussner tla USC
 Unité: ciacoles é plu de dann che d'utl
 LS: plu saurì da scrive y da capì da duc
 La letra de demiscions da la UGL
 Chestions de lingaz: gramatica ladina
 Assessour ladin o assessour a la cultura gherdeina y badiota?

 100 agn Union Ladina: les 11 teses

 Media Ladins: la minonga de n letour
 Memorandum dles Unions Culturales
 Intervista a Erwin Valentini
 Les fauzités dl MdR envers l LS
 Ladin: la comedia en 5 ac
 SPELL: la situazion tl 2004
 La ladinité dl 2000
 L prum articul dl 1979
 

Manifest Ladinia 2005
Les undesc teses per na politica linguistica interladina
"L standard ne é nia valch de nuef"
ma al peia via dai idioms.
Entervent de dr. Nadia Chiocchetti, romanista, dl 2003 tl Josefssaal a Bulsan


 
Liams emparentés
· Deplú sun l tema Ladin Standard
· Chier te noeles


L articul plu liet te chest tema Ladin Standard:
Dal latin al ladin: storia dla evoluzion dl lingaz ladin


Valutazion dl articul
Cumpeida mesana de oujes: 5
Oujes: 4


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: La delibera marora: n comentar de Erwin Valentini (ponc: 1)
da christian ai 04 June 2007 da les 14:07:55
(Infos sun l utilisadour | Ti mané n messaje privat)
Identité Ladina

i à lit con enterès l'articul

i oress umilmonter enjunté na picia poesia/conscideraziun:


Iu sun jonn, iu sun ladin.
Ich bin jung, ich bin Ladiner.
Io sono giovane, io sono ladino.

I am young, I am a Ladin!

Iu ti ô bun a mia tera.
Ich liebe die ganze Welt!
Io amo tutta la terra!

Languages are wonderful.
People are wonderful.

Iu ti ô bun al ladin.
Al è mio lingaz.

Iu ti ô bun a mi fredesc,
ai baia en gröm de lingac.

Mi fredesc m'ô bun
a me
ch'i sun ladin(dolomitan)

Christian Ferdigg




Re: La delibera marora: n comentar de Erwin Valentini (ponc: 1)
da Claudio ai 04 June 2007 da les 15:13:13
(Infos sun l utilisadour | Ti mané n messaje privat)
Verscion marora: Na sèra sarèna, dèr bèla de mà (23.05.07), .... dulie, dulie

Verscion badiota: Na sara, sarana, dar bela de má ....

Verscion de mesa-val: Në sërë, sërënë, dër belë de mà .... dulie, dulie

Verscion ofiziala ladin unif.VB: na sëra sarëna dër bela de mà, defora la löna ....

Ie proponesse ence la trascrizion fonetica per conduje a lum duc chisc sons antics ;-).








Re: La delibera marora: n comentar de Erwin Valentini (ponc: 1)
da christian ai 04 June 2007 da les 16:15:10
(Infos sun l utilisadour | Ti mané n messaje privat)
i oress plü co ater desfaronzié tlò les matades dales cosses series.

Sce an è bogn da lì sonza "foga" ci che i atri scrì, spo magari vara ince da nia se ofene y nia se baié önn dlungia l'ater ia

Iu ne sun daldöt nia en ciampanilist y i messi ince dì che le Dolomitan mo plej tres deplü, y laprò mio lingaz dla oma n'è nianca daldöt le mareo

mo ci che i mo damani y olache i m'anfidass da nia ester a öna, chel è söle ponsíer che le mareo è en "sot-idiom". Iu dijess cuaji de no mo i mo lasci ienn aconsié



Re: La delibera marora: n comentar de Erwin Valentini (ponc: 1)
da Claudio ai 05 June 2007 da les 08:15:46
(Infos sun l utilisadour | Ti mané n messaje privat)
Certa jent pér bele de se avei desmentié cie gran sotissoura che al fova tla Val Badia dant dal 1985, do che al é vegnù porté ite n pue de armonisazion tles scritures (nia demé ortografica), ence bele demé per lieje n pue plu saurì y armoniosamenter l foliet o n liber.
An baratova demeztroi ju anter -o- y -u- (orei - urei - podei - pudei - desmentié/desmoncé-desmuncé-desmuntié - gonot tl medem articul), chilò àn armonisé sun -o- (da podei ence lieje desche -u-). An pò ence recordé (recurdé?, arcordé? arcurdé) che al vegniva enlaouta scrit dant i pronoms atonics te dutes les persones belavisa desche tl LS, tlafineda àn sourantout l articul "le" per duta la valeda .... Desfé chesta "armonisazion", ciuldì, per valch apajé valch vueia isolazionista de valch persona de Al Plan.



Re: La delibera marora: n comentar de Erwin Valentini (ponc: 1)
da Claudio ai 05 June 2007 da les 22:22:57
(Infos sun l utilisadour | Ti mané n messaje privat)
Ie fosse corious de lieje les contradeduzions de Paul Videsott, dal moment che al defen la delibera, de audì sies vijions y sies giustificazions, o se àl entenù che an à dé n vare plu lonch dla giama?



