Pasca, l moment olàche al met man na vita nueva
Paroles per Pasca de siour Berto Videsott
Nos son tla edema santa che nes fej vedei liturgicamenter la pascion y la mort de nost signour Gejù Crist. Nos savon che Gejù Crist se à ciarié su tant de soferenzes per podei nes fé tó pert a sia ressorezion che é l travert dla bona novela dl vangele.
Pasca é la festa dla ressorezion, dl moment olàche al met man na vita nueva per chi che crei te Gejù Crist, l frut de nosta fede tla eucaristia, tla parola dl vangele olàche al vegn dit: “Chi che mangia de mie corp y beiv de mie sanch y crei a mies paroles jirà ite tla vita eterna”. Pasca é l pont de referiment per nosta vita, n rai, la verité prinzipala dla dotrina cristiana. Chi che se afideia a Gejù Crist, podarà ressorì con el. N jornalist à recordé la Pasca enscila: “L vare da l'assurdité dla crousc al coraje dla ressorezion. Chesta é la realté arjonta da Gejù Crist, che tres sie passaje da la crousc a la ressorezion ti à daurì a la storia n troi nuef, l troi de chel coraje che à tramudé i apostui. Chisc ne n'essa mai abù l coraje de encondé Gejù Crist, sce ai ne l'essa nia vedù y enconté do sia mort. Degugn di apostui ne à daidé Ojep de Arimatea da tó ju Gejù embroncé sun la crousc, duc fova bele sciampés. La ressorezion de Crist à dantaldut varì da la tema si apostui, i à cherdé adum y ti à dé la forza de l testimonié per duta la vita enfin al martire. Gejù é ressorì. Duc canc onse chesta poscibelté de garaté persones nueves tres n proponiment nuef y sterch. N proverb dij: “Chi che se amaleia de Gejù Crist, ne pò nia plu varí da la ligreza”.
