Empegns strategics: na miour istruzion y na miour politica de sconanza
Tl cheder dla enconteda dla jonta regionala à l'assessour a les mendranzes Luigi Chiocchetti abù does encontedes con l sourastant dles scoles y dl Istitut
Istruí endretura la joeneza, stimolé i joegn a d'ester y se sentì ladins. Chest é un di empegns strategics che les scoles y les istituzions scolastiches dess se sourantó. L'assessour Luigi Chiocchetti à rejoné chisc dis con l sourastant dles scoles elementares y secondares de Fascia, Fortunato Bernard y les somités dl Istitut Ladin, la presidenta Mirella Florian y l diretour Fabio Chiocchetti.
Da man ciancia: l'assessour Luigi Chiocchetti, la presidenta dl Istitut Ladin Mirella Florian y l diretour Fabio Chiocchetti.
Te tramesdoes les encontedes à l'assessour sorissé l debujegn che les istituzions scolastiches y culturales se lieie ite pro l'orent Comun General de Fascia che sourantolarà dapò l coordinament dles politiches per la mendranza ladina. Per cie che reverda la scola se à Luigi Chiocchetti aodé che l sourastant ladin enresce valch formes de colaborazion da podei emplanté con la Intendenza Ladina de Bulsan, per se engiamié conescenzes y esperienzes didatiches.
Rejonan con la presidenta dl Istitut Ladin Mirella Florian y l diretour Fabio Chiocchetti, à l'assessour dit che l'Istitut dess ester "la autorité scientifica" tl ciamp linguistich che ti dà na spraiza forta a les politiches linguistiches che vegnirà coordinedes tl davegnì dal Comun General de Fascia. La Region, enscì Luigi Chiocchetti, vuel daidé pera ativamenter aldò de na ligna de projetualité de svilup bendefinida.
