benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Comiscion interregionala: la mozion dl assessour Luigi Chiocchetti
scrit ai 12 April 2007 da les 22:03:25 da noeles

Politica

 

Colaborazion soura les seides provinziales fora

per promueve barac nuefs anter Trentin - Sudtirol - Tirol dl Nord y Vorarlberg

L assessour regional Luigi Chiocchetti ti à mané ite a la comiscion interregionala la proposta de mozion n. 6 che vegnirà touta tres tla senteda "deberieda" dles assemblees legislatives metudes adum da la provinzia autonoma de Bulsan, da chela autonoma de Trent y dal Land Tirol (con Vorarlberg desche osservadour) a Desproch, en mercui ai 18 de auril. La proposta reverda la colaborazion per promueve engiams soziai y culturai orientés a la valorisazion y al stravardament dles carateristiches etniches y culturales dles mendranzes linguistiches.



Desche motivazion dla proposta-mozion végnel dit che la promozion dles comunités linguistiches dla Region Trentin-Sudtirol à na valenza giuridica particolara per les provinzies de Trent y de Bulsan. Ales mess atué l prinzip statutar che preveid "l reconesciment ai zitadins de derc valifs, unfat de cie grup linguistich che ai fej pert y che al vegnirà stravardé les carateristiches etniches y culturales de vigni grup" (chest aladò dl art. 2  dl statut de autonomia). Bele dal scomenciament di agn '80 à l parlament europeich dé pro desvalives ressoluzions a ben di lingac manco rejonés con la volonté de svilupé na politica comunitara te chest ciamp.

Ai 29 de jugn dl 1992 à l Consei d'Europa tout su la "Cherta  Europeica di Lingac regionai o de mendranza" i conscideran n strument d'utl al fin de conservé y de svilupé les tradizions y l patrimone cultural dl'Europa y per sotrissé l dert a adoré i lingac de mendranza tla vita privata y publica. Les mendranzes linguistiches tol ite na pert emportanta tla identité teritoriala dles provinzies de Trent y Bulsan. Ales é n ben real, na richeza che vegn da sia diversité y da n livel ejemplar de convivenza. Ti dé tresfora arta a la promozion dles mendranzes linguistiches é n investiment de valuta per duta la comunité. Apriejoul é l contribut che les mendranzes pò sporje permez a la crescimonia istituzionala, soziala y economica dla comunité. Tegnan cont de chest fat él dret mete a jì dutes les scomenciadives poscibles per renforzé dutes les mendranzes y les fé deventé patrimone de duc, cherian ocajions de comunicazion y de barat anter mendranzes desvalives.
Na sburla emportanta per laoré te chest vers vegn da l'Europa "che troa sie fondament ti prinzips democratics, tl pluralism cultural, tl cheder dla sovranité nazionala y tla integrité teritoriala" desche an pò lieje do tla Cherta Europeica di lingac regionai y de mendranza. Al ti vegn dé cis arta a intervenc de sostegn a organisms interregionai che raprejenteia les mendranzes linguistiches tl cheder europeich. Truepes é les scomenciadives de enc y de assoziazions che atives tl cheder scolastich y dl volontariat, soura confins fora anter mendranzes liedes adum da liams storics vedlors. Dut chest ti permet cis ai joegn de passé i confins con de maioures conescenzes y con poscibeltés nueves de comunicazion anter i popui. Perchel él debujegn che i governs de Trent, de Bulsan y dl Land Tirol laore fora projec de colaborazion per envié via y realisé engiams soziai y culturai. Chestes azions podessa vegnì portedes inant tres la costituzion de n organism nominé dai governs enteressés.
Chesta é la proposta che la comiscion interregionala ti portarà dant a les trei assemblees legislatives de Trent, de Bulsan y Land Tirol abinedes adum:
1.) la assemblea se tol dant de sostegnì y de envié via barac culturai y soziai anter les comunités dles Alpes sun l teritore entourn al jouf dl Brenner tl cheder de na integrazion europeica daidan pro l svilup, la valorisazion y l stravardament dles carateristiches etniches y culturales dles mendranzes linguistiches en atuazion di prinzips de sconanza prevedus dal art. 6 dla Costituzion, dal statut spezial per la Region Trentin-Sudtirol y da sies normes de atuazion y souraprò dai ac dles istituzions euopeiches;
2.) de enjigné ca projec de colaborazion che deide diretamenter a realisé chisc engiams soziai y culturai.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.398 seconc