benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

100 agn da la mort de Graziadio Isaia Ascoli 1907-2007
scrit ai 28 May 2007 da les 21:42:52 da noeles

Cultura


Graziadio Isaia Ascoli, 100 agn da sia mort 

TRES I "SAGGI LADINI" ÀL METÙ LES FONDAMENTES A LA LINGUISTICA LADINA, DEFINIAN L STATUS AUTONOM DL LADIN GRIJONEIS, DOLOMITAN Y FURLAN

Dant da cent agn, ai 21 de jené dl 1907, morìvel Graziadio Isaia Ascoli, glotologh, dozent de linguistica, scienzié de renom che à abù souradut l gran merit de avei definì te na maniera scientifica l "status" de lingaz autonom dles faeles ladines: ladin grijoneis, dolomitan y  furlan y sia partegnenza a n grup per sie cont, chel di lingac "ladins". Graziadio Isaia Ascoli fova nasciù ai 16 de messel dl 1829 a Gorizia, enlaouta pert dl Imper Austro-Ungarich, fì de Leon Flamini Ascoli, judier y patron de cartaries y de filandes y de Eline Norsa. La pruma istruzion àl abù te ciasa da n maester gorizian che rejonova aunejian. Tres n maester privat àl spo emparé dedò latin y grech. Chi de familia praticova la religion di peresc, l judaism, y el enstes, almanco da joen, tamben: chest ti ova permetù de emparé l ebraich y l aramaich.



"I Saggi Ladini", 130 agn dedò  
I laours dl linguist furlan-gorizian Graziadio Isaia Ascoli mantegn dutaorela sia validité . Al fossa ora da remoné demez n iade cerc pregiudizes. Ladin, n lingaz vedl y arcaich? No
Dal latin al ladin
Dret n gran fal y pericul per l lingaz ladin é l isolazionism de valeda. Da n referat dl prof.univ. dr. Paul Videsott
Orbilat.com, la storia dl latin y de si jerfs
N sit con n grumon de informazions soura l mond latin, i lingac neolatins: origines, strutura, fonetica y svilups storics
Heinrich Schmid y sia vita
Curta biografia dl prof.univ. dr. Heinrich Schmid 
che à metù ju les diretives per l ladin standard
En plu fova Gorizia a chi temps n pice mond plurilinguist, olàche, dlongia al furlan audìven rejonan talian, sloven y todesch, chest ultim vegniva enlaouta ence ensegné tles scoles. Al fova na realté che sauridova l confront linguistich. Chest ti à permetù al Ascoli de ti jì do a sia inclinazion naturala: i studes linguistics.
Si prums conseiers fova l semitist judier Samuel D. Luzzatto y l rabin Reggio y plu tert ence doi prevesc catolics: l gorizian Cociancig, orientalist y slavist, y l furlan Jacopo Pirona, autour dl prum "Vocabolar furlan". Propi a chesta persona, Ascoli ova apeina 17 agn, ti àl dediché sie prum saje, la oura dal titul "Sull'idioma friulano e sulla sua affinità con la lingua valaca". Chest liber é vegnù dé fora da la stamparia Vendrame de Udin tl 1846. La oura mostrova duc i defec dla puecia esperienza de sie autour, ma ala à l merit de ester sté l prum saje de analisa scientifica dl furlan. I linguisc' Miklosic y Schuchartdt  l ova dret apriejé ti dan te chesta maniera al Ascoli la sburla che al ova debujegn desche joen glotologh per jì inant con fidenza sun chest ciamp raidous y intrigous.

