benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Politica 2006
scrit ai 04 January 2007 da les 19:21:22 da noeles

Politica

 

De sostanzious él sauté fora dret puech tl ann 2006

Valch consciderazions sun la politica "ladina" tl ann 2006 - Paola Bioc Gasser: si comunicac ne dij nia - Hugo Valentin: al à sapù da dì puech

Al s'en é apeina da porta fora l'ann 2006 y bel perchel ti donse na odleda per vedei cie che al nes à porté a nos ladins. Ala va bele da agn cotant a pe zot - an rejona y scriv y conta, ma de sostanzial per la mendranza él sauté fora bendebot puech o me fali? Dijede ma vos spo - cie derc nuefs à pa i ladins arjont l'ann passé? Sen ciala medret - a me ne me tomàssel pa ite valch de concret! A dì de bocia plena: per la politica ladina él sté na sajon destempereda -  suzedù él cotant, ma nia de gran porteda per la sconanza dla mendranza. Plu avisa ves la conti sen, ma nia demé ciacoles. Persones che mesceida tla politica ladina: Bioc-Gasser (SVP), Bepe Detomas (UAL).



1. Sun l'aisciuda adora à ence ombolc ladins firmé la "Petizion di scizeri" che damanova che la autodezijion per Sudtirol vegnissa metuda tla Costituzion dl'Austria che é tl laour da vegnì adateda al temp da encuei. Chesta cherta à fat levé su cotant de stuep anter i talians. An à pu nia dadie audì da lafora ite che n Tirol unifiché fossa encuei na utopia, massa truepes desvalianzes bele anter Sud- y Nordtirol: chi da chilò é bele massa talianisés per chi da lafora y usés ite a la vita sot a la Talia che ti à conzedù na autonomia ampla acompagneda da mudli de dinés; chisc ti à delot l cef a la jent y perchel pénsela demé plu a la economia, al fé roba, a vegnì tres plu rica. L'identité ne conta nia plu tant, medret che an ae la punza plena; enscì la pensa pa la gran pert. I ombolc ladins essa audì da pensé soura cotant denant che firmé - cie volessa pa dì per i ladins na autodezijion? Dut valch d'auter che per i todesc.

2. Che i 18 ombolc ladins é stés bogn sun sburla da pert de Durnwalder  da se mete adum y da crié n statut per na " Lia di comuns ladins" é na gran bela cossa, ma l laour da fé vegn pa permò. An spera che chesta iniziativa deide lié adum les valedes ladines cotant deplù per envié via na politica deberieda che ti porte a duc i ladins i medems derc o - sce al fossa la volonté - da ruvé adum desche dantdavìa. Chesta lia damanarà conseis y colaorazion da les lies culturales, a cheles che la situazion nia demé culturala di ladins ti é dagnora steda a cuer.

3. Da d'aisciuda él sté les lites dl Parlament talian; per chest aveniment à la SVP sclut n contrat con la lista de man ciancia per daidé do che Prodi vegnissa l cef dl govern. Te chesta cherta fòvel apeina valch per i ladins scemia che la SVP perdica tresfora che ala defen i ladins. A cie fosa ne ti féjela pa nia avei ai ladins chi derc che ti mancia dutaorela? I ladins s'à ben paré ite les manies, ma demé per rablené adum oujes al gran partì; chest é ben massa puech per raprejentanc de na mendranza! Baudi che l candidat fascian Bepe Detomàs ne l'á nia plu fata da ruvé tl Parlament, ma l scagn tla Comiscion di 12 s'àl tegnù. Detomàs tegniva dut da la SVP a Roma y per i ladins da Bulsan n'àl mené nience n deit.

"
I ladins s'à ben paré ite les manies, ma demé per rablené adum oujes al gran partì; chest é ben massa puech per raprejentanc de na mendranza!
"

