benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Comentar a la intervista de Mussner tla USC
scrit ai 24 February 2007 da les 19:47:04 da noeles

Politica

 

L'auto-laudament dl assessour

Mussner depenj n cheder de na mendranza che ne sà nience plu cis cie se ghiré

Erwin Valentini"L ie n bon mumënt per l ladin" dij l assessour a la cultura ladina, Florian Mussner, te sia intervista a La Usc ai 10 de fauré 2007. N tel otimism, ence sce an l conscidra demé na sort de dovei d’ofize da pert de n assessour en ciaria, fej n puech de marevueia sce an ti ciala a coche ai la pensa d'autri raprejentanc cualifichés dla cultura ladina. Da chisc auden dut d'autres paroles.

Erwin Valentini



Te sia relazion de fin 2006 se damana F. Chiocchetti, diretour dl Istitut cultural « Majon di Fascegn » con gran onesté iteletuala: «Al é presciapuech doi agn che i nes damanon olache ala va la comunanza ladina, olache ala va la Val de Fascia, cie prospetives che i on tedant per l davegnì. I temps é zenz’auter mudés da canche dut somiova tant cler y saurì: l’aisciuda ladina, l’ester «ladins» (..), duc canc con l medem lingaz (…) Ma sen nes damanonse sce dut chest à ciamò valuta per nosta jent (…) ajache sce (...) «mendranza linguistica, autonomia, lingaz identité, unité» fossa deventedes blot paroles dl passé (..) enlaouta fòssel ben da mudé endrez (…) I ne sé nia da dì sce i son bele ruvés tant inant, ma segnai de chest vers él sauté fora n mudl, tant te Fascia che a livel dolomitan" (cfr. noeles.net, 15.12.2006). Da chestes osservazions critiches trafònel n pessimism fon: l entusiasm, l «élan vital»dl’ aisciuda ladina s’en é jù, la colaborazion anter les valedes é sfadiousa, l’identité ladina vegn gonot demé nuzeda per abiné valch privilegh o contribut spezial, la folclorisazion de cultura y lingaz y dant i uedli de duc. Dant doi agn, do la sepoltura de SPELL y dl ladin scrit unifiché o ladin standard voluda da les autorités culturales de Bulsan fòvel vegnù fat n sforz per ti dé n sofl nuef a la Union Generela di Ladins tres la aprovazion de n statut nuef, la lita de na dirigenza nueva y la pubicazion de n program-manifest nuef, les famouses "Undesc teses per na politica linguistica interladina. L manifest é vegnù sotescrit da inteletuai, ladinisć y jent scempla de mez l mond, ma cie él pa suzedù? La gran festa per i 100 agn dla Union di Ladins s'à destudé via zenza lascé mersces y zenza ti dé, sciche an sperova, na sburla forta a l' azion dla Generela. N gran flop, donca, da mete sun l cont dl dejenteres dla jent ma ence y dandaldut dl dejenteres per ne dì nia boicotaje da pert de truepes persones y organisazions, dantaldut de cheles che é tachedes pro l ciar politich-istituzional dl govern de Bulsan.

Ladin Standard
 Unité: ciacoles é plu de dann che d'utl
 LS: plu saurì da scrive y da capì da duc
 La letra de demiscions da la UGL
 Chestions de lingaz: gramatica ladina
 Assessour ladin o assessour a la cultura gherdeina y badiota?

 100 agn Union Ladina: les 11 teses

 Media Ladins: la minonga de n letour
 Memorandum dles Unions Culturales
 Intervista a Erwin Valentini
 La fam y curiosité di joegn gherdeines
 Ladin: la comedia en 5 ac
 SPELL: la situazion tl 2004
 La ladinité dl 2000
 L prum articul
 Comentar de Fabio Chiocchetti: convegnenza y verité
 F. Chiocchetti fej samben dantaldut referiment a la realté fasciana ma al veid dagnora la realté locala te n cheder plu ampl, chel dla Ladinia. Y chest per na rejon dret scempla: les does realtés, chela locala y chela generala o panladina, é liedes adum, ales forma na unité, ales sta empé o va sot deberieda. Ma co veiden pa la situazion da l’autra pert di joufs? Lois Trebo, una dles persones plu atives tla discuscion politica-culturala ladina, se baudia praticamenter n iade sci y n iade no te si articui dl embastardiment dla rejoneda ladina y chilò mínel dantaldut l ladin dla Val Badia, la valeda che aldò la "vulgata opinio" rejona l miour ladin. Y ence el veid n davegnì per la ladinité demé tl'unité y tla colaborazion : "I Ladins à demé una na poscibelté sce ai vuel souravive: tegnì adum, se lié deplù adum, laoré deberieda soura i joufs fora..." (cfr. noeles.net, 22.12.2005). Na vijion che vegn perauter sotescrita da duc i spezialisć che à na vijion nia folcloristica dla mendranza ladina.

