Informazions turistiches faledes
Sun l sit de www.klettersteig.de vegn Ampez y Fodom metus pro l Friul
- Can che an va enzaul, se làscen sun informazions turistiches: an s'informeia dantfora, conscidreia la geografia y si inoms/toponims - almanco sc'an ne va nia a se lascé praté sun valch spona dl mer. Informazions turistiches é gonot la pruma enconteda che zachei fej con n raion nuef. Les Dolomites é n raion con na cherdeda turistica dret grana, d'isté y d'invern. D'invern àn les masses che se tripa con i schi - si enteresc é limités. D'isté àn chi che va a spazier o a crep: pro chi àn gonot n enteres maiour.
- An á de chest vers na lignola de libri, sfueis y plates internet de informazion. N valgunes de chestes fontanes d'informazion é dret bones, d'autres endò manco. Enscí àn n sit todesch sun les arpizedes a asseguredes.
- www.klettersteig.de
- les informazions sun les arpizedes é generalmenter bones, afibaldes. I posc' vegn dés dant endere con puecia coerenza y puecia arta per l'ortografia. Pro i inoms ladins n'él la maiour pert deguna lerch. Ma chilò va gonot dantfora con n sclet ejempl ence nosc operadours turistics. L gran bech é endere chel dla geografia: Ampez y la provinzia de Belun vegn metus pro l Friûl! Na mail con l'avis dl fal á abù na resposta dret enteressanta: "Wir haben uns die Freiheit genommen, aus geographisch-taktischer Sicht Belluno und Friaul auf einer Karte zusammenzufassen." Con d'autres paroles: an á l cef dur y s'ostineia a mantegnì l fal.
- Plu avisa cie tatiches geografiches che al sie dovia, n'á l team nia dit. Ma sce nos metéssen, per tatiches geografiches, München pro l'Austria o Berlin pro la Polonia? Ala se trata de n fal - capital. Unfat co che chisc sciors la pensa, Fodom y Ampez ne fej nia pert dl Friul. Sun le Ciaulonch met man l Friul? Ignoranza o aroganza? O entrami. Nia informazion, mo dejinformaziun féjen enscí, y aposta laprò. La domanda: can che nos jon enzaul, tant gonot nes végnel pa dé informazions faledes che nos glotiun? (mt)
