benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Ambasciadour indonesian en vijita a la EURAC
scrit ai 18 February 2003 da les 15:06:54 da noeles

Desvalives

 

356 etnies viv sun na schira de isoles - Interes per la mendranza ladina

 

Freddy Numberi, ambasciadour dl’Indonesia tla Talia, à desmostré sia marevueia per la sconanza dles mendranzes te Südtirol y en particolar per l status dla mendranza ladina. Una dles tapes de sie viade tla provinzia da Bulsan é sté propi l setour de archirida "mendranzes y autonomia" porté inant tla Academia Europea a Bulsan. Numberi, ex Minister per les reformes dl'Indonesia, é n raprejentant dl govern atual che se muev  devers na majera democratisazion y n maiour dezentrament aministratif, n travert scialdi ambizious per chest gran stat insolar tl sud-est dl’Asia con si 210 milions de abitanc despartis sun na schira de isoles granes y piceres, anter chestes la isola de Bali, bonamenter la plu conesciuda per merit dl turism internazional. L stat dla Indonesia cumpeida atualmenter 356 grups etnics, chest é ence l motif  per l interes dl ambasciadour a conesce ejempli nuefs per la soluzion de problems liés a la sconanza dles mendranzes.



Do l sistem istituzional dassen zentralisé che á dominé la strutura statala dl'Indonesia enchin ai agn ’90 pérel che al vegne do ca na fasa de reformes istituzionales y politiches, spliga Numberi: "L slogan dl govern atual é "Union, ma respetan les desvalianzes". L ambasciadour, perauter n cristian dla isola de Papua Nueva Guinea, confermeia che la maioranza dla popolazion indonesiana é de religion musulmana, ma al enjonta ence che "l'Indonesia ne é nia perchel n stat musulman, ma  n stat democratich al intern de chel che al vegn respeté les desvalives comunités religiouses". L stat isolar é ruvé ti ultims temps scialdi te descredit per deplù gaujes: prum per l rapiment de turisc’ da pert de grups de fondamentalisc’ islamics, spo per l atentat de sanch a na discoteca sun l'isola de Bali, che al pér che sie da reconduje a la rei de terorism lieda a Osama Bin Laden.

L president dla EURAC Werner Stuflesser à tout su con plajei l interes dl raprejentant indonesian per la mendranza etnica ladina y al à sotlinié che na colaborazion danter l govern indonesian y la EURAC podessa ester de gran utl y importanza. Enscì daràn vita a n barat danter Djakarta y Bulsan, danter membri dl govern indonesian y esperc. La pruma ocajion vegnirà a se l dé al scomenz dl Master dla EURAC tl ciamp dla sconanza dles mendranzes (Master programme on regionalism and minority protection) chest isté a chel ch'al tolará bonamenter pert ence partezipanc indonesians.

Freddy Numberi ne à nia asconù sie fistide per la crisa irakena, davia che "ben 6.000 indonesians viv y laora tl Irak". A la domanda sun les manifestazions per la pesc tegnudes a Djakarta contra l intervent militar american, à l ambasciadour splighé la posizion ofiziala de sie govern: "Nos son per na iniziativa en basa a les ressoluzions dles Nazions Unides; les desmostrazions ne é nia da entene sciche na touta de posizion antiamericana".


 
Liams emparentés
· Deplú sun l tema Desvalives
· Chier te noeles


L articul plu liet te chest tema Desvalives:
Aiut Alpin Dolomites: sajon da d'isté dant porta


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.356 seconc