Floures leterares dl Grijon y dl Friul sun 450 plates
"Flus leterares dl Grijun y dl Friul", poesies tla traduzion de Lois Craffonara, enscì se clama l liber nuef che sarà tost dantman. L volum contegn 117 poesies rumances (dal 1600 a aldidancuei) y 160 poesies furlanes (dal 1300 a aldidancuei) tl ladin dla Val Badia con comentar y n valgunes ilustrazions. L liber à ca. 450 plates y vegn dé fora dal Museum Ladin "Ciastel de Tor" te sie program de publicazions. L dot. Craffonara rejona fluentamenter furlan y rumanc vallader dl'Engiadina y é n gran espert y conescedour de chestes does comunités linguistiches emparentedes a nos. Al sarà perchel n gran plajei podei avei tles mans chesta publicazion nueva arichida con cotanc de detais storics.
Sciche an veid dai mediejes va la leteratura furlana y rumancia cotant plu zeruch ti temps che chela ladina dolomitana. Tl Friul scoméncela dl 1300 canche l Friul fova n stat independent, l Patriarcjat di Acuilee y ti Grijons scomécela plu o manco con la reforma religiousa che sciauda su i anims y che conduj a la traslazion dla Bibla.
Baudi é la publicazion tl ladin dla Val Badia, fosc éssela podù arjonje n maiour certl de jent, sce ala fossa vegnuda scrita tl ladin standard, ma samben ne ti tol chest particolar nia a la valuta dl liber.
La publicazion é vegnuda a s'al dé cun l aiut finanzial dla Fondazion dla Cassa dl Sparagn y dla Lia Rumantscha. L liber giàten al priesc de 20 euro y al pò ence vegnì aposté dantfora al Museum a San Martin de Tor (tel. 0474 524020).
