benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lites provinziales 2008: te Fascia valch en moviment
scrit ai 22 March 2007 da les 20:05:23 da noeles

Fascia

 

La busia dles lites à metù man

Fascia: la "Union Autonomista Ladina" mess poester se mesuré con la "Autonomia Ladina Dolomites" de Emilio Talmon de Cianacei 

L'ann che vegn 2008 sarà ence tla Provinzia de Trent l'ann dles litazions provinziales y samben busia bele l'aparat politich. I partis stadiereia fora les strategies, i liams y i inoms da conduje tla batalia litala. Dlonch él n bel biteboi de scontredes y de laours - entant na outa sot a ega ite - per ester enjignés per l'auton lital dl 2008.

 



Nia da se fé demarevueia: les prospetives de avei tles mans la direzion dla Provinzia de Trent é na motivazion dassen grana per les forzes politiches. Ala ne podessa nia ester autramenter. Te Fascia é la situazion ciamò da niol y duta da sclarì. L moviment storich-politich ladin dla Union Autonomista Ladina (UAL) jirà dessegur a les litazions, ence sce con projec y inoms ciamò nia-conescius: clermenter é l'obietif per la UAL chel de mané endò sie raprejentant tl consei provinzial trentin che posse porté dant les ghiranzes de Fascia, dl mond ladin, de sies forzes economiches, culturales y soziales.
La soula nueva y chela é dassen nueva é n moviment politich nuef con a cef  Emilio "Migio" Talmon da Cianacei che vuel jié chest iade pera tla politica locala. De chest moviment politich nuef che se à dé l inom "Autonomia Ladina Dolomites" (ALD) ne sàn nia ciamò cis truep per cie che reverda i inoms y l program, ma tost, desche al é vegnù anunzié da Talmon, vegniràl endrezé via na abineda publica olàche an podarà conesce miec si programs y les persones entourn a chest grup politich nuef.
Da cie che an à audì tres l portaousc de "Autonomia Ladina Dolomites" él na desvalivanza de vedudes envers a la UAL souraldut entournvia i raporc con Trent. An vuel avei na maiour atenzion a les chestions economiches dla Val de Fascia, an à n projet de na provinzia ladina y/o souraldut l'obietif de podei jí con la provinzia de Bulsan. N descurs dal daite dl mond ladin che va mingul ence contra al Comun General de Fascia. An tol donca fora de lada (ciauzela) ence de vedles chestions che an vuel mete dant tla competizion litala dl 2008. Chest sàn enfin a sen de chesta lista nueva "Autonomia Ladina Dolomites" che podessa ester la novité dles lites 2008.
Te chest cheder réstel da vedei sce les autres listes - la dreta per ejempl -  arà na sia lista locala o sce l moviment politich "Autonomia Ladina Dolomites" piarà su chesta ala, coche al vegn da pensé ja da sen. Ciamò él n cheder tourbl y en moviment. Al someia che les strategies locales y provinziales ae ciamò bendebot de peis sun cie che al suzedarà efetivamenter sun l scachier politich de en auter ann. Defata, desche anunzié da Emilio Talmon, vegnirà la lista "Autonomia Ladina Dolomites" prejenteda te Fascia.
Domenico Volcan.

 
Liams emparentés
· Deplú sun l tema Fascia
· Chier te noeles


L articul plu liet te chest tema Fascia:
Publicazions nueves: biografia sun Tita Piaz


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.376 seconc