benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

N comentar de Carlo Willeit
scrit ai 02 June 2007 da les 19:16:01 da noeles

Cultura


La delibera marora y la vera di dialec

AN TI DÁ ENSCÍ TLA MAN LA MIOURA VERTOLA PER SCLUJE FORA I LADINS - N CLUSEL CON NA BELA SIEF ENCE PER L IDIOM MAREO SEN 

De un n vers él bel che n comun se cruzia dl lingaz, dal auter vers val debujegn da cialé plu lonc, ence soura i confins de comun y soura l idiom fora. La direzion y l travert plu logics restará perchel: al idiom l ciamp oral, de aviament o ensegnament bas, de libera adoranza privata: al lingaz unifiché l ciamp ofizial scrit.

N comentar de Carlo Willeit.



 

 

 


Statut de autonomia per gherdeina y badiot  - Promozion dla dejunion ladina Les traduzions dl statut de autonomia é vegnudes fates mel dal "original"

I Bantustans, i vilins ladins
Chesta é la politica de encuei dl istitut ladin MdR - Gherdeina, badiot, maro?
Di dla Unité Ladina: unité combatuda
"Duc rejona de colaborazion, ma ......."
Te valch diar o comentar de n saudé ladin éi liet che a la fin dla pruma vera se sentiva i saudés da ciasa gonot demé plu te sia vila o frazion y nience plu te sie comun o te sia valeda. Canche al mancia  n certl maiour da podei se identifiché laite o che an se sent scluc fora y arbandonés, méten man da se scluje tl unich segur, tl sie. Che chest comportament natural ne vele ence per i idioms ladins? An ti tol la cualité de fondamenta culturala primara, personala  y soziala sotfora, an ne ti lascia nia la dreta lerch tla formazion y comunicazion, an ne ti consent nia na viesta unitara y ofiziala. Empò él da se fé demarevueia che l comun de Mareo delibereia da adoré tl teritore comunal dlonch l mareo ofizialmenter. De un n vers él bel che n comun se cruzie dl lingaz , dl auter vers val debujegn da cialé plu lonc, ence soura i confins de comun y soura l idiom fora, da cialé dl lingaz  ladin de duc. La dreta ofizialité dl ladin passa tres la unificazion; dant chesta sará l ladin sostituí dal todesch y talian y chel sàn chi che se para con piesc y con mans dal ladin standard.

L destin dl ladin, di idioms, dl standard, dl ofizial passa tres na dreta scola y n dret ensegnament, tres la adoranza te duc i raporc publics y privac, da pert dla generalité dla jent y nia demé de valch emplié, maester, tradutour, poet. Con la condizion che an passe via de gre en gre al lingaz scrit unifiché podéssen ence aprové la dezijion dl comun de Mareo, ma sce l resultat é chel da despartí l ladin scrit dla Val Badia, ne pòn nia ester a una zenza resserves. Les dificoltés interlinguales (mareo-mesaval-standard) é perauter la mioura vertola per lascé fora endut l ladin. La direzion y l travert plu logics restarà perchel: al idiom l ciamp oral, de aviament o ensegnament bas, de libera adoranza privata - al lingaz unifiché l ciamp ofizial scrit. Tl vilin di idioms ladins, che vuel ester lingac empede fé l lingaz, á dessegur ence lerch l mareo. Ie ne son degun espert dla materia ma i rate da conesce l'emportanza dl lingaz  per la persona y la comunité, per sie  valour y sie progres, per sia liberté. Liejan tla ultima Usc l avis dla provinzia che chier n tradutour tl badiot con condizions autes y spezifiches (université, trilinguism A, conescenza dl badiot, prova de amiscion, demé per 6 meisc de laour) veiden tant saurí che an scluj fora gran pert di ladins dai  posc' de laour resservés al grup entier y che nos enstesc ti don les vertoles tla man con la vera di dialec.
Carlo Willeit
 
 
 
 

 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 4


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: N comentar de Carlo Willeit (ponc: 1)
da christian ai 02 June 2007 da les 16:36:30
(Infos sun l utilisadour | Ti mané n messaje privat)
Stimé Carlo,
stimês amisc...

i à empü l'impresciun che sot sot se stà a cör a nos düc empü la medema cossa...

I trus dala arjunje n'è magari nia bel i medemi.

