benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

PUP: la UAL à fat sies osservazions
scrit ai 30 May 2007 da les 20:14:53 da noeles

Fascia


Plan urbanistich provinzial la UAL à dit la sia 

VIVENTÉ L LAOUR DA PAUR - RAION DL CIADENAC SOT A SCONANZA - L COMUN GENERAL DE FASCIA SOURANTOL RESPONSABELTÉS

Pro la enconteda anter l president dla jonta de Trent Lorenzo Dellai y la Union Autonomista Ladina (UAL) tegnuda ai 22 de mei a Poza él vegnù metù sun meisa dutes les consciderazions di esponenc ladins a revert l Plan Urbanistich Provinzial (PUP) che dess vegnì metù ju te na lege provinziala. L president Dellai à apriejé les toutes de posizion dla UAL. Al se à tamben aodé che an troe na bona colaborazion anter i ombolc ladins, unis sen tla Lia di Comuns Ladins.

I esponenc dla UAL pro meisa con l president dla jonta de Trent, Lorenzo Dellai.



Zirconvalazions: Moena dl 2009
A Ciampedel y a Poza empermò en projet
 
Marmoleda: Soraperra tiza la descuscion te consei
Al ti vegnirà mané a Trent n document cler: an vuel l coliament de Fedaia con Ponta Rocia
Mendranza linguistica, identité identité ladina, unité
demé blot paroles dl passé?
Dr. Fabio Chiocchetti se damana ciugn che dess ester i obietifs tla ativité dl Istitut tl davegní
"Transdolomites" propon mesi alternatifs
Convegn sun l trafich tegnù ai 20 de otober a Vich de Fascia - Esposizion: Glaciers sot a viere - Deplù servisc de trasport publics
Raions da paur sot a sconanza. La UAL rata che i raions paurii dess vegnì defenus, ajache ai é una dles fondamentes dla cultura ladina. La "tera ladina" é na pert dassem emportanta dla identité dla jent. Baudi àn te Fascia messù cialé pro desche bona pert di mejes y dles pastures é vegnus arbandonés, tamben i laours da boschier, depierpul che al se à enflé su l setour turistich y artejanal. La UAL veid tla istituzion de "raions agricui sot a sconanza" na poscibelté de arferé ju chest prozes y de viventé endò produzions tipiches liedes al teritore. Dl auter vers veid la UAL ence ite i festidesc de n valgunes aministrazions comunales de Fascia che à relevé valch problems olàche i raions agricui confineia con i abités. Ala se aoda che chisc raions vegne tarmenés en acordanza con i comuns aluesc autramenter per permete la realisazion de zones de completament y de reordinament urbanistich.

Raions naturalmenter enton. Per cie che reverda i raions de competenza provinziala veid la UAL l utl y l davagn de i valorisé ciamò deplù desche ercia naturala tant inant che ai é bele inseris ti "sic y raions dla rei ecologica europeica 2002" y tl "patrimone dolomitich", ence tla previjion dla declarazion dles Dolomites desche monument natural sot a sconanza dla Unesco. En particolar vuel la UAL mené do la prozedura per mete sot a sconanza i raions dl Ciadenac a confin con l "Parch Natural dl Scilier" tla provinzia de Bulsan, per amplié chest parch devers dl Trentin.
Lim a costruzions nueves. La UAL é convenciuda che al va debujegn de ouje endrez per cie che reverda costruzions nueves. Entratant él madurì amplamenter la coscienza che al va debujegn de envié via n prozes de svilup dl turism nia tl grum, ma tres deplù tla cualité, p.ej. tres la recualificazion y la tramudazion dl antare edilize dant man. La Val de Fascia con si entourn 60.000 lec, 2/3 de chisc loghés te secondes ciases y 4 milions de prejenzes turistiches, raprejenteia n contest economich con bendebot  trueps problems che ne pò nia vegnì scutés via y che se damana respostes cleres.
La antropisazion spessa dl raion fascian porta empera problems de servisc, de transisament intern y de passaje, problems de ega da beive y de eghes pazes, de ecuilibers soziai, de marcé imobiliar y de cualité de vita di aciasés. La UAL rata che l PUP meine te na bona direzion te chestes chestions. La UAL volessa endere empò podei dì la sia pro la reforma dla lege urbanistica provinziala y se damana che al vegne amarscé raions da fabriché per i aciasés a na moda che ai posse se fé su na ciasa degnitoula a n priesc da podei despaié ju, chest ence tres retramudazions y derturamenc de fabricac bele dantman. Mete averda te chest ciamp vuel ence dì arferé ju n fenomen desplajoul, chel dla emigrazion de aciasés devers de zones foravia nia enteressedes da prescions tant stersces sun l marcé imobiliar.
Emplanc portamont. Al é bel n pez encà che i impresars funiviars rata che al ne va nia plu de uega de amplié zones dai schi. Samben, l debujegn de jié pera sun l marcé turistich te na posizion de venta se ghira tresfora adatamenc di emplanc y dles pistes a les tecnologies nueves y ai debujegns nuefs di schiadours. Al é da dì che la val ressent nia demé la concorenza de localités turistiches de fora dla Talia, ma ence de chela dles valedes entournvia olàche i emplanc y les pistes tol ite na souraspersa che despassa via l 40%. Al dess perchel vegnì vedù dantfora valch oures de completament y de adatament di raions dai schi tles zones bele dantman.
La Marmoleda se merita a poura nia n capitul a pert per sia gran valuta naturala, ma ence ajache ala fej dassen pert dla storia dl turism fascian. La UAL rata che al vae debujegn de mete adum n plan de svilup deberieda con duc i comuns enteressés  che respeteie l ambient y che sie datant de abiné adum y de valorisé dutes les potenzialités che chest glacier dolomitich pieta.
L transiament veicolar che drombla da ann a ann tres plu pesoch su y ju per la val se ghira dezijions sun la basa de analises organiches y complessives dla situazion transitala. Enfin a encuei àn plulere demé tout dezijions aldò dla prescia. Tla rei de trasport déssen cialé de lié ite i emplanc portamont tant inant che al uega, rata la UAL. L fat che les dezijions sun les trasses dles gran oures viares, ence de cheles de enteres souracomunal, ti sie vegnudes sourandedes al Comun General de Fascia significheia samben che Fascia mess se sourantó la grovaria dla dezijion y la responsabelté.


 
Liams emparentés
· Deplú sun l tema Fascia
· Chier te noeles


L articul plu liet te chest tema Fascia:
Publicazions nueves: biografia sun Tita Piaz


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.364 seconc