Endò n iade laóren pro la lege litala dla provinzia de Bulsan, en chest iade y desche dagnora, per ti asseguré ai partis che comana valch venta ciamò denant che an vae a lité.  Les propostes é ciamò te stua y ti cefs dla SVP, ma entant de valch él bele vegnù a lum; an volessa destaché l'enciaria da assessour da chela da aconsiadour, lascé fé l'assessour  demé trei iadesc endolauter y proibí da dé fora demassa per la propaganda litala. Che la pert zentrala dla lege sun co che an lita y vegn lités mancia, veiden atira.

Entratant à la stampa bele reporté la minonga dla sezion ladina dla SVP che sona inant la ciampana dla renunzia a valch da nuef per i ladins; l sistem vedl basta y va ben per ela. 

Chilò él una dles gran desferenzies anter la SVP y i LADINS! Per i LADINS adora la popolazion ladina desche mendranza propi sun l ciamp dla raprejentanza politca, chel vuel dí dles lites, truep deplù che che ala à; ala adora n sistem de lita nuef che ti assegureie almanco doi conseiers, n assessour de dert y nia de grazia, en muet da lité plu endret y autonom con n certl lital ladin (desche la Val de Fascia tl Trentin à). Zenza chestes segurtés politiches ne arà i ladins nience autonomia aministrativa che ai adora sun vigni ciamp per podei souravive desche mendranza. Zenza autonomia, i podon ence ti dì capazité y volonté da se manejé enstesc, viv i ladins tla dependenza y sotmiscion soziala y culturala, l creibesc mortal de vigni mendranza. Damané nes messonse, ciuldì che la SVP ne vuel nia se confronté con autri partis y
organisazions ladines sun na lege fondamentala per l davegnì dla mendranza ladina. L M.P.L. é dessegur a una da ne lascé pro degun lim lital, da nia despartí les enciaries da assessour y  aconsiadour, da proibí les gran speises per la propaganda litala, da scurté l temp di mandac politics che se traformeia tres plu y plu da servisc a la jent te na impreisa clientelara de podei y de arichiment.

Carlo Willeit-LADINS