benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lia di comuns ladins: la jonta se abina endoman
scrit ai 08 May 2007 da les 18:50:42 da noeles

Politica

 

La jonta dla "Lia di comuns" se abina

endoman a Corvara a sia pruma senteda -

En doman a Corvara, te sia senta, se abina per l prum iade la jonta dla Lia di Comuns Ladins, metuda adum dal president Bruno Senoner, ombolt de Santa Cristina y raprejentant dla Val de Gherdeina y da autri trei componenc: l raprejentant dla Val Badia, Franz Complojer, ombolt de La Val, l raprejentant de Fascia, Gino Fontana, ombolt de Vich, y l raprejentant da Souramont, Paolo Frena, ombolt da Col.

L element sterch é dessegur sia fondamenta istituzionala
Cie che fej pié via la Lia n pue a pe zot é la mancianza de n liam costant con i conseis di comuns sozes - Tralasceda la ocajion de se damané deplù

N organism de coordinament per garantí unité
Pro l organism de coordinament y de proposta aldò dla lege 482/99 se tràtel dantaldut de n organ che promueve la unité de na mendranza

Foradecà se àn bele dadie fat inant
La lege 482/99 fossa n strument d'utl per corí les loces de sconanza a livel interladin, ma Trent y Bulsan la ignoreia y ne á deguna intenzion de sconé miour i ladins



Per ruvé a chesta composizion dla jonta à jié  n valgunes consciderazions valgamia obietives: i comuns ladins con si ombolc é despartis te trei provinzies. De chestes trei tol ite Sudtirol does valedes con laprò Runcadic che fej pert dl comun de Ciastel, perchel fòvel dret che la presidenza ti spetassa a la provinzia con plu comuns: 9 envers ai 7 de Trent y ai trei de Belun. I ombolc dl Val Badia à atira renunzié categoricamenter a l'enciaria de president. A chesta moda é ruveda la cogola via en Gherdeina, olàche i ombolc de Urtijei y de Selva à dé dant chel de Santa Cristina che à dé pro a tó su l’enciaria vedan ite la volonté dla valeda. Bruno Senoner é n maester dles scoles elemetares con na bona cultura ladina. Al conesc la storia ladina, al l’à pu ensegneda. Dessegur él a una che Fodom vegne con Sudtirol, ence demé bele per i contac che i fodoms à tres abù con la Val Badia. N pue manco gen veidel Ampez y Col per sie lingaz oramai ju a perde y bonamenter per sie orientament plu talian che todesch. Dal cianton economich él plu davert che i autri doi ombolc de Gherdeina y ence enjigné a i tó ite, sce ai vuel propi vegnì con Sudtirol. La dezijion méssei ei tó liberamenter zenza vegnì sforzés.  L fat che al ae feter atira cherdé ite  i componenc dla jonta desmostra ch’al à intenzion de laoré, de realisé valch de concret. Souraldut àl empermetù de volei laoré en équipe, de chirì dandaldut la colaborazion, y chest vuel dì ch’al tolarà en conscidrazion ence les minonghes di autri ombolc y no demé de chi de Gherdeina. Cie vegniràl pa dit y fat te chesta pruma senteda?  Al prum punt saràl la lita dl vizepresident dla Jonta. L orientament pèr che vae sun l ombolt de Col, Paolo Frena, ajache al à laoré ben desche aviadour y cheriadour dla Lia di Comuns, ence per sia  pert tla definizion dl statut dla Lia. An vuel spo dè ence peis a chi da Souramont.
Fascia fajarà la proposta te chest vers. Al secont post vegniràl traté la spartizion dles competenzes anter i membri dla Jonta. Argoment sarà ence la chestion di finanziamenc per sostegnì i laours dla Jonta per cie che reverda l’organisazion dles scomenciadives. Con nia tles mans pòn fé puech y nia. L problem di finanziamenc é samben lié al program di prums laours ch’an vuel mete a jì y les prumes propostes ch’an vuel realisé.
La lerch che ti vegnirà deda a la chestion dl referendum sarà dassen marginala, dessegur nia ofiziala, ajache la cossa é massa emportanta y zitia y perchel ti vegniràla sourandeda a la proscima assemblea de duc i ombolc. Ala ne se trata nia de tema, ma de mete averda.

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.409 seconc