benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Politica y istituzions
scrit ai 13 March 2007 da les 19:49:58 da noeles

Politica

 

"L ie n bon moment" che al vegn rejoné tres plu todesch te Gherdeina

Tegnì en pe y amplié les divijions dla Ladinia da pert de Mussolini, n segn che an ne crei dutaorela nia de ester na comunité de lingaz 

COMENTARS: politica y istituzions zidla les divijions ladines voludes da Mussolini
 
I.
Che la situazion dl ladin rejoné y scrit sie scleta, o gonot scletiscima, sun chest ésen duc a una. La desvalivanza de minonghes reverda endere l'ejam dles gaujes y souraldut ciuna soluzion de ti dé al problem. 
.....

Te chestes ultimes edemes àn podù lieje tl sit Noeles.net y sun la Plata di Ladins tl "Alto-Adige-Trentino-Corriere delle Alpi" na lignola de articui y de comentars persoura la cultura y l lingaz ladin. La sburla a la discuscion é vegnuda dal comentar de Erwin Valentini a les paroles dl assessour Florian Mussner dites a La Usc te sia intervista, sintetiseda con chestes paroles: "L ie n bon moment per l ladin". Paroles, dij Valentini, che é dassen en contrast con la relazion dl diretour dla Majon di Fascegn, Fabio Chiocchetti. Ence Lois Trebo à lascé audí sia minonga dijan che da canche Mussner é assessour, é sparis i ladins dal Consei provinzial, n vuet politich total.



..... Edmund Dellago enstes reconesc che l'intendent Verra à rejon canche al dij - bonamenter con n cert artegn - che "l livel dl ladin rejoné ne é nia bon". Ma al ti fej na critica a Verra, dijan che "empede se baudié fóssel miec jì a chirì les gaujes. Al podessa ester che ales sie plu sotes che an miene". Propi Dellago da bon gherdeina y linguist dess prové da les enrescì fora y porté pro a na soluzion dl problem. La chestion ne reverda nia demé Gherdeina, ma dutes les valedes. Vigni valeda à sies rejons particolares, ma al esisteia dessegur na clef per daurì i uedli sun les gaujes generales che reverda duta la Ladinia. Chestes gaujes generales y particolares vegnirà a  lum, sce an arà coscienza d'ester na mendranza che dess vegnì defenuda y apriejeda. Les divijions voludes da Mussolini y zidledes encuei dai ladins desmostra che an ne crei dutaorela nia de ester na mendranza. (ji)

II.

“L ie n bon moment per l ladin” dij l’assessour Mussner.
Ne aràl mo mine miné cie che al scriv te na resposta a na mozion di “Freiheitlichen/Liberai”.
 Mussner: “Obietivamenter méssen dé pro che ti ultims agn rejona endò tres deplù families, dantaldut te Gherdeina, todesch con si mutons, do che ti agn denant podòven audì rejonan plu ladin. Al ne é nia saurì da enrescì les gaujes”.
An sà che a Urtijei ruva la maiour pert di mutons te scolina che ai ne rejona nia ladin. Nience bilings. Clermenter é chest - la sostituzion dl ladin con l todesch bele te familia - n svilup fatal: al desmostra na debleza psicologica che met man tl cuer dles families y che conduj automaticamenter a na marginalisazion y debleza de identité ladina plu tert. Les does ores de ladin a l’edema te scola ne cleca nia a outé chesta situazion. Per Mussner degun problem. Al rejona de "n bon moment".
   La Survey Ladins prejenteda dl 2006 documenteia che l’oposizion al ladin scrit unifiché vegn dantaldut da chi che rejona o se sent (filo)todesch - chilò él unfat sce al se trata de todesc-todesc o de ladins convertis al todesch. Y te Gherdeina é chesta percentuala bendebot auta sciche al vegn confermé da Edmund Dellago: “Sovenz ne vegn l todesch te Gherdeina nia raté na rejoneda folestiera sciche te autres valedes ma na seconda rejoneda che pò gonot ester ence la rejoneda dl’oma”. L problem é a chest pont, sce Gherdeina, bele dassen melsegura te sia identité, desche Mussner y Dellago confermeia, dess tré enfinamai duta la Ladinia te chest "cherzuel" a dì di gherdeines, o sce an dess ti jì permez autramenter a la chestion: ouje i refletours y cialé plu avisa cie che al suzed te Gherdeina. Mussner à te vigni caje na responsabelté, chela de envié via dutes les mesures che renforze la mendranza ladina. Nié l svilup de n standard scrit y la prospetiva dl referendum a souramont per fé pert dla provinzia de Bulsan/region Trentin-Sudtirol é does posizions che ne va danz nia a una con sia enciaria.
(si)