La chestion zentrala é donca chela dla unité y plu avisa, ajache i ladins "se definesc sciche grup etnich tres si lingaz - y demé tres chel" (cfr. O. Gsell, Introduzion a la Gramatica dl Ladin Standard), dla unité linguistica di ladins. Propi chilò stàla mel. L ann 2006 à vedù la nasciuda dla Lia di Comuns ladins, na strutura politica-aministrativa che essa la potenzialité de renforzé y revitalisé ence l lingaz ladin, sciche al vegn desmostré da la situazion ti Grijons. Sceben che al é ciamò n puech adora per critiché y fé previjions, vedonse bele che i comuns se strita sun la varianta ladina da adoré ti documenc ofiziai. Desche an à audì se emponta n valgugn comuns - y i savon duc da cie pert di joufs che ai sta - con piesc y con mans contra l'adoranza dl ladin scrit unifiché o ladin standard, chela che fossa perdret la unica soluzion logica te na strutura panladina. Al fossa ben da rì - o da bradlé - sce na lia che preten de raprejenté na realté sozioculturala unitara dess fora sie statut te 3, 4 o 5 lingac ladins desferenc, consacran enscì endò n iade la dejunité ladina, y chesta outa per dezijion di ladins enstesc y no de forzes forestes a Roma. L'alergia a chest "lingaz artifizial" - definizion rituala dla SVP «ladina» - é tant grana che a Mussner ti àl "sapù na granda che l Chemun de Corvara à fat chësta mudazion de ulëi l ladin dolomitan, can che tla Provinzia de Bulsan iel la previjion dl gherdëina y dl badiot". Iluminanta é ence la motivazion: les dezijions de Bulsan dess avei la souraventa sun les rejons intrinseches dla comunité ladina entiera raprejenteda tla Lia di Comuns.

Sce an liej inant la intervista veiden dapò che l'alergia a l'unité ladina va cotant plu inant. "Ie son per respeté i cunfins dla Provinzies da śën", dìj Mussner, donca la divijion voluda da Mussolini. Ma samben, "noblesse oblige" y da gran signour ne àl nia decontra sce "n sculé vën da Reba ca a Corvara a jì a scola". Per l rest, che ai s'en stae pro Belun!

L entusiasm de F. Mussner é gran y grana é ence l'autolauda de sia politica, che vegn amplieda da la redazion de La Usc con na linia de ben 13 (!) retrac (na reclamisazion mediatica che ti fajessa vegnì l'envidia enfinamai al gran Kim Jong-II dla Corea dl Nord). Sci, an podessa zenz'auter mudé o mioré valch chilò y ilò ma dut adum "l ladin ne va nia dojù" y "l ie n bon momënt per l ladin". Per merit dantaldut dla scola, de sia scola, onse fat de gran varesc inant tl emparé, rejoné y scrive ladin y tl "sentì dl'identità". La dezijion de ofizialisé demé l gherdeina y l badiot é dreta ajache con "chësta doi rujenedes se identifichea nosta jënt". "Nosta jënt" é samben demé i badioc y gherdeines, i autri ne conta nia. Nia da dì, n bel resultat per la mendranza ladina!

Depierpul che d'autri se fej pensiers sun les fondamentes enstesses dla politica ladina atuala y chier stredes nueves per respone a debujegns nuefs, se conténten a Bulsan y enscì ence a San Martin de fé mudl per avei truep da mostré su y da bravé a la fin dl ann. Sce an ti ciala a la lista dles cosses fates y di resultac arjonc che al nes conta su Mussner te sia intervista podéssen veramenter miné che la comunanza ladina se stà ben, tant ben che an ne sa nience plu cis cie ghiré. Se damané l ladin tl Consei provinzial y regional? Ghiranza nia realsitica y dapò "l problem ie che l ne ven nia adurvà" Da chi pa nia? Ma lascion rejoné L. Trebo: «Ala va bele da agn cotant a pe zot - an rejona y scriv y conta, ma de sostanzial per la mendranza él sauté fora bendebot puech o me fali? Dijede ma vos spo - cie derc nuefs à pa i ladins arjont l'ann passé? Sen ciala medret - a mi ne me tomàssel pa ite valch de concret! A dì de bocia plena,(...) suzedù él cotant, ma nia de gran porteda per la sconanza dla mendranza». Y plu inant, fajan referiment a la poltica dla SVP: «I ladins s'à ben paré ite les manies, ma demé per rablené adum oujes al gran partì; chest é ben massa puech per raprejentanc de na mendranza!» (cfr. noeles.net, 4.1.2007).

Degun se damana o se enfida a damané a Mussner cie che al vuel arjonje con dutes chestes ativités y duc chisc scioldi spenus per la mendranza ladina (de Sudtirol). A les domandes dl intervistadour en cont de unité di ladins, majera colaborazion, manejament unitar con regolometazions "positives" stersces con fazion per duc i ladins deberieda, respon nost assessour: "Na vijion ideologica, chësta, dl daunì (…) "N puderà nce realisé velch fajan na politica di pitli varesc. Olà che chisc varesc meina, degun ne sà o ne vuel savei da dì; an se contenta de pié do y spene i scioldi. Duc é contenc enscì y perchel se pieta Mussner logicamenter endò sciche candidat ideal per les lites provinziales dl 2008. I 13 retrac o "pilores", sciche dij i maroi, pités da La Usc al intervisté é dessegur na gran sburla che daidarà nosta jent a arjonje chest travert dla politica ladina, almanco tla provinzia de Bulsan.

