La Region soponta les politiches linguistiches interladines
Durnwalder: demé i ombolc é i drec raprejentanc sibe daitepert che deforavia
"L pericul che la comunité ladina entourn al Sela devente tres plu deslissia y spidiceda su é gran, ma al é encuei ence valch enjigns per la tegnì adum y la defene". Sun chest ésen stés a una a d'aut livel de Region Trentino-Sudtirol. Dantenier é l president dla provinzia de Trent, Lorenzo Dellai, ju su te Fascia deberieda con la jonta regionala tla Ciasa dl Comprensore a Poza. An se à enconté con i ombolc y angugn sourastanc scolastics y culturai. A la pert ence l vize-president Durnwalder.
"La Region s'en tol soura, se fej festidesc y vuel ti dé sostegn a les politiches de valorisazon dles mendranzes y en particolar a chela ladina. Chestes politiches mess encuei vegnì atuedes deberieda anter les does provinzies per lié sinergies y crié n cheder de entervent armonious y efetif". "Nosta priorité", é ju inant Dellai, "é chela de ti dé soponta a les politiches linguistiches per amplié y sauridé la doura dl lingaz te duc i ambienc publics y coletifs. La Region desche istituzion pò jié sie rodul, ma truep depen da la comunité ladina enstessa che mess deventé plu sterscia, crié consens al intern y cresce a na maniera valiva y unitara. De chest vers à Dellai dit de vedei dret de bon uedl la "Lia di comuns ladins" che tol ite i ombolc dles vals ladines dl Venet, dl Trentin y dl Adesc Aut.
L vize-president regional Luis Durnwalder à tamben recordé che la defendura dles comunités de mendranza é n dovei, tant deplù che ence l stat reconesc sie valour cultural. Durnwalder dij "che al va debujegn de sostegnì chi raions dolomitans olàche al é n pericul de despopolament y dl auter vers de sensibilisé i joegn che ai se sente capazesc de ester ladins". Plu inant àl dit che demé i ombolc é i "drec raprejentanc" di ladins sibe daitepert che deforavia.
Luigi Chiocchetti, atualmenter assessour regional a les mendranzes linguistiches, se à aodé che les scomenciadives ne sie nia demé de natura defensiva, ma che ales sie datant da podei se mesuré con les mudazions fones tla sozieté. Chiocchetti à plu inant auzé fora desche vare storich la reforma istituzionala che tramudarà l Comprensore Ladin C11 tl Comun General de Fascia. Al se à dapò aodé che les mendranzes vegne cherdedes pro meisa a laoré pera pro la redazion dl statut nuef d'autonomia, ajache sia prejenza dess ester fondamentala y nia demé n ornament per la autonomia regionala.
