Lia di Comuns Ladins: sentenda costituenta a Corvara
scrit ai 24 April 2007 da les 19:20:47 da noeles
Lia di comuns Ladins: nominés president y jonta
Prum president dla Lia di Comuns Ladins é Bruno Senoner, ombolt de S. Cristina
Enseira (23.04.) se à abiné a Corvara i 19 ombolc di comuns ladins de Gherdeina (plu chel de Ciastel per les frazions de Bula, Runcadic y Sureghes), de Badia, de Fascia, de Fodom, de Col S. Lizia y d'Ampez a firmé l at costituent dla "Lia di Comuns Ladins" dant dal notar dr. Walter Crepaz.
"Chest é n dì de festa per l popul ladin" à dit dut ligher l ombolt de Col Santa Lizia Paolo Frena, coordinadour dl grup de laour che à enjigné ca l statut dla Lia di comuns ladins. Desche prum president de chest organism nuef él vegnù nominé l ombolt de Santa Cristina Bruno Senoner.
L prum vare che à condut a chest "moment storich" fova vegnù dé ofizialmenter de setember dl 2005 en gaujion de na enconteda cherdeda ite da Durnwalder a Bulsan con duc i dejenuef ombolc dl raion dolomitan entourn al Sela. A la pert fòvel ence l president dl govern de Trent, Lorenzo Dellai. Te chela ocajion él vegnù fora per la pruma outa la volonté clera de mete en pe n organism souraregional che coordineie scomenciadives, ativités y obietifs comuns a ben dla mendranza ladina desche dés dant avisa tl art. 3, coma 3 dla lege cheder nazionala 482/99 a sconanza dles mendranzes. De messel dl 2006 se ova spo i ombolc ciaté a Corvara per nominé y enciarié n grup de laour de laoré fora na proposta de statut con finalités, obietifs y strutura de organisazion dla assoziazion. L statut é vegnù dé pro anter dezember 2006 y merz 2007 da duc i comuns enteressés. Con l at costitutif da enier à la enduneda dé pro l bilanz anual y chel de previjion y chel dles avitités, nominan ence la jonta. Vigni member dla jonta se sourantol na enciaria, ti stan do a valch setour particolar. La jonta é metuda adum da n raprejentant per vigni valeda/raion: Franz Complojer (La Val/Val Badia), Gino Fontana (Vich/Fascia) y Paolo Frena (Col/Souramont), plu l president Bruno Senoner (S.Cristina/Gherdeina). Un di obietifs primars per la jonta apeina enciarieda sarà chel de arjonje n reconesciment ofizial da pert dles provinzies "per ti dé peis y valour a la Lia y al popul ladin che ala se tol dant de raprejenté", à dit Frena a inom de duc. Sun l program él souraprò vedù dantfora la istituzion de na meisa de coordinament durenta con les trei provinzies de Bulsan-Trent-Belun. Bruno Senoner, prum president dla Lia, se à aodé che la jonta colaboreie endretura y che ala se abine a rodul te una dles valedes ladines.
Enier, dant la enduneda, rodòvel la novela che la Lia di comuns essa bele dé pro en chest dì de costituzion n document de sostegn unitar al referendum a souramont per passé da la region Venet a la region Trentin-Sudtirol. Bruno Senoner à sclarì che chest sarà l argoment dla pruma reunion de laour cherdeda ite per en mercui, ai 9 de mei. La logica dij che la Lia di comuns ne pò nia fé autramenter y al pèr che al é bele l consens de chest vers, vuel dì de ti dé plen sostegn.
Enseira (23.04.) se à abiné a Corvara i 19 ombolc di comuns ladins de Gherdeina (plu chel de Ciastel per les frazions de Bula, Runcadic y Sureghes), de Badia, de Fascia, de Fodom, de Col S. Lizia y d'Ampez a firmé l at costituent dla "Lia di Comuns Ladins" dant dal notar dr. Walter Crepaz. 
