Marmoleda: Soraperra tiza la descuscion te consei
Al ti vegnirà mané a Trent n document cler: an vuel l coliament de Fedaia con Ponta Rocia
N articul de Domenico Volcan
 A Cianacei endò postejedes y posizions raidouses entourn a la chestion dl davegnì turistich dla Marmoleda. Mindicé, anter scontredes, comiscions comunales y souracomunales, descuscions y entervenc sun i sfueis, ruva la vedla y vedlora chestion dla Marmoleda tert o adora tres endò tla ciasa de Comun desche al é suzedù a Cianacei endana l'ultim consei de comun de en juebia passeda.L glacier dla Marmoleda sarà ence tl davegnì un di luesc plu segurs da podei jì con i schi. Cianacei vuel avei n coliament. |
Do passa trenta agn de chertes da bol y de milions spenus dai comuns de Cianacei (Trent) y La Rocia (Belun) te n strit legal per i termegn, se festidieien encuei deberieda dl svilup turistich dla Marmoleda con propostes de carater cultural, storich y turistich liedes al mond dl schi y ai portois. Endana l'ultima senteda dl consei de comun de Ciancei él sté la mendranza videda dal arch. Enzo Soraperra
a tizé la descuscion tres na mozion. Al ti vegn damané a l'aministrazion comunala de se fé inant pro la provinzia de Trent per arjonje l coliament anter Fedaia y Ponta Rocia. L plan urbanistich provinzial ne preveid degugn emplanc portamont sun l glacion dla Marmoleda. Da pert de dut l consei de comun de Cianacei ésen endere tres stés a una per n emplant per lié Fedaia con i emplanc da La Rocia su. L problem é dantaldut lié a la conzescion che se ruva dl 2010. Enzo Soraperra volessa che chesta vegne sourantouta dal comun. L comun ne vuel endere nia se ciarié su na tel speisa y ne vuel nience deventé n operadour de emplanc portamont. Do bendebot de descuscions anter l’esponent de mendranza Soraperra y l’assessour Silvano Parmesani à la mendranza mudé ju sia mozion a na vida che l'aministrazion comunala se tol su la bria de ti fé al savei a Trent sia volonté per realisé chest projet de emplanc portamont y de coliament con Fedaia y Ponta Rocia. Te chest document végnel dit cler che l comun rata chest coliament desche strategich y fondamental per vigni svilup turistich dl raion dla reina dles Dolomites, la Marmoleda.
Noté su per Vos:
Publicazion nueva sun la Marmoleda: l glacion se deleiga
