benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Urtijei: tofla a recordanza scouta via i agn dal 1926 enfin al 1945
scrit ai 25 April 2007 da les 19:30:42 da noeles

Gherdeina

 

L comun de Urtijei y sie vuet storich

Sun na tofla a recordanza ai ombolc de enlaouta él vegnù lascé fora l temp dal 1926 al 1945 - L conseier Georg Moroder se damanova na spligazion

Anter les truepes mozions metudes dant al consei de comun de Urtijei da pert dla Lista Ladins, ai 13 de auril 2007, en fòvel una che à da en fé con la storia dl comun, plu avisa l temp fascist y nazist, che é ofizialmenter vegnù sauté sun les tofles de comun a recordanza di ombolc da enlaouta.  Georg Moroder à fat prejent che sun la tofla de legn dur, fata da nuef dant 3 agn y metuda su tl atrium dl comun,  sun chela che ai é ziplés ite y endorés i inoms di zitadins de onour de Urtijei,  en màncel  doi:   Moroder  Rudolf ex-ombolt de Urtijei y n ex sotsecreter dl temp fascist (n cert dot. Marescalchi ) che fova vegnù nominé zitadin de onour de Urtijei l ann 1930 da la consulta  comunala. Enlaouta ne fòvel nia n consei comunal lité sciche encuei. La lista à fat prejent che sce  an ne à nia volù mete su chest ultim, spo messòven avei la coerenza co che ai l'à abuda a Tramin y a Montan olàche l consei de comun ti à ultimamenter retrat la zitadinanza onorara  a Mussolini y a Tolomei. L majer critich a la mozion é sté l conseier Leander Moroder dla Lista Urtijei, plu davert Tobias Dellago che essa vedù dret n referiment a chest temp. La mozion é enultima vegnuda refudeda 4 (Ladins) contra 13 (SVP y Lista Urtijei). Chisc ultims dij, l vuet storich dess resté.

L conseier dla Lista LADINS, Georg Moroder.



"La chestion dl ex-ombolt Moroder Rudolf  che ova dé de revers  la zitadinanza onorara", spliga Georg Moroder, "é da colié a na rejiaria personala  che ova da en fé con  la conzescion da fabriché che l ex-ombolt Piazza ti ova dé a la sozieté "Funivie Seceda"  che passa sun la proprieté dl ex ombolt Moroder Rudolf davejin a la stazion intermesana Mareufer-Furnes. Ma la delibera de nominé l ex-ombolt Moroder Rudolf " zitadin de onour"  ne é ciamò mai vegnuda retrata, na tel delibera ne passessa mai te consei de comun", "perchel ne daussova", va inant Georg Moroder, "l ex-ombolt Piazza nia tó demez l Moroder Rudolf da la tofla, ence sce l Moroder Rudolf ova efetivamenter dé revers la onoranza. Chel ne fova nia auter che na reazion momentana  per n prozes anter la sozieté  Seceda y  Moroder Rudolf, prozes che a la fin fova ju fora en favour dl Moroder con condana dla Seceda a porté dutes les speises giudiziares. Ma per gauja che l ex ombolt Piazza ova  pona relascé empò la conzescion per fé su l emplant a d'acoplament automatich ova Moroder dé de revers la zitadinanza onorara che ti fova vegnuda sourandeda tl 1971 a duc i ommbolc da enlaouta."
"A chesta maniera él encuei does situazions", sclaresc Moroder, "sce  an consulteia la tofla tl atrium de comun él 13  zitadins de onour, sce  an consulteia l archif comunal, pona él 15  zitadins de onour."
 
Mozion dla lista Ladins metuda dant al Consei ai 13 de auril 2007
Te salf dla jonta de comun de Urtijei él bele da za. 10 agn encà 4 retrac de oms de Urtijei che fova en pert entant la segonda vera mondiala y ti prums agn do la vera, vegnus metus a comané l comun de Urtijei: 2 "Reichskommissare" nominés dal Gauleiter Hofer y 2 dal "Prefetto" De Angelis = C.N.L.R.
 
