Chilò ne vel les rejons dla mendranza nia: chestes rejons vel demé per i todesc. „Minderheitenrechte gelten nur für Deutsche“. Per i ladins dessegur nia, can che ala va de chi ne tegn plu les rejons nia, nia plu derc ne vuelen.

Ma nia demé les rejons dla mendranza ne vel nia, ence la costituzion ne vel nia. La Court costituzionala á bele n iade anulé na lege litala con n lim. Empò vuel la SVP endò mete su n tel lim. Y olàche an ne respeteia nia plu la costituzion, ésen defora da les normes democratiches.

Sciche vertola per n lim lital végnel tres endò porté dant che i ladins pò pu candidé, ence sce al é n lim lital. Ma candidé pò pu ence la SVP a livel nazional, ence con n lim lital: con les listes de Prodi o con les listes de Forza Italia. Empò se para la SVP contra n lim lital a Roma (depierpul che an vuel l mazé tres a Bulsan). N post  per n ladin é asseguré te consei provinzial, chesta la seconda vertola. Ence veir, ma i posc’ per i todesc de Südtirol é ben assegurés tl parlament a Roma ence con n lim dret aut, ajache an á certli litai partis ite aladò y i posc’ assegurés. Redont chisc certli litai ne ti án perauter nia lascé ai ladins.

La Court Costituzionala à bele dit de no a n lim lital, la SVP vuel empò l mete su. Minderheitenrechte gelten nur für die Deutschen.