La politica y l'economia à desdrut vigni liam, sen réstel demé plu l slogan dla SVP de Gherdeina "Tiroler sind wir und Tiroler wollen wir bleiben"
En juebia, ai 20 de fauré, végnel recordé la mort de Andreas Hofer. Aluesc vegniràl fat valch manifestazion per recordé l'aveniment, ma souradut do l burt film soura el, olache an ti met tla bocia esprescions da encuei y an l conscidreia modern ence te sia conzezion dla vita morala, ne nes dij sia figura feter plu nia. Sciode! Almanco per i ladins é Andreas Hofer tres resté n simbol de unité, davia che con el se á batù ladins de dutes les cinch valedes. Mai tant co sen é i ladins da Souramont sciurés sun na pert y desmentiés. La vertola che chisc ladins s'á destaché da se enstesc y che la maioranza de ei ne vuel nia plu vegnì con Bulsan ne giustificheia nia la puecia o deguna atenzion che Sudtirol á desmostré per ei da do la pruma gran vera encà. I gragn scraions "Tiroler sind wir ....", dit pro vigni congres dla SVP a Maran, é sen i piec, ai va contra vigni ideal de unité ladina.
Souradut ne n'á fat nia per ei i ladins de Sudtirol. Les gran manifestazions di ladins per volei ruvé adum é piedes via da fascians y ampezans. Ence ti ultims agn val' pice sbroch te chest vers vegn demé fat da ampezans y fodoms. Almanco pro i ladins te Sudtirol á l'economia desdrut la cultura dla unité. Ultim sclaf é la "delibera".(jp)
