L liber, dutaorela na fontana dret d'utl
Te Fascia él trei biblioteches y na biblioteca spezialiseda sun temesc ladins
Tl ampl panorama de propostes culturales y de scomenciadives che se desleria ence te Fascia tol ite les biblioteches na luegia bendebot emportanta. Al é n pont de referiment per paré la seit do savei y conescenzes per na comunité che veid tl liber n strument dutaorela dassen aiutoul y fondamental enceben che les teconologies nueves se fej tres plu lerch.
Les biblioteches tl Trentin: 3 milions de titui arconcés via con catalogh eletronich.
Te Fascia él trei biblioteches, chela de Moena, chela de Vich y chela de Cianacei, metudes su respetivamenter dl 1970, dl 1983 y dl 1988. Da valch ann encà fej pert dutes les biblioteches dla provinzia de Trent dl sistem bibliotecar trentin, n sistem che arconcia adum soura 150 biblioteches anter cheles comunales, cheles spezialisedes y cheles universitares te n gran catalogh online. Chest permet de podei avei a la leta dut chest patrimone librar che despassa via i 3 milions de titui. Chest servisc é dassen emportant dantaldut per studenc canche ai à da chirì libres particolars y che ti é d'utl per valch ejam. Les trei biblioteches de Fascia à encuei n antare librar de endut 55 mile titui spartis fora tles sezions di gragn, di bec, tla sezion locala y samben tla sezion che reverda lingaz, cultura y storia ladina. Sun chest argoment va ite plu avisa la biblioteca spezialiseda dl istitut cultural ladin Majon di Fascegn a Sen Jan che dombra soura 3000 titui y é enscila n pont de referiment emportant per duc i studiés de storia y de lingaz ladin. Chesta é na biblioteca clameda "spezialiseda", ajache desche truepes de autres, vuelela ester n referiment sun n tema restrent y particolar. La Val de Fascia pò a poura nia ester bravia de avei n tel patrimone che é avané damprovia plu y plu tres i agn. Les biblioteches é n pont de atrazion per i sentadins, ma ence per i sciors che troa tles biblioteches na poscibelté de conescenza dl patrimone librar general, ma ence dl patrimone lié a la conescenza dl mond ladin. Les trei biblioteches ciala de soscedé sun l teritore ence la vueia de lieje di bec tres desvalives scomenciadives de carater promozional. Ales endrezeia via mostres de libres, scontredes con autours, ocajions de archirida y truep de auter. Al ne mancia nience internet en doura a la jent che ruva te biblioteca, ma l liber, con sia fascinazion y con sia storia resta inant n pont de referiment fondamental che ne moriarà nia fora, almanco nia tant atira.
