benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Luigi Chiocchetti enconta i ladins da Souramont
scrit ai 29 January 2007 da les 18:29:15 da noeles

Politica

 

Promueve dut cie che lieia adum i ladins dolomitans

Chesta é la poltica che l'assessour a les mendranzes dla Region Trentin-Sudtirol vuel porté inant entratant sia legislatura

La jent de Col, de Ampez y de Fodom se sent dassen lieda a la comunité ladina entourn al Sela desche i ladins de Fascia, de Badia y de Gherdeina. Chesta audianza é endò vegnuda sotligneda dai raprejentanc de chestes comunités en gaujion de na enconteda abuda chisc dis con l'assessour regional a les mendranzes, Luigi Chiocchetti. Al vuel sen esploré cie an podessa envié via deberieda tl cheder dles competenzes dla Region Trentin-Sudtirol per valorisé miec la mendranza ladina y sia merscia prinzipala, l lingaz. Chiocchetti se à enconté dantmesdì con la direzion dl’Istitut Cultural Ladin Cesa de Jan a Col y con l'ombolt Paolo Frena y domesdì dapò via n'Amepz con la Consulta Ladina, l’ent consultif che abina adum i raprejentanc dles trei amministrazions comunales y dles trei unions di ladins.

La Consulta Ladina pro meisa con l'assessour Luigi Chioccheti.



"Na enconteda die tingeda", desche al à dit l president dl Istitut Ladin Cesa de Jan, Nanni Pellegrini. Al à  recordé i liams storics di 3 comuns che audiva enfin al 1923 pro l Tirol deberieda con la Ladinia storica y la intenzion ferma de vegnì consciderés la terza giama de chel fané a trei piesc sun chel che ence i ladins dl Trentin y tla provinzia de Bulsan sta. L'obietf dl Istitut,  à splighé l diretour Stefano Lorenzi, é chel de strenje la colaborazion con i autri doi istituc. Samben, al ne mancia nia les grovaries, ajache i fonds aloghés tres la lege statala 482/99 é tres plu rers. L'ativité dl Istitut met man da s'en tó na ria. An cioda de messei desmete personal y strenje ite les ativités, sce les cosses se brodola inant enscí. Ciamò plu ert se féjen da canche al é vegnù emplanté l Istitut Cultural di neo-ladins con senta a Bourcia de Ciadoura che tol ite 39 comuns. Chest vegn clermenter trat dant dal assessorat a les mendranzes tla provinzia de Belun. I raprejenanc dl Istitut Ladin de Col rata che redont chisc porte pro a endeblì y desfé su la ladinité storica de si comuns. 

L'assessour Chiocchetti à remarscé i liams storics che lieia adum les comunités ladines entourn al Sela y la emportanza che l'Istitut Cultural tol ite per strenje y renové chisc liams. "Dovier prinzipal dl Istitut", àl enjonté, "é chel de crié coejion y consens  al intern dla comunité y de laoré fora projec linguistics y de comunicazion tl lingaz ladin, ajache al é dret emportant che i ladins rejone sie lingaz anter ei y che ai comunicheie chest tamben deforavia. Datrai manàcel da se deslarié i riscs de omologazion redont dal daite dla comunité ladina". L'assessour à encondé che al cialarà cie che al pò fé en basa a les normatives dla Region Trentino-Tirol per soponté n valgugn projec dl Istitut Cultural Cesa de Jan, lian ite i autri doi istituc, la Majon di Fascegn y Micurà de Rü.

Da man ciancia: Luigi Chiocchetti, Nanni Pellegrini y Stefano Lorenzi.

Via n'Ampez se à l'assessour enconté con la Consulta ladina, l'ombolt Giacomo Giacobbi y l coordinadour Siro Bigontina.  I esponenc ampezans y fodoms à porté dant n valgunes chestions che ti sta particolarmenter a cuer o miec sun l magon, scomencian dal debujegn de aumenté y de potenzié les trasmiscions radio-tv dla RAI de Bulsan che vegn ence enraiedes tl raion beluneis. An se damana dapò che i trei comuns ladins vegne trac ite tl prozes de formazion dla enscidita Euro-region che veid dantfora na cooperazion anter l Land Tirol y les provinzies autonomes de Trent y de Bulsan. Plu avisa fossa i trei comuns dassen enteressés de podei fé pera pro projec de carater istituzional y cultural, promovus a livel comunal y assoziatif. Enultima àn ence aziché la chestion dl referendum per damané la agregazion di trei comuns a la Region Trentin-Sudtirol, per ruvé endò adum sciche ladins sot a na soula region. N tema bendebot zite sun chel che l'assessour à empermetú de se enteressé, fajan endere alsavei che l referendum comportassa na mudazion dl statut spezial de autonomia. Chesta mess vegnì arjonta tres na "acordanza" anter stat y provinzies autonomes. Per cie che reverda la colaborazion interladina à Chiocchetti dit de ester dassen content dla costituzion dla "Lia di comuns ladins" che tol ite 19 raprejentanc dles vals ladines. "Chest organism podarà ti dé unitarité de obietifs y de projetualité a les iniziatives interladines. N vare emportant che la region veid de bon uedl. Chest organism ti conzedarà ai ladins de valorisé cie che i unesc y de mete da na pert cie che i despartesc", miena l'assessour Chiocchetti.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.376 seconc