La sajon da d'invern é demez, chela da d'isté met man
La APT de Fascia enjigna ca i "pachec turistics" bonmarcé per tré tles montes ghesc' nuefs
La sajon da d'invern é do a finì via ence te Fascia. Do chesta edema pòn dì che la majera pert di ghesc' s'en é demez. Les beles flochedes y les beles pistes podessa endere empò ciamò enzaludé adalerch valch ghest per fé na ultima pizoleda sun i schi, ma al plu tert con Pasca se sclujarà ju la sajon da d'invern.
Coche ala é juda resultaràl plu avisa dai dac statistics dl'assoziazion turistica (apt). Ai sarà argoment de spligazion y de valutazion a la fin de sajon. Dessegur él sté valch pice smendrament dles prejenzes y souranuetes, ajache al é sté na sajon con aboc ciarestia de neif y de scleta publizité da pert di media. La organisazion dl Superski Dolomites se à endere do rata festidié dret ben, enjignan ca pistes ben rencuredes. Trueps ghesc' s'en à demé abù demarevueia. Ai ne s'essa mai aspeté de tel pistes tant ben nevudes ite.
La roda turistica se raida entratant bele inant: apeina che la sajon da d'invern é do ju, laorarà les apt de Fascia bele per endrezé via na lignola de propostes nueves per l'isté, i conescius "pachec turistics", tres plu atratifs. An à da en fé con n turism tres deplù concorenzial che à debujegn de propostes colorides y de capazités nueves per ester bogn da vene sun l marcé.
Per chest isté enjìgnen ca ben sies propostes nueves tres cheles che an vuel tré l uedl dl turist. Chesta outa é chisc i motifs ispiradours: tradizions da mont, cultura, conties y contat con l'anima fona dl'arpejon fasciana. Les propostes colorides se clama perchel: "Cie bel ester en vacanza", "Tu y ti mutons", "Se sté saurì desche a ciasa","Raida dles conties" , "Raida dles conties y dles uties da mont", "Tla tera de re Laurin" y "Da les stales a les steiles". Al se trata de "pachec turistics" bonmarcé che scluj ite tl priesc dlongia l'alberch deplù scomenciadives de entrategniment familiar ententes de arpejon y de colours dla mont. Al é n projet valgamia enteressant tres chel che an vuel viventé l turism da d'isté che à perdù ti ultims agn ence te Fascia damprovia entrategns, bonamenter per gauja dla globalisazion turistica y dles gran poscibeltés de cerne encuei te chest ciamp.
