Moviment Politich Ladins endò te internet y devers les lites 2008

Willeit: i on tout la dezijion de tó pert a les lites provinziales 2008 - Tres internet vegniràl informé atira y temporif

L moviment politich autonom LADINS à endò sie sit internet. "Enjigné l program y enciarié l operadour scrivaronse ite damprovia nostes noeles, toutes de posizion, propostes, speran che trueps nes vijiteie y feje de bogn comentars.", scriv Carlo Willeit te sie articul de prejentazion. Da Pasca él ence vegnù fora n numer nuef de sie sfuei de partì, mané fora con la Usc di Ladins a les ciasedes tla Val Badia y te Gherdeina.

"Zenza plata internet o posta eletronica someiel da ester fora dl mond dla comicazion daverta y temporiva. Emplù pò raté valch un che an ne sie nia plu dant man o che an ne feje nia plu dret truep sce an ne taca fora sun bacheca demeztroi valch de nuef. L moviment politich autonom LADINS é resté n pez zenza sit internet, ma al ne à mai lascé do te sia ativité , scenoater per sparagné forzes vegnudes cotant mendres zenza raprejentanza politica provinziala y per lascé madorí l temp de reflescion y de reorganisazion dl moviment.

Segurs che zenza n referiment,  zenza na spraiza de na sia identité y volonté politica ne à la popolazion y la mendranza ladina degun davegní, ajache ales tomassa atira endò tla posizion de anonimité y de dependenza de d'autri partis y entnies, desche dant a la entravegnuda di LADINS, y tl medem temp tl prozes de integrazion y de assimilisazion volù y sforzé; segurs ence de n bon sostegn inant da pert dla popolazion y di litadours à l moviment tout la dezijion de tó pert a les lites provinziales dl 2008. Ence per chesta rejon vuel l moviment LADINS endò mete a post sies finestres y sies massaries de comunicazion".

L sit pòn cherdé su a la miscion http://www.ladins.biz