Re: La delibera marora: n comentar de Erwin Valentini (ponc: 1)
da EValentini ai 06 June 2007 da les 14:00:21
(Infos sun l utilisadour | Ti mané n messaje privat)
Sciche à scrit Claudio te si comentar, la classificazion dl ladin te idoms, sot-idioms, dialec y sot-dialec pò ester linguisticamenter enteressanta ma ala à puecia relevanza per cie che reverda la grafia; chesta ne é nia cresciuda naturalmenter con l lingaz/idiom (dla oma) ma scrita dant dal aut da valch autorité.
L LS o ladin unifiché reverda demé la forma scrita y no la forma orala (fonetica, entonazion, etc.) dl lingaz; l LS ti lascia a duc la liberté de l lieje o pronunzié aldó de sie idiom o dialet (ence a mi, badiot, me sé l mareo plu bel che l badiot). Donca unfat sce an adora na grafia 'marora', la (orto)grafia dl ladin de mesaval (standard de valeda) o l LS, nosc amisc de Mareo podarà rejoné inant per mareo.
De cie che al ne va de segur nia debujegn é na caterva de manieres de scrive per la Val Badia y plu en general per la Ladinia. Na tel 'soluzion' criessa demé confujion anter la jent, che podessa enultima tré la conclujion pratica che al é plu saurì y donca miec scrive o per talian o per todesch. Y chest volessa dí ti giavé la fossa al ladin.



Re: La delibera marora: n comentar de Erwin Valentini (ponc: 1)
da Claudio ai 06 June 2007 da les 15:17:01
(Infos sun l utilisadour | Ti mané n messaje privat)
"Gusti son gusti" díjen, a me me plej deplú che l "gneo-gneo" mareo, preo, creo ... deplù les formes grovies de La VAl - prou, grou, marou con chela tonalité sun l -o, sterscia y rodenenta! Matades a pert .... ti don mo ciamò na odleda a chel pont al orden dl dí:
“Adoranza dl lingaz ladin tla varianta de Mareo (che contegn les formes plu vedles dl lingaz) tla redazion de ac publics, tl lingaz scrit ofizial”; che al vegne adoré y ensegné tles scolines y tles scoles de oblianza dl comun l “mareo”, l ladin che i mutons à emparé da sia oma y che ai rejona dutaorela a ciasa; che i maestri maroi posse adoré sie “ladin” pro l’ejam de trilinguism; che al vegne adoré ti media l mareo per les chestions che reverda la jent y la vita marora y ence te gliejia tesc per mareo desche l ordinament diozejan miena canche al rejona de liturgia tl lingaz dla oma”.
Dantaldut méten bele man con na certa presunzion che ala contegne "les formes plu vedles". Ma les implicazions é cotant plu grotesches. Chel che à porté dant l pont, pòn ence capì fosc da sie entusiasm,ma nia si aconsiadours dovia. I é audí che valch persones damana bele l ombolt o te comun, sce ai pò ben ciamò scrive valch che ne é nia mareo. Ti ortia sen l comun l polizist te scola a slomené l maester o la maestra (poester nia-maró-ra), sce al liej dant valch de nia-mareo? Sce te gliejia végnel tegnì messa con l liber "Syn" o "Laldun l'Signur". Vegniràl baní l libri de scola nia scrit per mareo. Mess i scolés de Rina se storje al mareo?
A chestes situazions da rí pòn ruvé con se spidicé su. Zacai mess dé chilò na spligazion!
Na autra cossa, daverta a duta la Ladinia y inovativa depierpul la mozion a ben dl LS.
Amich-dl-dolomitan, ciuna é pa tia minonga?



Re: La delibera marora: n comentar de Erwin Valentini (ponc: 1)
da christian ai 06 June 2007 da les 16:43:01
(Infos sun l utilisadour | Ti mané n messaje privat)
Iu arati empò la delibera de Mareo en at fat con coraje. Samben n'è en Comun nia na istituziun metüda adöm esclusivamenter da professurs de linguistica.

Ei(le Comun à laoré con coraje) y à proé da ti dé na forma reala ala realté che n Comun vir vigne dé. Cösc n'è nia daldöt nia damat.
Le monn n'è nia ma fat de linguisc.

D'atra pert m'à der plajü cosc ultimo comentar de EValentini.

Al va debojügn da spieghé ala jont cöstes cosses, y al è ince dert che la jont poi enstessa spo, tan ennant che ara va, tó söes dezijiuns.
Samben, l'opiniun di esperc è tlò dassen emportanta.
Porchel...

esperc, apascionês, inteletuai, amisc dla cultura ladina y nia ladina metesse adöm, baiede, portede la scionza, les idees danter la jont!