 Comentar a la intervista de Mussner tla USC

Per fortuna él la Consulta per i ladins da Bulsan che fej ciamò conesce n pue l mond ladin portan i scolés dles scoles todesces y talianes a vijité l’Istitut cultural ladin “Micurà de Rü” (IMR) y a valch molins ta Lungiarü. L’iniziativa dla Consulta é dessegur meritoula ence sce ala resta scialdi demé a livel de folclor. Trebo recorda ence les paroles dl intendent Verra: “Con l ladin n’éla nia tant bona”. Na touta de posizion fora de mesura é dessegur chela dl partí liberal todesch dla provinzia da Bulsan contra l’Istitut pedagogich ladin (IPL) che à sia senta a Bulsan. Al à fat enfinamai na mozion tl Consei provinzial, ti scrivan a sie president, Riccardo Dello Sbarba. Bonamenter àl falé miscion dl destinatar dla critica. Poester ne conéscel nia la desfarenzia anter IPL y IMR. L’IPL ne se merita propi nia na tel critica, ajache al fej dles dutes per ti enjigné ca l material didatich a les scoles. N Istitut che laora y che n’á nia dlaorela per reclams, per mostres de vigni sort y autres iniziatives fora de sie program. Tl Istitut végnel studié, an se confronteia con i autri istituc pedagogics per enjigné ca material che sie aladò di temps. Francamenter él rie da dí cie che al vegn fat tl IMR. Tl sfuei “Ladinia XXX-2006” en gaujion di 30 agn dl Istitut scriv l diretour Leander Moroder: “Ie conscidreie l’Istitut cultural plu gen desche n “Dienstleistungsbetrieb” che de en gre via é tres deplù garaté “zur Anlaufstelle für all jene geworden, denen es wichtig erscheint, die von ihnen publizierten Texte und Broschüren in einem einwandfreien Ladinisch erscheinen zu lassen”. Chest vuel dí che l’Istitut fej servisc de traduzion y de comedura de tesc’ per privac, unions y firmes de vigni sort. Dutes ocajions per fé dinés. Ma l statut dl Istitut rejona de n dovei primar: se festidié dla cultura y dl lingaz dla mendranza.

L partì liberal criticheia l sclet ladin ch’al vegn rejoné encerch. Te sia resposta reconesc l’assessour Mussner che ti ultims agn àn endò metù man tles families de Gherdeina a rejoné per todesch, entratant ch’an ova podù constaté ti agn passés n svilup y enteres nuef per l gherdeina. Rie da podei dí ciunes che pò ester les gaujes. Ti comentars a la critica de Valentini a l’intervista de Mussner a La Usc végnel dé dant n valgunes gaujes.

Edmund Dellago miena che la gauja dla progrescion dl todesch te Gherdeina sie la tema che l gherdeina jirà do ju canche l ladin dolomitan giatarà for plu lerch ti media y n doman ence te scola. Chesta é dessegur na gauja fauza, ajache sia realté é ciamò massa dalonc per podei bele sprigolé la jent. La critica de Dellago é souraldut contra l ladin dolomitan.

D'autri veid la gauja dla burta situazion dl ladin d’encuei tla mancianza dla unité di ladins. Ai n’é nia unis y an se fej enfinamai vera anter les valedes. Te chest vers à i gherdeines na gran responsabelté. Enfin a ch’al va inant l’idea che i gherdeines é fondamentalmenter todesc y i autri ladins talians, ne saràl mai meso de avei creta tl lingaz ladin. Al restarà l lingaz dl folclor valeda per valeda y mai chel dla comunicazion. N lingaz zenza fondament, zenza prestije, zenza adoranza. Y te chest vers é Mussner un di maiours responsabli, ajache al laora demeztroi contra la unificazion sozio-politica y linguistica di ladins. La Lia di comuns podarà ester do sia minonga demé n organ aministratif, zenza podei interferì tla politica. (uc)

 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.2
Oujes: 10


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Politica y istituzions (ponc: 1)
da travers ai 14 March 2007 da les 17:44:39
(Infos sun l utilisadour | Ti mané n messaje privat)
Sci, sci, nos podon ester propi contenc con la Partei. Te n comunicat dl Ortsausschuss de Urtijei brava H. Rifesser che l lont à fat truep per i ladins: al à finanié "gosszügig" publicazions, artisc' , scritours y assoziazions de vigni sort. Degugn se damana cie che chestes publicazions vel y per cie che ales é bones. Y F.Mussner se bat contra l ladin standard, chesta "völlig verflachte Einheitssprache" unicamenter per mantegnì y promueve i lingac de valeda (Talsprachen!!!!). L entusiasm per la "rujneda ladina" é tant gran che la SVP "ladina" segita a dé fora si comunicac per todesch. Enscì capesc duc ciuna che é la dreta Schriftsprache di Ladins.



Re: Politica y istituzions (ponc: 1)
da amich_dl_dolomitan ai 16 March 2007 da les 13:50:45
(Infos sun l utilisadour | Ti mané n messaje privat)
Sen éla ben demé plu da rí: vigni dí n comunicat stampa dla SVP de Gherdeina contra l LD - sce al vegniss pu ma n iade ence na proposta positiva, al ben dl gherdeina! Ma tant che la SVP "ladina" ten sul gherdeina, pón vedei sun la plata "http://www.svpartei.org/de/partei/svp-ladina/" sot a "Themen".


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.434 seconc