4. Da la gran enduneda dla SVP s'à Pepi Deiaco fora de nia retrat da la enciaria da vizesourastant dla SVP,
n post che ti speta a n ladin; al é vegnù regosé da Paula Bioch; ala mess desmostré da arjonje valch de concret; si comunicac stampa dij puech. I ne son nia vegnus informés sun cie che Pepi Deiaco à fat per i ladins desche vize dla SVP. Jì a sentedes lonc y lerch é massa puech, cai é pa i fruc? Al á dessegur arjont che al vegne fat l'implant portamont da Piculin contra i bonarac de comiscions per la sconanza dl ambient; la stazion a val adum con d'autres costruzions é sun terac de Deiaco. Ence tles does valedes ladines él vegnù mudé fora l sourastant de val dla SVP - tla Val Badia é Franz Complojer vegnù regosé dal arch.Christian Agreiter d'Al Plan y te Gherdeina à la prof. Bauer sourantout chesta enciaria, na ela de Puster marideda a Urtijei. Al é da speré che chesta muda de enciaries politiches endespre plu enteres pro i responsabli per arjonje chi derc che ti speta ai ladins. Speranza pòn avei ti joegn dla SVP, davia che i vedli é bele scialdi enrujés ite te na mentalité sourapasseda. Chisc joegn é pu chi che se damana con forza che i mandac dai politics posse demé duré 15 agn.

5. Da d'auton àn recordé i 60 agn dl Contrat de Paris. Enlaouta ne fòvel sté nia da en fé per i ladins, i talians n'ova nia abù oredla. Bele denant che jì a Paris fova i ladins endò vegnus partis su te trei provinzies (dal 1943 - 45 ài fat pert dla medema aministrazion - Operationszone Alpenvorland) sun sburla de Degasperi. Chest ova ence a Paris bloché les ghiranzes dl'Austria che i ladins ruvessa pro Tirol y che ai giatassa cerc derc. Da la festa de recordanza ai prums de setember a Bulsan à Hugo Valentin sapù da dì puech sun les conseguenzes dla mancianza di ladins tl contrat. Per fortuna é i politics dedò stés bogn da i scassé fora a Roma l reconesciment dl grup etnich ladin acompagné da n valgunes competenzes sun deplù ciamps emportanc.

6. Tl ofize de cultura a Balsan à metù man da laoré dr. Alex Piccolruaz da Corvara, emplié dla provinzia bele da cotant d'agn. Al à studié storia a Desproch. Chest ufize à na gran porteda per la cultura ladina, enlò végnel tout dezijions emportantes per partì su i scioldi a les lies culturales ladines. A cef de chesta partizion é dr. Alexander Prinoth, ex-diretour dla scola auta Rezia de Urtijei. Pro chisc doi él da mazé a porta sce na union adora brojes da laoré per l ben de sia jent. I scioldi é y perchel stala demé coche ai vegn partis fora, a cie che an ti dá plu emportanza.

7. Nia de pices rejiaries n'él sauté fora anter la Generela y cerc membres dla SVP, en pert gaujedes da na cherta melentopeda dl sourastant y toutes de posizion massa basedes sun un n taier dla stadiera. Lies culturales n' à nia da tegnì da partis, ma dess fé politica apartitica enfin a che i partis che comana ne fej nia enstesc na bona politica ladina che vae ben per duc i ladins dles Dolomites. Degun partì ne po ti tré dant a lies culturales che ales fej politica culturala; ales é sforzedes, sce chi che é cherdés se lascia do fora y sta bel comot sun i scagns plomacés, ben paiés. Na ousc critica fej ben, ala endespra chi che dorm y ti dà da capì che al é ora da mené i zocui y da laoré per l ben de chela jent che ti à dé la ousc.

8. Al é da agn tradizion che Desproch partesc fora via per l' ann deplù sortes de medaies adum al diplom. Vigni iade ciafa ence valch ladin na tel onoranza da pert de Tirol. An auda feter vigni outa brontolan y critican che al vegn cialé massa al colour politich dles persones dedes dant per l'onoranza. An ne sa nience cie meric che un mess avei per fé pert de chisc premiés, chi che po fé propostes, chi che liej fora i candidac. A duc él da ti consentì onoranzes sce ai se les merita. Ne fóssel nia dret, sce i premiés tolessa chestes medaies da certes festes empede les lascé dut l'ann vegnì da stuep sun valch scafa? Sce un à bele pié do ne se daudaràl mine da mostré sia onoranza al publich?

9. Con l'ann nuef 2006 à Catarina Tasser da Antermeia metù man sia ativité a Roma tl ofize dla Provinzia de Bulsan do che ala ova davagné l concurs. Funzion de chest ofize él da tegnì l contat anter Bulsan y l govern da Roma, n laour dret emportant y che se damana na certa diplomazia y competenza. Tl medem ofize laora n'autra ladina bele da plu agn, Marisa Bertoldi de Badia, marideda a Roma. I ti aodon a chestes does ladines che ales sie bones da arjonje cie che an s'aspeta da eles y che i ladins posse ence en aprofité per arjonje deplù per sia jent.
 
