Noeles.net - Informazion ladina - 25 studenc universitars à emparé a conesce la Ladinia

Studenc universitars tla Val Badia

25 STUDENC É VEGNUS ACOMPAGNÉS ITE PER LA VAL BADIA PER CONESCE CULTURA Y LINGAZ LADINS

I studenc d'engiame che ruva per un o doi semestri da dut l mond a studié a l'université ledia de Bulsan ne empara gonot nia a conesce damprò les belezes di contourns. Chest dess se mudé da eniann inant. L ofize academich enciarié di liams con foradecà, deberieda con kikero, se à tout soura de mete a jì viadesc per chisc studenc folestiers che tol ite n program cultural y de orela curta. Enscì vuelen ti fé conesce plu davejin cultura y natura y jent y usanzes de Sudtirol. Ai 16 de mei él vegnù envié via l prum viade ite per la Val Badia.

Foto de grup dant al Ciastel de Tor.

I 25 studenc de plu nazions che à tout pert a emparé a conesce y ence ciarcé la cultura ladina. L clap é vegnù acompagné da Dirk Bendiger, student da 150-ores enciarié dal ofize academich esteriour y dal prof. dr. Videsott, professour de ladinistica pro la facolté de scienzes dla formazion. Bele da jì itepert ti à Videsott conté dant n valgunes nozions sun l lingaz y cultura ladina y valch scliguc de storia.
Per prum ésen storc pro empera tl museum ladin, olàche al ti é vegnù dé spligazions per engleis. L temp l'à mineda bona con temperatures bendebot ciaudines per chesta sajon y enscì àn podù fé la picia marena alalergia dant al ciastel con na veduda demarevueia bela sun i creps, i bosc y i pres entournvia. Dedò é i studenc vegnus acompagnés dal dr. Giovanni Mischí, emplié pro l Istitut Micurà de Rü, ta Lungiarü a ti dé na odleda ai vedli mulins y a les viles da paur de Seres y de Miscì, testemonianzes tipiches de vita ladina y encuei dret ben rencuredes. Giovanni Mischì, da agn promotour dla sconanza di mulins y dles viles, à sapù da ti daurì chest mond pauril demarevueia con duc si enjigns. I studenc che rejona talian y portugheis-brasilian à ence entenù valgamia les spligazions ladines dantfora.
Dedò àn dé outa devers La Pli de Mareo per jì a ti cialé a la gliejia plu vedla dla Val Badia, passan tres la contreda y la tavela verdienta de Mareo. La cultura de n luech empàren a conesce - y chel nia enultima -tamben tres l magon con na bona speisa y chesta ti é vegnuda tenuda su tla ostaria dl Garsun a Mantena a Al Plan, conesciuda per sies derzedes ladines. Chesta "spazireda culturala" é vegnuda sostegnuda con na soponta finanziara dal ofize a la cultura y scola ladina dla provinzia de Bulsan, dal museum ladin Ciastel de Tor y da la Cassa Raiffeisen dla Val Badia.


Vos ne seis nia loghé ite. [ Loghé ite ]