Scizeri: la Procura enresc
Ence i scizeri ladins aficés tl ciar dl neo-nazionalism todesch?
Dant a n valgugn meisc fòvel vegnù prejenté sun chest sit la refondazion di scizeri da Fodom. Al fova vegnù metù dantfora n comentar de avertiment de ne se lascé nia tré ite te n neo-nazionalism todesch che se desleria encuei ti grups de scizeri de Sudtirol. Ala ne va nia demé dlonch de tradizions, de guant da zacan y de derturé su valch vedl anteriuel, ma tres deplù de "Freiheitskampf" con spidic de ideologia de man dreta estrema. Enfinamai i scizeri de Nord-Tirol se à tla fineda sentù obliés da se destanzié en l'ann passé.
Gerd Schultze Rhonhof, istrutour pro i scizeri. Te sie liber scrìvel che "Hitler volova perdret la pesc".
Al ti fova vegnù fat na intervista a un di reladours de chela seira, Günther Obwegs, di scizeri de La Pli de Mareo. Laprò fòvel en chela seira ence Efrem Oberlechner di scizeri de Kiens y aiutant dl maior Peter Piock, i ideologs dl curs nuef sot al inom "Maria Theresia".
L
a "direzion nueva" à scomencé te valch cursc de istruzion con paroles desche: "Kadetten", "Kaderausbildung", "Kaderschmiede" e.i. Segur él che al é vegnù envié n general en pension Gerd Schultze Rhonhof dai Paijes Todesc a tegnì relazions. Al é conesciù per sies posizions de man dreta, de revisionism storich y autour dl liber "Der Krieg hatte viele Väter" (La vera - miné él la seconda vera mondiala - à abù trueps peresc), olàche al ciala de desçiarié la colpa per la seconda vera mondiala y la desfata de Hilter y dl regim nazist sun la Gran Bretagna y la Francia. Rhonhof vegn zité gonot tla "Nationalzeitung", l sfuei di neo-nazisc' todesc. Al dess ester enzai vegnù fat ence "eserzitazions militares alalergia", la Procura enresc, do la levina fata pié via da la "Tageszeitung".