10. Doi paisc ladins à l'ann passé metù su na compagnia di scizeri - Al Plan y Fodom, i doi paisc de Tarina Lanz - tl prum éla nasciuda, tl secont éla morta y vegnuda sepolida. Sia fossa a La Plié de Fodom é vegnuda dertureda su dai scizeri da La Pli de Mareo. La funzion di scizeri n'é encuei nia tant chela da defene nosta tera con ermes, ma da tegnì su na vedla tradizion che nosc vedli nes à tramané; souraplù se festidieia i scizeri da derturé su patuc sacral - ciucs/ anterieui, capeles, ancones, autés, confalons, monumenc ai tomés de vera, descorì la storia di antenac, tegnì alaut les usanzes y tradizions, ma dantdaldut l lingaz ladin che é la pera de cianton dla popolaziun ladina. Sun la bandiera ladina di scizeri déssel svaté l'inom ladin de sie paisc. Gran merit podessa i scizeri se fé sce ai cheriassa n "raion scizeri ladins" zenza messei i sté sot ai gran vejins; con chisc laóren adum, ma empruma ésen autonoms sun sies giames.

11. L pont plu debel di ladins é ben chel da volei fé scioldons con vene fora terac, apartamenc y ciases a jent foresta per se enciarnacé ite tla Ladinia. Al é bele true demassa folestiers che à chilò n sie cuartier y deplù; demé tla Val Badia él 1.250 apartamenc te mans forestes, l 90% talians. Chest fat peisa sun la identité ladina, al é n pericul per la mendranza enstessa che perd peis, prestije y simpatia; no ma ti zentri (bele massa ciariés), ma bele fora per les viles dla valeda s'à jent foresta compré ite desche a Seres, Freina, Pescol, Burjé, Sotrù, Pelegrin, Prousc, Mirì, Frenademez, Ciaminades, Craciorara, Fistì, Granpré, Martara, Predevì, Boscdaplan, Agà, Ninz, Les Corceles, Funtanacia, Sotsach, Runn, Runcac, Marin, Frena, Paracia, Soplà, Ruac, Janin, Merscia, Morin, Pecei, Rütort, Valiares. Chesta situazion desmostra che massa truepa de nosta jont à venù demassa ai folestiers, dut demé davia che ala davagnova ben. Enscì él da nosta jent vegnù mené su i priesc dl frabiché, di cuartiers che truepa de nosta jent ne po nia plu se empermete da fé o de compré. Bele compré l sedim i desboursa dut nia demé al laorant! Dessegur essa i comuns podù daidé arferé chesta situazion tant melsana per duta la Ladinia. Chela jent che à venù patrimone de fonz ai folestiers o ven fora sie sotet à perdù la coscienza morala per daidé mantegní i paisc, les valedes tles mans di ladins. Al é demé da speré che al sie sen na fin con chest marcé dal diau che rovina nosc paisc con i enforestì ite; chest svilup ti tol ai ladins pertes de sies viles, de si paisc, de sie lingaz, de sia cultura. N'essa mo nia Balsan podù strenje ite tres leges l vene fora raions deplen a persones che n'à nia da chirì no da fé con la jent da chilò? Desche ghesc' tles ciases de nosta jent é vigni forest benvedù, ma nia desche patron de viles y de apartamenc.

12. N struf dant Nadel à la Athesia dé fora n liber dal titul " Weil das Land sich ändern muss.Denkanstösse " . An ciafa laite 20 articui scric da persones competentes. Ales se fej pensiers sun l svilup de Sudtirol tl davegnì sun l ciamp economich, sozial, cultural, sanitar. Pro chisc 20 él ence l ex-ombolt da Corvara Heinz Kostner con n articul sun l davegnì di ladins, co che l ciamp economich - cultural - etnich dess se svilupé, cie che al volessa ester per tegnì i ladins en benester cultural - politich. Lieje chest liber met duc da pensé a cie che ne va sen nia ben y co che ala podessa jì miec.

Lois Trebo


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.381 seconc