Sce i lasciun magari empü demez la orenté de önn o l' ater da orei se profilé, spo messessera sogü ben plü saurì garaté plü unité ladina.

de cör



Re: N comentar de Carlo Willeit (ponc: 1)
da Claudio ai 02 June 2007 da les 17:20:58
(Infos sun l utilisadour | Ti mané n messaje privat)
Christian, i ne capesce nia chesta sort de conseis. Tie descurs me pèr n pue da preve. Carlo Willeit à fat na bela osservazion . La delibera de Mussner desche de Mareo é perdret ilegales, ajache la lege contempleia n grup "ladin" y nia sot-grups y sot-idioms, nience na desferenzia anter badioc-maroi-gherdeines, trata su artifizialmenter dal daite. Végnel tlafineda ence n crié sub-grups di "macarons da La Val" o de chi dai "Patachi" da Rina ....



Re: N comentar de Carlo Willeit (ponc: 1)
da christian ai 02 June 2007 da les 18:56:48
(Infos sun l utilisadour | Ti mané n messaje privat)
i odarun



Re: N comentar de Carlo Willeit (ponc: 1)
da travers ai 02 June 2007 da les 21:52:49
(Infos sun l utilisadour | Ti mané n messaje privat)
Con gran modestia dij Carlo che al n'é nia n espert dla materia (ladinistica) ma sies conscidrazions paissenassa ite te vigni curs universitar de soziolinguisitica. Magari podessa ence la catedra de ladin de Persenon tò ispirazion da n tel nia-espert!
N'autra cossa. Al ne é nia dl dut veir, sciche dij Claudio, che les istituzions ne ova nia tout consei da esperc de ladinistica en cont dl LS. L istitut MdR ova damané dl 1992 n arat a 5 esperc sun la "Wegleitung" de Schmid y duc i esperc, zenza ezezion, ova dé na valutazion positiva. Sun chela basa fòvel spò vegnù aprové l projet SPELL y plu inant ence TermLes, l projet che fòva vegnù valuté al prum post anter i projec per i lingac de mendranza finanziés da la UE. Ma nia demé chest: i programs y les relazions de laour de SPELL y TermLs é dagnora vegnus aprovés dal Comité tecnich, de chel che fajova pert ence l istitut MdR y l IPL.
La dezijion de MdR de bloché SPELL, chela che ti à davert la streda a la delibera anti-LS de F. Mussner, fova vegnuda touta via do l spinel de si partners tl Comité tecnich, la UGL y l Istitut Majon di Fascegn y zenza informé l diretour de SPELL. Chesta é la colaborazion interladina dles istituzions culturales ladines con a cef F. Mussner!



Re: N comentar de Carlo Willeit (ponc: 1)
da marco ai 03 June 2007 da les 09:35:39
(Infos sun l utilisadour | Ti mané n messaje privat)
La delibera marora á daurit na gran discusciun, cösc é belo valch de bun.
Denant co se lascé ji a polemiches a bun marcé messunse aspeté le svilup dla situaziun.
Sce atri comuns ladins s´anfida da "legalisé" le LS sarâl trec problems atuai co gnará co le tomp mendri.
Le LS messará sanben avei ince so post te scora! Nos ne podun nia le tigní ascognü.
Coses ascognüdes y porchel nia conesciüdes fesc pora!!



Re: N comentar de Carlo Willeit (ponc: 1)
da Paul_Videsott ai 03 June 2007 da les 12:28:47
(Infos sun l utilisadour | Ti mané n messaje privat)
Al me sa de marevueia tanc che miena de messei dì la sia sun la delibera marora zenza savei coche ala é vegnuda a se l dé y zenza capì sies intenzions. Ma co pa ence – fin a segn, prest does edemes do la senteda, n’à no la USC, no Noeles.net araté debujegn da intervisté chi che à porté inant chesta delibera – depierpul che sun d’autri argomenc, ence cotant manco emportanc, pòn lieje plates entieres de intervistes. Na gran lauda de chest vers al assessour F. Mussner, che m’à dé ocajion da i splighé personalmenter mia posizion te na discuscion longia y daverta.
A la redazion de Noeles.net y a d’autri che se scandaliseia segn per la delibera marora, volessi ti recordé l manifest „Ladinia 2005“, che ence ei à sostegnì y firmé. Les prumes 5 teses dij:

