Valch se muev pro l'université do l intervent de Willeit
Tl program de coalizion per la legislatura 1998-2003 fòvel odù dantfora de istituì tla facolté dles scienzes dla formazion dla université da Persenon n Istitut de ladinistica. Enchina encuei à l aconsiadour ladin y vizepresident dl consei provinzial Carlo Willeit tres endò sburlé do per che chest obietif podessa concretamenter vegnì arjont. L istitut ne é nia ciamò en pé, ma valch se muev do l intervent de Willeit.
Willeit à danter auter bele deplù iadesc ence ghiré la presenza (sciche oduda dantfora dal statut) de n ladin tl Consei d’aministrazion dla université, l’assunzion de personal ladin sciche ence la struturazion dla sezion ladina con personal cualifiché y l’introduzion de drec programs d’ensegnament. Willeit veid perchel l’encunteda danter l assessour Mussner y raprejentanc dla sezion universitara ladina de bon uedl y sciche prum vare tla dreta direzion. Al s’aoda che ence l grup linguistich ladin giate bel plan al intern dla strutura universitara la lerch che ti speta.
