Na picera indenité per i assessours ence ti comuns sot a 2000 abitanc tl davegnì

Enchina encuei ne podova i comuns sot a 2.000 abitanc nia ti paié fora a si assessours na indenité d’enciaria. Chest dess sen se mudé con na proscima lege regionala che vegn chisc dis trateda tla Comiscion legislativa. Sun proposta dl aconsiadour ladin y vizepresident dla region Carlo Willeit y con l sostegn dl assessour ai Comuns Gino Fontana, él vegnù aproé te chesta comiscion na norma transitoria che ti permet ai comuns con manco de 2.000 abitanc da ti dé a si assessours na indenité, y chest ciamò denant che la Region regoleie danuef duta la materia relativa a les indenités d’enciaria.

La proposta de lege vegnirà aproeda proscimamenter tl Consei Regional. Tl davegnì ne saràl nia plu i comuns enstesc, ma la Jonta regionala che delibereia les indenités d’enciaria y de presenza. L'auteza dles indenités ne é nia ciamò avisa fisseda.