benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La delibera marora sun la bota ciauda
scrit ai 01 June 2007 da les 19:28:47 da noeles

Politica


La delibera marora, ria da glotì 

LA TEMA DE TOMÉ ZERUCH TL CAOS DLES MULTI-VARIANTES -  L LADIN STANDARD É LA SOULA SOLUZION

La delibera marora sun l lingaz é bendebot ria da glotì tla Val Badia, nia demé pro valch colaboradours dl istitut, che veid metù en domanda l laour entourn al ladin scrit unifiché dla Val Badia. Chest à abù bendebot die da madurì, penson demé al liber de gliejia "Laldun l'Signur" o al liber "Syn" che ti à daurí al ladin les portes de gliejia. Zenza na unité tl scrit ne fossa chest mai sté meso. L vedl diretour dl istitut MdR, Lois Craffonara, laorova per chest standard de valeda, ma el cialova ciamò plu inant, al standard interladin sun les pedies de Micurà de Rü y a na politica linguistica "interladina". Sen veid valch un rompì fora l caos dles multi-variantes, n dejorientament total y n endebliment sostanzial dl ladin tla Val Badia. Ladin standard (LS): ciamò él na resposta debla.



Mareo reconesc l standard, ma a livel local vuelen l mareo
De jené dl 2003 ova l consei dl istitut MdR y l assessorat ladin a Bulsan declaré l LS clandestin
Ladin Standard: deguna sburla dal aut
La idea de ensegné LS te scola fossa perdret manco utopistica desche na pert miena.
Rejoneda dl'ava y lingaz unifiché
I gran vantajes dl ladin standard: al é plu saurì da lieje y da scrive per duc
Felix Ploner:  per l Ladin standard
Bel plan sonse stufs de messei retré nostes dezijions
Da enrescides sautel fora che la cogola é bonamenter pieda via da esponenc dla scola. Al toma l inom de Lois Ellecosta, ispetour a les scoles ladines de Bulsan, enstes de Mareo. Tl'auta valeda él ence n valgugn che sburla da agn de mantegnì "les carateristiches badiotes", p.ej. l vedl intendent a les scoles ladines Franz Vittur che ne vuel nia che l istitut ti mude ju formes de scrive tipicamenter badiotes. Si libri vuelel scrive tles formes che el vuel. Al pèr che al saute fora n vedl antagonism anter "maroi" y "i badioc", i "ladins" de "mesa-val" anterite. L ladin unifiché scrit dla Val Badia, chel enscidit de mesa-val, á per i prums chel "defet" de ester massa "badiot", per i badioc chel de ester massa "mareo". Chest ne é endere en verité nia l problem. L problem basilar, chel dàn pro, é la delibera 210/03 dl assessour Mussner che scriv dant na forma oblienta. Te scola végnel dantaldut ensegné da scrive la ortografia unificheda dla Val Badia y i ejams vegniva dagnora valutés aladò de chesta capazité di scolés. Lois Trebo la à definida tla USC na "delibera desgrazieda". Cler él che al mancia na "politica linguistica ladina" y chela ne pò nia ester valeda per valeda o comun per comun, ma ala mess ester interladina, zenza ne desceidela nia entusiasms, desche un dij: "Miec él zenz'auter avei n standard interladin che un de valeda, che ne acontenteia no l debujegn de unité anter i ladins no l patriotism local tla Val Badia". Ma l ladin standard (LS)  se féjen ert da tó su, enfinamai tla USC ne àl nia ciamò pié raisc endretura.
Valch auter miena: "Cie en él pa, sce l LS ne passassa nia o nia tant atira. Ala ne ciala nia fora tant empermetoul: Gherdeina sarà l'ultima che l sourantol, Ampez é dret dalonc, ta Fodom él na gran rassegnazion y te Fascia ne vuelen atualmenter nience introduje l LS tla aministrazion locala, ma an laora pro na sort de "inter-fascian". Dess te chest contest  labil la Val Badia dé su sia arjonta de n ladin scrit unifiché?".
Ciamò piec, te Gherdeina à la comiscion "Forni-Moroder-Verra" fat na reforma dla ortografia che va plu dalonc dal model LS y tla Val Badia ésen ence do a mudé ju la ortografia, dut chest nia sot a n tet interladin, ma valeda per valeda.
Na autra opinion rata depierpul: "I maroi ne à nia bria de emparé auter che da rejoné y scrive n bon mareo y da lieje passivamenter l LS. Chi che adora ativamenter l ladin standard (tradutours, jornalisc', etc.) pò pu l emparè saurí te n valgunes ores de curs, davia che al à na strutura logica y clera y al é meso da l scrive per analogies".
La delibera marora mostra su les contradizions y en met sun meisa na nueva "idiom de comun ofizial - standard interladin". Deplù formes de ladin scrit  saràl rie che pò ester na soluzion tl davegnì.

