benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Mussner - Chiocchetti: does posizions dassen desvalives
scrit ai 05 April 2007 da les 22:06:18 da noeles

Politica

 

"Laoré adum é l prum obietif"

Comentar a la intervista dl assessour Luigi Chiocchetti sun la USC di 31 de merz 2007

"Laoré adum é l prum obietif". Con chestes paroles descriv L. Chiocchetti sia miscion de assessour a les mendranzes linguistiches dla Region Trentino-Sudtirol. Mia pruma reazion, canche i é liet la intervista, é steda: dietelpaie, finalmenter zachei che rejona politicamenter per ladin.

Foto: l assessour regional a les mendranzes, Luigi Chiocchetti.

 

Luigi Chiocchetti analiseia l LS
Agn-lum dalonc da les posizions dla SVP



 
Per via de sia enciaria s'enteresseia l assessour regional ence a d'autres mendranzes - cie che l deida slarié fora sia vijion, sciche el enstes reconesc – ma l focus dl'intervista é sun la realté ladina te dutes sies dimenjions: politiches, istituzionales, economiches y linguistiches-culturales. N gran peis ti végnel samben dé ai problems de Fascia y dl Trentin, ma chestes realtés locales vegn conscidredes te na cornisc plu ampla, chela dl'unité dla Ladinia. L. Chiocchetti ciala soura i confins de val, de provinzia y de region fora y chier soluzions generales che posse smendré les conseguenzes dla spartizion voluda da Mussolini. Chilò veiden na pruma desferenzia fondamentala con la posizion dl assessour ladin de Bulsan, sciche ala é vegnuda porteda dant tla intervista a la Usc ai 10 de fauré 2007. Depierpul che Mussner é per mantegnì i confins interladins atuai, sostegn L. Chiocchetti almanco idealmenter - ence sce al reconesc les dificoltés pratiches per la realisé - la scomenciadiva de Ampez, Fodom y Col de organisé n referendum per ruvé pro l Trentin-Sudtirol.
 
Rejonan de chestions linguistiches analiseia L. Chiocchetti damprò y zenza pregiudizes ideologics la natura y la funzion potenziala dl ladin scrit unifiché o ladin standard. Degugn ne à mai dit –sotrisseiel - che n fascian o gherdeina mess rejoné ladin standard ma chisc seghitarà a rejoné sie idiom de ciasa. Sun l'adoranza dl standard tl raion de sia competenza, provinzia y region, dìjel dapò: "Canche, desche assessour, ti scrivi a valgugn, ciali de adoré l ladin standard, ajache al me sà la forma plu dreta y adateda, y sce i cogne rejoné con un o l auter ombolt a ousc, adori l fascian". Chesta é avisa la funzion per chela che l ladin standard é vegnù pensé y che é vegnuda spligheda mile outes da chi che se dà ju con la chestion dl ladin unifiché. La posizion dl assessour fascian, che é chela de praticamenter duta la comunité scientifica, é donca agn-lum dalonc da les contraverités spanudes entourn da la SVP "ladina", che seghita a perdiché che la koiné é finamai n pericul per i idioms, la "rejoneda dla oma".
 
La pert plu bela dl'intervista é la conclujion che contegn "in nuce" n program de politica ladina degna de chest inom. Responan a la domanda sce al é n projet che al volessa porté inant te sie mandat politich nes conta l assessour: "A mi me savéssel dantaldut bel de podei ruvé a dé na sburla per na maiour union a livel interladin(…) Per me ne é l'azion de n politich nia demé chela de fé n articul de lege (…) ma ence de daidé recuperé tla comunité (…) l'emportanza de se sentì pert de na comunanza speziala. Sce i fosse bon da assessour, rejonan con la jent, de fé cresce chest sentiment de partegnuda, fossa per me chest plu emportant che fé 10 leges”. Santa verité chesta dl'identité ladina: degun statut y deguna lege de sconanza ne salvarà l ladin sce la jent ne tegn nia adum y ne se identificheia nia te sie patrimone storich-cultural comun. Per ruvé a chest travert él demé una na streda, chela dla colaborazion anter les valedes y sies istituzions. Les priorités de Chiocchetti se desferenzieia ence chilò da la pratica ladina-sudtiroleisa olache la colaborazion interladina, a pert les beles paroles d'ocajion, é plu gonot n fat secondar che n obietif primar de na strategia.
 
Laoré adum é na nezescité tamben per chi de Moena che per chi de Urtijei o de Col de S. Lizia. La coscienza ladina ne é nia n fat da tò ju de scafa ma ala mess vegnì zidleda con azions proatives, ence dal aut; pro chestes auda emprumadedut la promozion de n lingaz comun y unitar, l trat plu fort che amerscia na mendranza etnica. Zenza n liam linguistich sostegnù dal sentiment de fé pert de na medema comunité é i ladins demé na confederazion de bantustans sotmetus a la bona o plu gonot a scleta volonté dles maioranzes etniches y politiches che comana te provinzies y regions.
 
Les leges de sconanza é zenz’auter nezesciares ma ales pò finamai ester de dann sce ales deida pro a renforzé i confins anter les valedes. La desferenzia anter les posizions di doi assessours ladins, prejentedes tles intervistes de La Usc, é duta chilò: Mussner vuel mantegnì i confins interladins y se cruzié demé de “sies” valedes, Chiocchetti se tol dant, sciche prum obietif de sia politica, de laoré adum con dutes les valedes per renforzé l’unité di ladins y dla Ladinia.
 
 
Erwin Valentini

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.368 seconc