Ampez, Col y Fodom se damana la separazion dai "neoladins" y vuel resté con la Generela - Ence La Rocia é a una
de Lorenzo Soratroi
L’ultima senteda dla Federazion di Ladins tla Region Venet s’à saré via con l’eneisema polemica soura la mudazion dl statut y en particolar sun la chestion dla spartizion di contribuc regionai y dl’adejion a la Federazion da pert dles nueves unions ladines nasciudes tla provinzia. Les posizions tl consei fova cleres: da na pert Fodom Col y Ampez, deberieda con Rocia, che damanova na divijion dla Federazion te doi grups, con plena autonomia de vignun dl vers de chel auter, ence de podei tò ite unions nueves. Da l'autra i raprejentanc dl Ciadoura y dl Comelich che essa volù empruma definì la spartizion di contribuc.
Ite amez i raprejentanc de Alie y Selva de Ciadoura, che volessa mantegnì la Federazion sciche n’assoziazion anter dutes les unions. La chestion grossa spo, resteda sun taula, fova chela de ciapé n critere de spartizion di contribuc regionai, percieche sun la spartizion en doi dla Federazion prest duc fossa a una. Ma cie podessa pa ester n critere dret ? Dessegur no un che tegne cont demé, per ejempl, dla popolazion de n Comun, coche da agn n valgugn pertendessa. L critere dla proporzionalité etnica ne pò nia vegnì apliché a la realté dla Provinzia de Belun, bel coche al vegn fat sot Bulsan, olàche vigni zitadin mess declaré de cie grup linguistich che al fej pert. Decà dai joufs él vegnù definì chi Comuns olàche al resta sens dla cultura ladina, ma a degugn de si abitanc ti él vegnù damané, sce ai é talians o ladins.
L critere messarà spo tegnì cont de deplù condizions; de coscienza, de cultura, ma souradut dla storia che na comunité à, de sia identité ladina. Ence percieche la medema lege cheder nazionala descor de mendranzes "storicamenter tachedes al teritore."
En chisc dis à i raprejentanc dles Unions da Col, Fodom y Ampez, deberieda con Rocia, mené al President dla Federazion, Iji Menardi " Malto", n valgunes propostes de spartizion dl contribut regional. N auter vare spo per cialé de definì na chestion che se tira inant da agn. Al ne é nia l prum iade che i trei comuns se muev per prums, vigni iade che tla Federazion él sauté fora craugnes.
Al fova suzedù dl ’95 con la pruma mudazion dl statut con na comiscion "ad hoc", al é suzedù con chesta seconda mudazion y ades con la proposta de spartizion di contribuc.
Al é cler, y al é ence tres vegnù afermé da si raprejentanc, che i trei Comuns à prescia de definì chesta chestion, per podei avei na separazion dal rest dla "neo - ladinité" y laoré en autonomia, en particolar deberieda con la Generela. Defat te chisc ultims agn él vegnù arjont de gragn resultac per n’autonomia y na consciderazion desvaliva dla ladinité di trei comuns: l prum chel dl reconesciment scrit tla famousa delibera dl Consei Provinzial, l second chel de avei les trasmiscions de TRAIL, l terz chel de avei damané de podei sté ite tla Euregio, l cuart chel de se avei fat reconesce dal Stat Talian de podei avei n Istitut Cultural autonom. Sen aspéten demé l reconesciment dla Generela dapert dla Provinzia de Belun, che da indiscrezions, someia che ae bele abù contac con la Generela de chest vers.