Entratant jiva l Ascoli inant te na maniera aslum con si studes glotologics al pont de descuerje deplù fai tl "Saggio sui dialetti gallo-italici" publiché tl 1853 da Bernardino Biondelli. Tres en chi agn àl abù la ventura di podei lieje pert dla oura monumentala nia ciamò stampeda de "Vergleichende Grammatik des Sanskrit, Zend, Griechischen, Lateinischen, Gotischen und Deutschen" (gramatica compareda di lingac sanscrit, zende, grech, latin, gotich y todesch; Berlin, 1833-57). Chesta oura ti dauriva ai studiés n orizont bendebot gran. Tl 1854 àl envié via a Gorizia la publicazion de n periodich de studes orientai y linguistics.
Chestes publicazions ti à daurì al Ascoli l contat con i maiours glotologs de enlaouta ti Paisc Tosc - Kuhn, Fleischer y Rödiger - che l à atira envié a colaboré pro sies publicazions. Tl 1859 rùvel per la pruma outa tla Talia y al vijiteia Milan, Torin y Florenza, olà che al à emparé a conesce trueps linguisc' conescius, strenjan contac de laour y de colaborazion empera, tant che tl 1860 ti à Terenzio Mamiani ofrì la catedra  de lingac semitics a la université de Bologna. L ann do à Mamiani metù su aposta per el, pro la academia scientifica y leterara de Milan, na catedra nueva de glotologia y lingac orientai che à spo mudé sia denominazion te "Storia compareda di lingac classics y neolatins". Sun chesta se à  Ascoli trasferì da Gorizia a Milan.

Tl 1873 à Ascoli abù la gran sodesfazion de podei publiché na revista taliana de glotologia che podessa ti sté permez tl confront con cheles che vegniva bele publichedes da plu agn ti Paisc Todesc,  tla Francia, tla Inghiltera y tla Svizra. La revista se clamova "Archivio glottologico italiano". Te sie prum volum (1873) àl metù dant la oura plu emportanta y conesciuda dl Ascoli, i "Saggi ladini". Al se trata de n laour particolar per i ladins dolomitans, furlans y grijons, ajache an giata laite esponuda duta la fonetica dles faeles "ladines" y la teoria metuda ju con clarté che spligheia sia autonomia linguistica daite dal sistem neolatin y de unité originara de chestes faeles alpines da les fontanes dl Rain (Cianton di Grijons) enfin a Triest. La idea de chesta unité, bele veduda ite n valgugn agn denant dal linguist Adelung y proponuda con plu clareza da Christian Schneller, é vegnuda confermeda dal Ascoli con duta sia competenza tl ciamp linguistich. Passa mez n secul é chesta teoria vegnuda azeteda zenza de gran discuscions da duc i linguisc' y dutaorela en él trueps che la rata dreta. Demé Carlo Salvioni, discepul dl Ascoli, do l'avei die alalongia condividuda, se à pronunzié dl 1918 decontra, enlaouta per rejons clermenter nazionalistiches y anti-todesces.

Chestes posizions "contra la unité ladina" é spo venudes tiesciudes inant dal professour Carlo Battisti che à encuei deplù partisans.  Do chisc prums "Saggi" che tolova ite la fonetica compareda di trei grups idiomatics che l Ascoli clama en general "ladins" (ladin grijoneis, dolomitan y furlan), dòvel vegnì fora  la esposizion, tres compareda, dla morfologia, ma chest laour desche trueps d'autri emportanc metus man dal glotologh gorizian ne é mai ruvés a na conclujion.
La luegia che Graziadio Isaia Ascoli tol ite tla storia dles scienzes linguistiches é bendebot emportanta enfin a encuei. Al à istruì trueps glotologs de valuta, ma degugn de ei ne é ruvés a despassé via sie maester. Poester àl spanù fora sies energies te massa trueps laours dret sfadiousc  y al ne ova nia dagnora dlaorela de i scluje ju. N valgugn de si maiours laours ne ál defat nia porté a termen desche "l curs de glotologia", i "Saggi Ladini", i "studes ario-semitics", l "glossar paleo-irlandeis"). Atempé y vedl, stimé y veneré é Graziadio Isaia Ascoli mort ai 21 de jené dl 1907, belavisa dant da cent agn. (edelweiß)

Articul sourantout dal sit furlan: www.ladinsdalfriul.org y outé tl ladin dolomitan.


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.407 seconc