 

 

 

 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 2.5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: La delibera marora sun la bota ciauda (ponc: 1)
da travers ai 01 June 2007 da les 20:37:36
(Infos sun l utilisadour | Ti mané n messaje privat)
Complimenc a la redazion: na analisa clera y ben documenteda dla situazion!
L regn de Fanes é n paisc de marevueia. Siei raprejentanc moderns, l ombolt y l consei de comun de Mareo, é vegnus laudés pervia che ai é jus a chirì l consei de n ladinist, l prof. Videssot . Sce an pò ti creie a cie che scriv I. Rigo te sie "Comentar de pruma" fòssel sté el che ti essa consié al comun de adoré ofizialmenter trei variantes de ladin.
Ma provon mo n puech a pense dò: Chi pueri scrivans de comun messessa savei da scrive te 3 lingac ladins (olà l empari pa?), emplù per todesch y talian y tert o adora ence per ingles! L amour di ladins per la "Muttersprache" é tant gran che ai ne bazila dant degun priesc; n tel luxus ne podessa se permete nience l Emirat de Dubai.
Y l consei (sce al é veir) dl espert de linguistica ladina? L unica spligazion che me toma ite é che al volova conteté (l'ego o l ciampanil) de duc: maroi, ladins de mesaval, badioc, i amisc dl LS y magari ence chi dla Regula ( i mutterspracherli DOC) y chi fascians che volessa endò scrive "Fasha". Con l resultat che al à metù sotessoura l mond ladin entier.
Asterix dijessa: Ai é mac chisc ladins.



Re: La delibera marora sun la bota ciauda (ponc: 1)
da christian ai 02 June 2007 da les 11:33:41
(Infos sun l utilisadour | Ti mané n messaje privat)
Stimês Amanc y combatenc dl lingaz dla Oma(unifiché o nia)!

La crödia realté è che dezijiuns de Comuns o atri organisms politichs o culturai revardantes le lingaz ladin n' à nia metü confujiun tles valades ladines, mo plü co ater te n per de ces ladins.

Ala jont sciompla, al popul, chel che danré ven damané, i'an èl gonot bel anfat de ci che vegn fat fora. Gonot ne i an freghel nia trep dal Ladin. Y cösc porciodi che al ven plü o manco tres ma tut dezijiuns y porté ennant discusciuns dal alt!

Ci che nüsc inteletuai, esperc, politichs, scienziês podess fà deplü..., chel è ti ensegné a nos jont sciompla l'amur y la dediziun por nosc lingaz y nosta cultura(unificada y nia che ara sides), sonza ne joarà pa ben döt cant nia...

Por descedé l'entusiasm ôl pa ben ester döt val' d'ater co critiché jornalisc co scrì mal le ladin, aconsiadûs o ombolc co se tol la bria da baié de lingaz te stöa de comune y.i.i ...

Ensegnunti mo l'amur, la pasciun por ert y lingaz a nüsc fredesc y nostes sorûs, plü co fà batalies y discusciuns che la maiù pert de nüsc conzitadins ne capesc magari ciamó nia o n' à nia veia da aldì y se stüfa.
La forza ven dal bas.
La ligreza dal alt...

Christian Ferdigg



Re: La delibera marora sun la bota ciauda (ponc: 1)
da Claudio ai 02 June 2007 da les 12:27:18
(Infos sun l utilisadour | Ti mané n messaje privat)
Christian: tia analisa ne me pèr nia cis giusta. Les isituzions essa perdret la oblianza de tó les mioures dezijions, cie che ales ne à nia fat tla chestion dl ladin standard. Al ne é vegnù tout consei da degun espert, cie che an fej p.ej. pro vigni laour publich o auter. Perchel él ence sauté fora les critiches, chesta me pèr na reazion naturala y legitima. Ala ne se trata nia demé de n valgugn cefs sciche ti vueles minimisé y fosc "descredité" la problematica.



