benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Referendum a souramont: Ampez peia via
scrit ai 09 April 2007 da les 22:27:44 da noeles

Politica

 

Referendum: Ampez peia via

An messarà laoré a dret per informé avisa la jent sun les motivazions dla scomenciadiva 

N articul de  Lorenzo Soratroi

Giacomo GiacobbiAmpez é pié via sun la streda dl referendum per passé sot a Bulsan, na dezijion che l president dla Consulta Ladina di trei comuns, Siro Bigontina, à clamé "storica". Ala é vegnuda touta chisc dis dal consei de comun. Al é l'ultima dezijion dl'aministrazion dl capocomun Giacobbi (Cortina jirà a lites nueves de mei) che ova prevedù sciche prum n assessour a la cultura ladina, l vizecapocomun Bruno Dimai Fileno. La delibera é vegnuda deda pro a l'unanimité y ala preveid ence bele la domanda da mete dant sun la zedola dl referendum: "Voleise che l teritore di comuns de Cortina, Fodom y Col vegne destaché da la Region dl Venet per jì a fé pert de chela dl Trentin-Sudtirol?"
L ombolt de Ampez Giacomo Giacobbi.


     Per Giacobbi se tràtel "de permete n at de democrazia ti confronc di zitadins (les unions ladines, ndr) che se à damané l referendum." A una con la scomenciadiva someiel de ester ence duc i candidac capocomuns ampezans a les proscimes lites. N bon segn ajache a un anter ei ti spetaràl de manejé y de mené inant la chestion. Sen tóchel aspeté che ence i autri doi comuns, Col y Fodom, dae l medem vare. Les deliberes vegnirà spo manedes dutes trei deberieda a Roma per envié via n iter soul, coche concordé tla Consulta Ladina che portarà i trei comuns a lité l medem dì. Da Roma depenaràl ence i temps de atuazion dl referendum che podessa ester bele via per l auton; ma ence plu inant. Frena y Pezzei à bele anunzié de volei traté la chestion al mascim te n meis. "An messarà laoré a dret" spliga l capocomun da Fodom, "percie che n iade che an é piés via ne podaràn nia plu dé outa. De gran emportanza saràl che i promotours dl referendum ti splighe a dret a la jent les motivazions de chesta scomenciadiva. Per nos ne se tràtel nia de chestions economiches, sciche per i comuns de Lamon y de Sovramonte tl Feltrin. Nos on n liam storich che é chel dla cultura ladina. Y chesta arà da ester l'impostazion da ti dé a la chestion."

     Cie peis podaràl pa ciamò avei l ejit dl pre-referendum da dant da 15 agn, canche per n pugn de oujes la popolazion da Fodom ova dit de no a ne volei nience l referendum? "I creie che en chel iade valgugn che ova da tajei à rejoné ence demassa. Al messarà vegnì evité strumentalisazions y an messarà fé na dreta informazion." De pericul de strumentalisazions à rejoné ence l assessour a la cultura ladina dla Region Trentin-Sudtirol, Luigi Chiocchetti, te na intervista a La Usc di Ladins. "Avisa per chest" dij l capocomun de Col, Paolo Frena, "jiràl debujegn che i stonse duc adum." L iter per passé con Bulsan ne sarà nia saurì. Per n iade à i trei comuns metù te gaiofa l "benvegnus" dl president Durnwalder che s'à spazé a clarì empò "de ne volei nia arferé ma nience dé na sburla." La prozedura preveid che al vegne nominé doi referenc che ti stae do a Roma y ciale do a les chertes. Y chisc doi, bele nominés dal comun de Ampez per duc i trei comuns, é Siro Bigontina y Bruno Dimai "Fileno".

     Sun l resultat che la consultazion podarà avei ti trei comuns él dutaorela rie da se desbalanzé. Truep podarà enderzé fora la propaganda che arà da vegnì metuda a jì te chisc meisc da pert dles unions ladines con comités che se tolarà su la bria de splighé y de convence la jent. Per avei suzes ne bastaràl nia che al lite de scí demé la maioranza di litadours de passé da la region Venet a la region Trentin-Sudtirol, ma la maioranza de duc chi che à l dert de lité ti trei comuns (chest é l cuorum). Sce chest suzed ti passarà la cogola a les regions per sie arat consultif. L president Galan à bele anunzié de volei fé "azions clamorouses" contra chesta sciampeda de comuns dal Venet. Ma i trei Comuns y cis Fodom messarà se stravardé da les provocazions y les prescions contrares che vegnirà da ben plu damprò.

 

Noté su  per Vos

 
 

 Referendum a souramont: les posizions nia da creie dla SVP de Gherdeina

 Moviment Politich Ladins veid referendum dassen positif
 Referendum a souramont: scí de Durnwalder y Dellai, no de Mussner
 Referendum a souramont: les unions di ladins sburla
 Referendum a souramont per gní permez a la provinzia de Bulsan
 Referendum - Luigi Chiocchetti: Lamon à gaujes economiches, Souramont à gaujes storiches
 Fodom: na valeda lasceda die sun na pert
 Lamon vuel vegnì con Trent, ma encuei apeina Souramont y Fascia con Bulsan
 Prospetives per n referendum: sen nia l dret moment
 Referendum: Lamon vuel jì con Trent

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 4


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.375 seconc