benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Di dla porta daverta tl museum ladin de Fascia
scrit ai 14 May 2007 da les 20:05:43 da noeles

Fascia

 

Turism, enscì la veidi ie

Edema nazionala dla cultura 15-19 de mei: esposizion de grafics y depenc con meisa torona: "Turism, enscì l veidi ie: rejonon de chest!"

En gaujion dla "Edema nazionala dla Cultura" (15-19 de mei 2007) met dant l istitut Cultural Ladin de Fascia pro la senta dl museum ladin na mostra dret particolara: na esposizion grafich-pitorica "Turism: enscì l veidi ie" ("Turismo, un'idea mia" per talian), laours grafics y pitorics dl concurs omonim scrit fora da la ASAT (assoziazion turistica de Trent) y resservé ai scolés trentins, bele prejenteda de merz tl Ciastel dl "Buonconsiglio" a Trent.  An à raté dret de fé conesce y apriejé chisc laours manés ite dai scolés de Fascia, ben 53, ence da la jent dla valeda. Tl medem temp vuelen tamben sporje na ocajion per se fé pensiers sun l davegnì dl turism.

La Veisc conta: con chest laour à i scolés dles classes III A y B de Moena venciù l pest nazional dl'ANCI.



Enscila él orì la idea de enjonté permez na meisa torona dal tema: "Turism, enscì l veidi ie: rejonon de chest! L’identité desche ressoursa per n raion con cherdeda turistica" che vuel cueie su la scomenciadiva analoga metuda a jì a Trent, olàche i scolés, i sourastanc dla ASAT y i operadours turistics se à engiamié idees sun l tema "Identité, cultura y turism". L museum ladin vuel filé inant la discuscion per ti pité ai operadours turistics fascians na ocajion de clupé su idees y ence i festidesc di joegn sun la relazion anter na ativité economica "globalisanta" desche l turism y na comunité de val che vuel mantegnì sies mersces y che crei tla diversité linguistica y culturala ence te na prospetiva dl futur. Al se trata de na relazion che pò poura nia ester conflituala ma che pò tamben ester n festil de valours per mioré la oferta turistica te n raion unich y demarevueia desche chel dles Dolomites. L rodul jié pro chesta scomenciadiva da pert dla ASAT, plu avisa dal "grup di ostiers joegni" con sie sourastant fascian, Guglielmo Lasagna, va redont te chesta direzion.
Pro la meisa torona coordineda da Monica Basile dl’ASAT saràl a la pert l jornalist Luigi Giuriato desche moderadour y trueps operadours turistics y de autri esponenc, anter chisc Natale Rigotti (president dla ASAT), Roberto Pallanch (diretour ASAT), Guglielmo Lasagna (President di ostiers joegn dla ASAT), Andrea Weiss (diretour dla APT Val de Fascia), Marco Viola (manejadour dl Servisc a les mendranzes PAT), Fortunato Bernard (sourastant dl raion scolastich ladin de Fascia), Leonardo Bernard (president dl Comprensore Ladin), Mirella Florian (President dl istitut cultural ladin y ensegnanta) y Fabio Chiocchetti (diretour dl istitut cultural y dl museum ladin).
En vender, ai 18 de mei, vegniràl souraprò festejé la sourandeda dl pest ANCI (Associazione Nazionale Comuni Italiani) a les classes III A y B (a.s. 2004/5) dla scola elementara de Moena per avei metù adum l liber "La Veisc conta… / L’Avisio racconta…", n auter ejempl de afermazion a livel nazional da pert di scolés fascians.
Endana la edema é l museum ladin de Fascia davert debant dal mertesc, ai 15 enfin a la sabeda ai 19 de mei da les 15.00 a les 19,00. Les scoles che volessa eventualmenter organisé na vijita pò fé fora n orar telefonan diretamenter al museum.
 
 
 
Dai 15 ai 19 de mei : portes davertes al museum da les 15.00 a les 19.00
mertesc, 15 meida les 16.30: enaodazion dla esposizion "l turism: na mia idea"
festejament di partezipanc fascians
vender, 18 mei
da les 15.00: Festa per l pest ANCI (Associazione Nazionale Comuni Italiani) sourandé a les classes III A y B (a.s. 2004/5) dla scola elementara de Moena per l liber "La Veisc conta …"
da les 16.30: Meisa Torona: "l turism, na mia idea: rejonon!:
L’identité desche ressoursa per n raion con cherdeda turistica"
Moderadour: Luigi Giuriato - Coordinament: Monica Basile, ASAT
 
 
 
Info
Istitut Cultural Ladin
Museo Ladin de Fascia
Sen Jan
38039 Vich  (TN)
tel 0462 760182
fax 0462 764909
museo@istladin.net
www.istladin.net

 

 

 
Liams emparentés
· Deplú sun l tema Fascia
· Chier te noeles


L articul plu liet te chest tema Fascia:
Publicazions nueves: biografia sun Tita Piaz


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.385 seconc