Re: La delibera marora sun la bota ciauda (ponc: 1)
da christian ai 02 June 2007 da les 12:46:25
(Infos sun l utilisadour | Ti mané n messaje privat)
Stimé Claudio!

i à lit con ligreza sen tò comentar.

Iu n' ô nia "descredité zacai, mo empü critiché ben. Minimisé la cossa daldöt no nia.

Iu diji cösc... y tlò messte m'ascuté: tartan che nos "apascionês" o " inteletuai" o ci che i orun portun ennant nostes discusciuns, gonot ince taiontes y posoces, edl prigo che la jont se alontaneies tres deplü dla cossa ladina. Y cösc messte y messunse se lascé dì.

Tler spo, i tlò te dai rajun, les dezijiuns politiches y istituzionales mess gnì tutes con les miûs vijiuns poscibles, y cöstes è gonot liades ala politica de partì.






Re: La delibera marora sun la bota ciauda (ponc: 1)
da Claudio ai 02 June 2007 da les 17:03:08
(Infos sun l utilisadour | Ti mané n messaje privat)
La delibera marora é desche chela de Mussner n.210/03 ilegales dal meteman: al ne é degun test de lege che reconesce "maroi", "gherdeines", "badioc", "macarons da La Val" o valch autra sort de etnies y sub-etnies ladines, ma demé ladins. Dutes chestes desfarenziazions é fates te ciasa y ne à deguna rejon de ester.
Demez con la delibera de Mussner y con chela marora!



Re: La delibera marora sun la bota ciauda (ponc: 1)
da marco ai 02 June 2007 da les 15:28:16
(Infos sun l utilisadour | Ti mané n messaje privat)
A chi co á problems da glotí la delibera marora él sogü ince la cuestiun dal referendum y dla unité dla Ladinia co ti sta dassen sö le magun!
La delibera á mostré che la politiga ladina fata dal alt laora cuntra l´unité y soradöt ince cuntra le lingaz ladin. Le fin de cösta politiga, (fata da gran esperc y espertes!?) é chel da isolé vigne valada te so contest y te söes carateristiches fajenn ladins de serie A, de serie B y ince de serie C.
Sen, con le fat dal referendum y con la costituziun dla Lia dai Comuns,vegnel fora döt d´atres prioritês. I traverc de na politiga ladina oligarchica y aroganta é tomês adöm.
L´idiom local y le LS po vire deboriada! Nos sperun che trec comuns ladins vai cösc tru tal dagní!!
Nia orêi le LS é na vertora por nia orêi la unité aministrativa dla Ladinia.
Sce an li y comentars y les reaziuns der controverses dô la delibera marora spo messunse veramonter se damané sce les asoziaziuns politiches, culturales mo soradöt i mass media ladins é por l´unité dla ladinia.




Re: La delibera marora sun la bota ciauda (ponc: 1)
da Claudio ai 03 June 2007 da les 09:38:26
(Infos sun l utilisadour | Ti mané n messaje privat)
L confront ne ofen degugn, ma al vegn demé mostré su tres na coienaria che chela de se scluje ite ti idioms é assurd, desche ence Willeit mostra su. Bele encuei ésen ruvés a n proporz anter Gherdeina y Badia. Al me pèr che vos seis ence de chesta minonga. I ruvon a cosses assurdes, sce i jon inant enscì: féjen na repartizion aposta tl comun per chi da Rina che NE É NIA "mareo" tl sens strent? Ciuldì po pa l comun de Mareo ignoré chest, sce al vuel ti jì do tant al idiom?
Ie son dla minonga de Videsott. Anter rejoné y scrit (azion culturalal) méssel ester na certa desvalivanza per podei apriejé n lingaz .
Perauter l LS à propi sourantout dal "mareo" valch de si trac particolars (pronoms atonics te dutes les persones, formes de partizip ...)


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.554 seconc