benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Reinhold Messner: i esse plu gen inom Troi desche mie neine ladin
scrit ai 18 April 2007 da les 19:02:22 da noeles

Persones

 

"Ampez pro Sudtirol deida unì les Dolomites"

Reinhold Messner: i son mez ladin y mez sudtiroleis  - Ie son per n referendum - Les Dolomites é i creps plu biei dl mond

Te chestes ultimes does edemes da l'enconda de Ampez de volei endì l referendum per mudé region: dal Venet al Trentin-Sudtirol, él vegnù publiché sun la stampa locala (dantaldut sfueis aunejians), nazionala y enfinamai internazionala n grum de articui sun chest argoment, anter chisc ence na intervista de Adriano Favaro a Reinhold Messner, vegnuda fora ai 8 de auril 2007 tl Gazzettino (foliet beluneis). Reinhold Messner: "Adum con Aunejia é chestes montes (d'Ampez) la majera atrazion dl Nord dla Talia y an davagnassa dancialà, sce ales vegnissa manejedes y reclamisedes miec deberieda". Al é un che s'en capesc fora de creps. Al se à arpizé sciche prum sun l Everest zenza les bomboles de ossigen; y prum tl mond àl arjont duc i 14 Otmile. Y al seghita a laoré "culturalmenter" per i creps; l museum sun l Monte Rite fova sia idea.

Reinhold Messner: ie me sente ence ladin. Ie son con chi che sent la cultura ladina, la architetura, l paisaje ....

 
 


 
Cie nen dijeise pa dl referendum?
I ampezans dij "i son ladins, i on na autra autonomia, i messon nes organisé a valga maniera. An sent chesta vueia de jì demez".
 
Ence d'autri comuns aunejians vuel jì demez dal Venet ...
"Ie rejone di ampezans. De Ampez, tera che é te dut na autra situazion politica y storica. Ence per chest él n cert enteres de mudé poester. Sce ai vuel jì zeruch olàche ai fova n iade, à chest n cert sens. Ie veide aspec positifs y negatifs".

I positifs?
"Amepz, enfin a Col Santa Lizia, audiva pro l'Austria enfin al 1918. Ai fova ladins, sce chest lingaz se desfanta, se desfanta tamben sia cultura".
 
Ma al ne é nia demé chest viadedò ...
"Veir. Tl Venet se sta Ampez ben turisticamenter. Y i ne pense nia che ai vegne a se sté miec te Sudtirol o tl Trentin. Aldò de mia minonga é la vueia de jí demez ence na vertola".

Auter motif ?
"Souraprò ai fatours culturai creii che con Ampez te Sudtirol les Dolomites devente true plu "vendibles" (sen feji n pue l comerzialist) te dut l mond". Les Dolomites é dantaldut ence loghedes sun l teritore beluneis".
 
Cherdeise te na sort de region o provinzia dolomitana?
"Sce les Dolomites deventa n soul raion turistich, pòl deventé true plu sterch, dantaldut te na prospetiva a longia veduda".
 
Te cie temps rejoneise pa?
"Di proscims diejenés. O che i on n turism de pruma classa o che i ne aron nia plu chela fortuna che i on sen: al é puec che capesc ite chest. N doman podéssen avei truep deplù clientela da dut l mond, da la Cina a l'India, venan endertura les Dolomites".
 
Cie vuel pa dì chest?
"Garantí les carateristiches y rencuré la architetura de chesta contreda unica che ti somiova mefotant a Col Santa Lizia da n iade, da oláche al vegn mie neine".
 
Messner con daciasa tles Dolomites?
"I son mez ladin y mez sudtiroleis. Y chesta é ence una dles rejons percie che i son ju tl Beluneis a fé l museum dles Dolomites".
 
Desche sun l monte Rite?`
"I l é fat su per me lié endò a la cultura de mie neine che, con 14 agn, descouz, é ju demez da ciasa ajache al ne fova nia da mangé. Al é ju soura mont via per jí tla val dl Boite. Spo él ruvé entant si viadesc tla America; tla fineda él arciasé y se à lascé ju empruma a Persenon y spo ta Funes".
 
Co òvel pa inom?
"Franz Troi. "Troi" ta Fodom vuel dí "streda" ... al me plajessa deplù avei inom Troi che Messner. Troi dij valch, mia oma se clamova Troi".
 
La pascion ladina ...
"Storicamenter sonsi dla minonga de chi che dij: jon endò con i tiroleisc tl sens ampl dla parola, con chi che sent la cultura ladina, la architetura, l paisaje demarevueia ..."

