benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

San Martin de Tor: la assoziazion turistica fej bilanz y ciala dantfora
scrit ai 03 April 2007 da les 22:48:06 da noeles

Val Badia

 

L emplant nuef "Piculin" met man da enrede

Reunion generala dla assoziazion turistica - D'isté apriejeien dret i 35 agriturisms y dantaldut les belezes naturales

En venders, ai 30 de merz 2007, à la assoziazion turistica dl comun de San Martin tegnù sia reunion generala. L president, Gottfried Trebo, à fat dantfora na relazion sun les ativités metudes a jì en l’ann passé y spo cheles che an preveid de endrezé via tl ann 2007.  La secreteria Barbara Zingerle à prejenté les ativités dl’assoziazion tres na proiezion power/point.
La stazion a val: con chest emplant portamont à fat San Martin bendebot de saut.


Gottfried Trebo à fat al savei y á splighé en curt cie iniziatives che an preveid de mete a jì tla roda dl ann, plu o manco les medemes che dl 2006: l “Bal dles stries”sun Börz vegnirà trat dant a la juebia, ai 19 de messel. Sun l calender ence la “Festa di Molins”a Lungiaü. Per cie che reverda la manifestazion metuda a jì deberieda a la Ciasa dl Parch Natural de Al Plan de Mareo, se án pensé de mete a jì chesta outa n juech-stomat empede l naturatlon.

La gran novité dla sajon invernala 2006/2007 é a poura sté l emplant portamont nuef “Piculin”che ti à dé bendebot de sburla al turism tl comun. Les registrazions dla assoziazion turistica rejona cler: n plu dl 10,2% de ruvés adalerch y n plu dl 15,4% de souranuetes envers al ann passé: de fauré dl 2007 àn enfinamai registré n plu dl 18,9%. Entratant chest invern à la assoziazion turistica endò laoré adum con la sozieté Antermeia per tegnì davertes la pista dles lueses y la pista de paslonch sun Börz. En plu à la assoziazion metù a jì n servisc de schibus anter Börz y l emplant da Piculin che à funzioné dorata ben. Dretant ben á funzioné l schibus anter Piculin y l’Alta Badia. L president dij de ester sté deplen sodesfat con la colaborazion con la Crontour y ence con l relasc de lizenzes da cueie fongons da pert dla assoziazion turistica. Trebo à spo rejoné dl projet dla rei de trois, “Sudtiroler Wegeprojekt” sostegnù da la UE, che an é tl scluje ju. Clara Erwin se á festidié dla realisazion de chest projet tl comun de San Martin, relevan duc i trois amarscés tres tecnologies modernes (GPS). Chestes relevazions jirà dret de utl per fé chertes avisa di trois da mont. Na novité dl 2007 dess ester la restruturazion dla semena dla “Roda dles Viles”che an vuel pié a mans en chesta aisciuda. L costiment per derturé su chest troi é bendebot aut, ma an rata de podei pié do n contribut da la provinzia y valch ence dal comun. Pernanche an sarà segurs dl contribut, se reguciaràn ite les manies y an jirà al laour. L turism a San Martin se ouj finalmenter al miour, do agn de crisa, à fat al savei l president: da 18.935 ruvés dl 2005 ésen passés a 20.192 ruvés dl 2006 (n aument dl 6,60%). Les souranuetes é judes su dl 5,90%, 5.760 souranuetes registredes en plu envers al ann 2005. Les prejenzes dl 2006 fej fora 103.412. Despassan via les 100.000  souranuetes mess sen la assoziazion turistica endere ti paié valch deplù a la Crontour y al LTS (Landesverband der Tourismusorganisationen Südtirol). L emplant portamont nuef daidarà a poura nia a fé cresce de cotant i entrategns turistics tl davegnì. Na parola ence sun internet che deventa tres plu emportant desche meso de reclam y de informazion aslum. L president á prié i convegnus y i sozes de atualisé almanco vigni 3 dis les ciamenes ledies, informan atira l’assoziazion turistica a na moda che ala posse dé inant les informazions tres internet. Pro l emplant Piculin án pensé de mete su n pont de informazion turistich, na chestion ciamò dla sclarì endere plu avisa. Enultima à l president trat fora ence na autra proposta: chela de fé na semena che conduje da San Martin su dal Ciastel de Tor, senta dl museum ladin, ajache ai sciors ti pléjel cis l panorama y nia demé l museum.

A la reunion à ence tout la parola l ombolt Pepi Dejaco che á tamben laudé l suzes dla sajon da d'invern 2006/2007. Dessegur á l emplant “Piculin” porté pro cotant a mioré les statistiches, ma resultac ciamò plu forus vedaràn empermò te n valgugn agn, ajache l emplant ne é nia ciamò dret conesciù, á dit Dejaco. L comun de Sant Martin é dorata plu conesciù sciche raion turistich da d’isté che d'invern. Les frazions de Lungiarü (n pue demanco San Martin) é doi paisc che vegn dret apriejés per sies belezes naturales (parch natural Puez/Odles, jouf de Börz). Al va debujegn de ti fé conesce al turist les belezes che i on: les semenes, les montes y i creps, à enjonté Dejaco. L comun de San Martin de Tor à en plu la gran venta de avei ben 35 agriturisms che ti pieta al turist che vuel paussé fora dalonc da vigni fracac, na coa chieta y originala. Redont l agriturism é n ram che auda da vegnì reclamisé miec. Ma cie che conta endere veramenter é che l scior vegne traté ben y endretura. Chest é l “socret”de vigni turism de suzes. Sclujan ju à dit l ombolt che al é demé dret y da vedei de bon uedl che la cumpeida de entrategns va su pert, ajache chest va ence a nuz dl artejanat che se muev entourn al turism y che laora empera. Sclujan ju ti à l president dla assoziazion turistica, Gottfried Trebo, ciamò sport n dilan de cuer al ombolt, ai presidenc dles unions, a Heinz Kaneider desche responsabel dla Cassa Raiffeisen, a la presidenta dla sozieté Antermeia/Börz sas Edith Prousch y dandaltut a Clara Nando per les truepes iniziatives che al met dagnora a jì ta Lungiarü y nia enultima a la secreteria dla assoziazion Barbara Zingerle per sies bries.

 

 Noté su per Vos:

 
 Festa di Molins a Lungiarü
 Na iniziativa dla AT San Martin de Tor: la ciaucera ta Tlisöra
 Scì al implant Picolin / Col dl'Ancona, ma a condizions
 Na atrazion nueva sun Börz/Antermeia
 Visualisazion dl lingaz ladin

Liams a d'autres plates foradecà

 


 
Liams emparentés
· Deplú sun l tema Val Badia
· Chier te noeles


L articul plu liet te chest tema Val Badia:
Mareo per i maroi: na Talsprache nueva


Valutazion dl articul
Cumpeida mesana de oujes: 1.5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.376 seconc