1. La souravivenza di Ladins dles Dolomites sciche popul caraterisé per cultura y identité é garantida demé da la souravivenza de sie lingaz. Per ti ester a les tendenzes dl’omologazion che carateriseia nosc temps él encueicondì plu che zenza debujegn de na politica linguistica unitara y efizienta per dut l teritore storich olache i Ladins é da ciasa, chest vuel dì les valedes de Gherdeina, Badia con MAREO, Fascia con Moena, Ampez y Fodom con Col S. Lizia.
2. DUTES les varietés linguistiches chersciudes su storicamenter te chest teritore é esprescion viventa y originala dl lingaz ladin: ales raprejenteia n patrimone essenzial per dut l popul ladin. A DUTES ti végnel reconesciù la medema y valiva dignité y DUTES dess ester reconesciudes a vigni livel da les istituzions.
3. VIGNI varieté ladina à l dert de mesures de sostegn y protezion per podei se svilupé y se mantegnì tl davegnì, y chest ciamò deplù tles valedes olache l ladin é tla dificolté per gauja de condizions soziales y giuridiches nia favorables.
4. La souravivenza y l svilup armonich di singui idioms ladins pò a la longia vegnì garantis cotant plu saurì tres l’elaborazion de n lingaz scrit unitar: chest é encuencondì un di obietifs primars y fondamentai per vigni politica de sconanza dla comunité ladina tles Dolomites.
5. L lingaz scrit unifiché, o Ladin Standard, é fondamental desche simbol dl’identité dl popul ladin y de sia unité: al é tl medem temp na “ombrela de protezion” che permet ence a les varietés locales de se mantegnì, de se svilupé inant y de se defene da les interferenzes di lingac vejins.

A me me pèrel che Mareo ae, con sia delibera, avisa atualisé chest program. Ma i me lasce ion consié da dutes les autres 446 persones che à firmé l „Manifest“ do da mi, coche chestes frases tant cleres (DUTES les varietés linguistiches; VIGNI varieté ladina, Standard desche „ombrela de protezion“) é da interpreté. Fin a dailò fossi content sce Noeles.net y n valgugn de si letours desmostrassa n pue’plu de coerenza. I éssen duc demé da davagnè.

Paul Videsott




Re: N comentar de Carlo Willeit (ponc: 1)
da Claudio ai 03 June 2007 da les 13:21:40
(Infos sun l utilisadour | Ti mané n messaje privat)
Chilò me permeti demé de enjonté. Tles 11 teses stal scrit "Badia CON Mareo", vuel dí deberieda y nia despartis.
I fosse veramenter corious da audí ciunes che é stedes les gaujes sotes, sotes ..... ne fóssel nia juda da arjonje n compromis sun la basa dl ladin unifihcé dla Val Badia (p.ej. con vedei dantfora valch varianta), méssel ester n troi a pert?



Re: N comentar de Carlo Willeit (ponc: 1)
da Jandaniel ai 03 June 2007 da les 18:20:21
(Infos sun l utilisadour | Ti mané n messaje privat)
Per me fóssel sté credibel, sce l comun de Mareo essa enciarié l ombolt de se damané l ladin standard pro la Lia di comuns.
Lié endere la chestion dl idiom mareo y l ladin standard tla medema delibera ti dà a duta la chestion na saour desplajoula/ajia che fej storje la musa. An pa consulté denant les istanzes tla Badia che meina inant l ladin unifiché dla Val Badia? Na delibera ne jiva dessegur nia bujegn, ence ajache l comun ne é nience competent per empone valch de tel. L prof.univ. Belardi ova bele clamé la delibera de Mussner "roba da Medioevo" ....
Sce i me recorde dret fova les 11 teses propi vegnudes metudes ju, per merit de Videsott, per gauja dla delibera Mussner.



Re: N comentar de Carlo Willeit (ponc: 1)
da MateoTaibon ai 03 June 2007 da les 21:30:44
(Infos sun l utilisadour | Ti mané n messaje privat)
bel le comentar de Willeit, y toché tal nojel.
Che la Usc n'ái nia scrit aladô n'é ciamó degün fal, gonot ne scriera pa gnanca can che zacai dla SVP fej de bortes bertes.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.415 seconc