Christian Ferdigg



Re: La delibera marora: n comentar de Erwin Valentini (ponc: 1)
da marco ai 07 June 2007 da les 11:15:08
(Infos sun l utilisadour | Ti mané n messaje privat)
Al é da se fa de morveia ci gran peis che al ti ven de a la pröma pert dla delibera marora co é soradöt na cuestiun locala y nia definitiva!
Degügn libri (Syn, Laldun l Signur, tesc de scora etc.) messará gni burjês. Te dlijia d´Al Plan vegnel p. es. dagnora perié y cianté por mareo sön tesc de mesa val.
Al foss ben plan, plan ora che düc chisc "nemisc dal mareo" co se tlama amisc dal LS lasciass perde cöstes satires y ironies filosofiches sö l´idiom de mareo y metess man da fa finalmonter valch de concret, fajenn conesce le LS a düc nos, co foss magari la soluziun de düc i problems.
Fina segn é te cösc ciamp ma gnü pordü tomp.



Re: La delibera marora: n comentar de Erwin Valentini (ponc: 1)
da Claudio ai 07 June 2007 da les 19:56:36
(Infos sun l utilisadour | Ti mané n messaje privat)
Marco: fosc él miec che an ne classificheie nia l ladin scrit unifiché dla Val Badia desche de "mesa-val", ajache al ne corespon nience - sce an la tol avisa - a chel rejoné, dit ladin a desvalivanza dl mareo y dl badiot. P.ej. oláche an scriv encuei -o-, él da San Martin inant feter dlonch -u- (por -- pur, porsona - pursona, podei - pudei, odei -udei, orei - urei - encuei scríven ala marora dlonch -o-, plu inant l articul "le", i pronoms atonics deventa obligatorics etc..). Sciche dit al se trata de na lita puramenter "ortografica". Al fova la soluzion n pue logica anter les does estremités per mete adum n liber deberieda (p.ej. de scola o de gliejia) per duta la valeda y scrive tl foliet te na forma plu armoniousa. Sce ie esse abú da dezide valch, éssei ence lascé pro valch varianta marora en plu tl chest scrit unifiché, p.ej. i partizips sun -és y dantaldut entegré deplen l vocabular mareo te chel dl Mischí, p.ej. ài abú mancia la parola "eniann" y valch autra. Ma per fortuna él l vocabular de Videsott. Chesta locia messessa vegnì corida do mia minonga. L LS é de chest vers na forma grafica ciamò plu ampla y revaluteia dutes les variantes ladines dles Dolomites sot a n tet grafich soul.



Re: La delibera marora: n comentar de Erwin Valentini (ponc: 1)
da Jandaniel ai 08 June 2007 da les 14:27:00
(Infos sun l utilisadour | Ti mané n messaje privat)
Propi encuei éi liet la letra de Nicol d'Al Bagn tla ultima USC che reclameia a gran ousc che i articui che reverda Mareo, comentars, i fac sportifs, letres dess vegnì lascedes da la USC scrites per" mareo", desche an lascia ence chi scric per "badiot" .... Ie ne sé, sce an viv do la luna. Al pèr che i maroi rate duc cie che é do da bosc da Plaies y Piz da Plaies sie badiot. Chi dla bassa Val Badia (sclut fora Al Plan y La Pli) dij depierpul "su per chi badioc" y miena do Pont de Fer, ma ne se rata nia "badioc" y ne rejona nia "badiot", ma "ladin". L ladin unifiché scrit tla Usc ne é nia badiot, chel fossa cotant autramenter, chest é ence la gauja per chel che an liej plu saurí la Usc, ajache ala adora na grafia che avaliveia fora. Demarevueia che la Usc ne ti ae dé deguna resposta.



Re: La delibera marora: n comentar de Erwin Valentini (ponc: 1)
da marco ai 08 June 2007 da les 18:31:29
(Infos sun l utilisadour | Ti mané n messaje privat)
La Usc pö ultimamonter scialdi desorientada y se stonta da de respostes tleres a plü cuestiuns atuales. Mo plü co respostes y minunghes de porsones singoles mo aspeti obietivité!
Giornalism obietiv adora coraje.



Re: La delibera marora: n comentar de Erwin Valentini (ponc: 1)
da Jandaniel ai 09 June 2007 da les 10:19:03
(Infos sun l utilisadour | Ti mané n messaje privat)
Fazit de chesta scartaceda?
La delibera tla pert che vuel introduje la doura dl maro "dlonch y demé" ne é nia garateda, ajache ala ne tol nia en consciderazion l svilup dl lingaz unifiché tla Val Badia (che ne é nia chel da San Martin);
la mozion a ben dl LS tla Lia di comuns é dreta, ajache ala deura na sfessura tl isoliazionism che i vivon encuei, la politica di "ladins scluc ite te vilins" desche les biesces, o aladô de "divide et impera". Les leges encuei en doura ne contempleia nia "sub-entités" ladines, chestes é blot fates te ciasa.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.424 seconc