Les prumes does persones a man ciancia é vegnudes metudes da chi che comanova do l 8 de setember dl 1943 enfin a la fin dla vera y les secondes does persones da les autorités che comanova do la vera.
Empermò con les veles dl 1952 él vegnù lité democraticamenter l prum ombolt de Urtijei do les ditatures fascistes y nazistes. Anter l 1926 (dal 1922 enfin al 1926 fòvel ciamò en ciaria l ombolt bera Franz Demetz da Feur) y l 1952, avisa per 26 agn onse abù a Urtijei, co che te duta la Talia comissars che à comané l comun tres n secreter che fova la majera pert na persona de fidenza dl rejim che comanova. Zenza volei chilò jì ite ti meric o defec de un o l auter de chisc comissars, ratonse che al sibe dret recordé a chi che vegn do da nos, cie sort de funzion istituzionala che chestes persones ova soura.
 
Al ne é nia dret ti tramané a chi che vegn do da nos con chedri tachés sun parei de na sala te comun, la minonga che chestes persones é stedes ombolc de Urtijei canche ai ne l fova nia. Chest é na baujia storica. I ne dausson nia ascone via la storia, storia é storia y degugn ne la muda.
 
Perchel fajonse nos la proposta de mete su te sala de Jonta ence i podestàs fascisc´ stés dal 1926 al setember dl 1943, a Urtijei. Sot a vignuna de chestes persones tóchel da ruvé su na picera tofla con na descrizion storica de chestes persones y la enciaria che ai ova. Tl salf de consei él duc i ombolc enfin a Franz Demetz dl 1926, spo màncel dut l temp enfin al 1952. Chilò fóssel da scrive su cie che al é sté te chest temp, al ne pò nia ester sté n vuet de dirijenza comunala.
 
Do 85 agn dal fascism y passa 60 agn da la ditatura nazista ratonse che la populazion de Urtijei ae ben tant de sensibelé de azeté valch dadetel. Nos conseiers de comun on l dovier de jì con l bon ejempl dantfora y reporté la storia coche ala é steda veramenter y no coche valch un volessa che ala fossa steda, tralascian avisa 19 agn de storia comunala.
 
Ti agn dles ditatures talianes y todesces che nos on abù, ne fej la rejoneda nia la desferenzia, comissars fova i uns y i autri, nos ne son nia chilò a i giudiché cie che ai á fat o ne à nia fat, al en fova de bogn y manco de bogn, ma cie che é sté é sté, perchel ései da mete su o duc o degugn y, coche bele dit dessoura, vala de mete su na picera tofla de spligazion acioche i ombolc democraticamenter lités ne vegne nia metus sun l medem scialier di autri.
I conseiers dla Lista Ladins

 
Liams emparentés
· Deplú sun l tema Gherdeina
· Chier te noeles


L articul plu liet te chest tema Gherdeina:
Na festa per n fin de ben


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Urtijei: tofla a recordanza scouta via i agn dal 1926 enfin al 1945 (ponc: 1)
da travers ai 25 April 2007 da les 22:21:13
(Infos sun l utilisadour | Ti mané n messaje privat)
I paisc ladins à abù cotant plu fascisc' y nazisc' che an vuel dé pro aldidancuei. Nia dinrer ne se tràtel nia demé de oportunisc' o de Mitläufer ma de criminai che te autri paisc fossa ruvés te perjon o magari piec. Da nos no, nos son stés duc vitimes dl nazism y dantaldut dl fascism y perchel meritonse respet , unfat cie che i on fat. Chi puec che à abù l snait de auzé l cef contra la ditatura vegn ciamò tres conscidrés sciche de te mec lasarons. Te valch comun végnel metù fora les tofles di ombolc fascisc' y nazisc', ma nia de chi che é vegnus menés te vera sciche freiwillige SS o dant a n comando de esecuzion, magari con la firma de sie ombolt . Cie che conta é la santa pesc, chela di morc ma dantaldut chela di vifs.



Re: Urtijei: tofla a recordanza scouta via i agn dal 1926 enfin al 1945 (ponc: 1)
da MateoTaibon ai 26 April 2007 da les 17:18:38
(Infos sun l utilisadour | Ti mané n messaje privat)
tl comun da Urtijei é plü evident co te d'atri le raport desturbé con la storia. Al foss gran ora da fá n aprofondiment critich de vigne vers, desche al é gnü fat tla Germania (mo püch tl Austria y oramai nia te Südtirol).


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.475 seconc