Con la merca Dolomites?
"Samben. I savon che i ampezans à l muet. Per ei ne él deguna rejon economica de s'en jì. Autramenter podessa ester la situazion plu a sud de Ampez, tla Val dl Boite y tl raion de Santa Lizia. Tles Dolomites beluneises ne se sta la jent nia ben; ai à debujegn de aiut per arjonje n turism desche da nostes pertes, p.ej. chel dla Val de Puster".

Ne ascurassa Cortina nia?
"Nos sudtiroleisc ne on degun problem vedan cresce su raions turistics plu stersc, dantaldut sce i son bogn de nes lié ite a les Dolomites".
 
Tant famouses?
"Do mia minonga nosc ostiers ne à nia ciamò capí ciun che é l gran valour dles Dolomites. Rodan tl Giapon y tla America, sce ie dije che i son dl Sudtirol, spo me díjei "Pu cie é pa chel"? Spo diji: i son talian y i vive tl nord dla Talia oláche al é les Dolomites. Pernanche i dije Dolomites deura la jent i uedli empontaut".
 
Ciuldì pa?
"Al é les montes plu beles dl mond. Ales cherda adalerch milions de persones. Ne nes desmention nia che tl davegnì se fajaràn tres plu ert da fé reclam per n raion turistich. Demé Aunejia/Venezia ne arà nia chest problem".
 
Pertes negatives?
"Al darà ca stritaries, envidies da una y da l'autra pert".
 
A la fin?
"I son dla minonga che tla Talia méssen tres deplù laoré sun l turism: al é l soul paisc europeich, dai "ciapiei glacés" dles Alpes enfin al ciauciagn, a d'avei potenzialités turistiches dret granes".

Marketing dl teritore ..
"L produt plu sterch tl nord dla Talia, adenfora de Aunejia, é les Dolomites. Per chesta gauja vuei les fé deventé n "monument natural dl mond" sot  a sconanza dla UNESCO".
 
Ma al resta l sospet che dut depene dai dinés ...
"Veir. Nosta jent capesc dret ben la venta economica y ne veid nia les prospetives a longia veduda. Ie ti ciale al 2040 y i dije: cie fajonse pa? Chilò ne podaronse nia plu produje valch, degugn odlés, demé design y marketing. Les fabriches sarà tla Cina".

Podaràn fé vegnì adalerch deplù scioram, sce les stredes se empifa?
"Sce al suzed chest messonse mudé y scluje i joufs. Sce d'invern pò trueps schiadours slisolé saurì da na val  al 'autra, l podaràn ence fé d'isté. L turism dles Alpes deventa n suzes olàche l trafich se archieta. Sce les "zones Dolomites" stessa adum (La Ciuita, l Pelf y l Antelao é creps da jalzan biei y ie son rodé lonc y lerch!) podésseles en avei ciamò deplù dancialà. Al ne se trata nia de rejons economiches maben de cultura y de stravardament".

 
Liams emparentés
· Deplú sun l tema Persones
· Chier te noeles


L articul plu liet te chest tema Persones:
Laudatio per dr. Paul Videsott


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Reinhold Messner: i esse plu gen inom Troi desche mie neine ladin (ponc: 1)
da travers ai 19 April 2007 da les 00:04:53
(Infos sun l utilisadour | Ti mané n messaje privat)
Enteressanta la declarazion de Messner ma ala mostra ence na contradizion o confujion: ester mez ladin ne implicheia nia che an pò demé ester mez sudtiroleis. Messner identificheia, desche trueps d'autri, sudtiroleis con todesch, cie che ne stimeneia nia, no con la realté atuala no con chela dl Tirol storich.



Re: Reinhold Messner: i esse plu gen inom Troi desche mie neine ladin (ponc: 1)
da Claudio ai 19 April 2007 da les 09:09:08
(Infos sun l utilisadour | Ti mané n messaje privat)
Messner ne fej net deguna confujion. Defat l coronim "Sudtirol" é do rata nuef, ofizialmenter empermò dal 1972 encà tres l secont statut de autonomia. Enfin al 1918 fòvel la definizion per l Trentin, depierpul che l raion dla provinzia de Bulsan fova scemplamenter "Tirol". Con sudtiroleis mienen encuei dantaldut i todesc, chest é veir y con chest segnificat végnel ence adoré, ence da Messner. I ne creie nience che i ampezans y fodoms se rata a valgamia "sudtiroleisc", ma dantaldut "ladins". Na autra cossa é "Tirol" che fova enfin al 1918 de fat plurilingh, ma i savon duc desche l nazionalism todesch y talian à desdrut chestes potenzialités. I savon ence cie posizion che i ladins ova te Tirol, de fat degun reconesciment, ma vegniva plu y plu vedus devers la fin dl 19eisem secul desche popolazions da germanisé o da talianisé plu debota poscibel (tres scola .....).


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.397 seconc