Erwin Valentini


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 6


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Comentar a la intervista de Mussner tla USC (ponc: 1)
da Jandaniel ai 24 February 2007 da les 19:21:05
(Infos sun l utilisadour | Ti mané n messaje privat)
A chestes oujes che ne é nia a una con la vijion de Mussner ence l'intendent Verra che dij te n articul sun la USC di 17 de fauré 2007 che "ala ne sta nia dret ben con l ladin", dantaldut nia te Gherdeina, bonamenter ajache al ruva tles scolines y tles scoles tres deplù scolés che ne rejona nience ladin.
Mussner é contra "na unité di ladins", donca contra na adoranza dl ladin dolomitan/standard, ergo ne àl nience na vijion de na comunité ladina, posizions diametralmenter contrares a cheles dla Generela, editour dla USC. Ma a d'el y a la Svp ti dà la USC da agn encà na lerch sproporzioneda, gonot zenza tó posizion o fé n comentar critich dlongia. "Nsciuma" :-) cie suzédel pa?



Re: Comentar a la intervista de Mussner tla USC (ponc: 1)
da travers ai 05 March 2007 da les 14:51:02
(Infos sun l utilisadour | Ti mané n messaje privat)
Les baujies à les giames curtes.
Te sia resposta scrita a na domanda di Freiheitlichen tl Consei provinzial vegn l assessour F. Mussner con dut n'autra storia en confront a cie che al nes conta tla intervista te La Usc: "Allgemein stellt man in ganz Europa einen Verfall der sprachlichen Qualitäten fest. Ladinien ist leider keine Ausnahme (...) Man muss allerdings ganz objektiv feststellen, dass in den letzten Jahren, vor allem in Gröden, mehr Familien wieder daheim Deutsch sprechen, nachdem es in den Jahren zuvor einen gewissen Aufschwung des Ladinischen gegeben hatte. Die Gründe dafür sind nicht leicht eruierbar".
Ma ne fova nia chest "n bon mumënt per l ladin", berba Mussner ? Per se giustifiché tìrel fora la ciacola che te duta l'Europa vàla ju pert con la cualité di lingac. La desferenzia é, sciche el enstes mess dé pro, che no demé la cualité dl ladin ma l ladin enstes perd colpi, dantaldut te sia Gherdeina. Sia afermazion che al é sté ti agn passés n cert "Aufschwung" te Gherdeina é , poester, n "wishful thinking" o plutost n argoment ad hoc per se fé plu bel, ma an mess ester verc - o avei n bon magon - per ne capì nia la gauja dl' ofensiva todescia te Gherdeina. Siei amisc superladins dla Regula y dla SVP "ladina", che se bat da agn contra na politica linguistica unitara per la Ladinia, savessa dessegur da ti splighé les rejons de chest "bon mumënt per l ladin".
Tant credibel é pa n assessour che nes conta verités desferantes aldò dl luech y dles persones che al à dant a el?



Re: Comentar a la intervista de Mussner tla USC (ponc: 1)
da EValentini ai 06 March 2007 da les 17:06:37
(Infos sun l utilisadour | Ti mané n messaje privat)
Ie ne sé nia da olà che F. Mussner tol ca l'informazion sun l rejoné te Gheredeina. Da enrescides privates, da imprescions personales o da valch autra fontana che demé el conesc? Ma unfat co, sce la gauja dla progrescion dl todesc te Ghederina é la tema "che l gherdeina jirà dò ju canche l ladin dolomitan giatrá for plu lerch ti media y n duman enghe te scola", sciche mina E. Dellago, spo él da dì che i gherdeines ne ti à deguna creta a la politica linguistica de sie assessour F. Mussner. Ne é nia sté propi Mussner che se à batù te chisc ultims agn contra l ladin scrit unifiché o ladin standard y à fat aprové dal govern de Bulsan n decret che lascia demé valei l ghedeina y l badiot sciche lingaz ofizial dla provinzia (y dles scoles ladines) de BZ?
Ma a cie moda à pa demé i gherdeines pora che si idiom vae do ju per gauja dl ladin scrit unifiché? Ie ne é ciamò mai audì che i badioc se teme de perde sie idiom per gauja dl lingaz unifiché, trueps ,al contrar, mina che l standard posse daidé modernisé y a donca varenté tamben i idioms che l lingaz ladin en general.
La spligazion de E. Dellago me per ence n puech ad hoc per cie che reverda la situazion ti Grijions. Co fòssela pa sce an aplicassa l rejonament de berba Dellago al todesch te Sudtirol? Jìssel mo su o ju pert sce an ensegnassa p.ej. te scola a Valdaora l puster empede l Hochdeutsch? La resposta vegn poester propi da la Svizra todescia, olà che la jent rejona dlonch si schwitzertüsch ma empara te scola zenza tema l Schriftdeutsch.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.417 seconc