benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

N standard scrit é na conditio sine qua non
scrit ai 30 December 2006 da les 18:35:02 da noeles

Ladin Standard

 

Cathomas: l suzes dl standard ti la stica a dutes nostes aspetatives

Intervista a Bernard Cathomas, encuei diretour general dla Televijion Rumancia, sun i svilups dl standard scrit rumanc

Vos fovais enlaouta un di pioniers  dl standard rumanc, l Rumantsch Grijon (RG). Ves scúsel pa co che la chestion se à svilupé inant?
Bernard Cathomas:
ie fove iniziadour dl projet y i ti son sté do die a la longia. I mess dí encuei che i svilups ti la stica enfinamai a dutes les aspetatives che nos ovan tl meteman. Per merit de chest standard scrit unitar é nost lingaz encuei lingaz ofizial dla Confederazion svizra. Tla aministrazion ciantonala végnel doré conseguentamenter. Deplù comuns dl Cianton Grijon à tout la dezijion de introduje l RG te scola. Al à samben descedé n grum de emozions - y en desceida dutaorela - ma al à fat vegní ledies n grum de energies positives. Al é la miour prova che nosta picera comunanza linguistica é tant vitala y busienta che ala pò ence se vaighé de gran inovazions. Truep de cie che nos vedon encuei desche normal y produtif ne podessanse nia nes imaginé zenza lingaz scrit standardisé, www.rtr.ch o www.pledarigrond.ch, é demé doi ejempli de cie che na mendranza pò arjonje tres forzes unides.

Bernard Cathomas, diretour general dla RTR (Radio y televijion Rumancia)

 



Ciuldì é pa n lingaz scrit unitar tant emportant?
Bernard Cathomas: dantaldut per does rejons. Sciche prum: al deida arjonje na identité soura-regionala y deida ciolé adum les forzes; sciche secont él dret emportant per aministrazions zentralisedes che doura n lingaz regolarmenter. Sciche terz: pro de piceres comunanzes de lingaz màncel i mesums finanziars y personai per crié formes standardisedes desvalives. De rest: pro comunanzes linguistiches àn de regola deplù variantes rejonedes, ma demé una na forma scrita. Nia per ultim desmostra na comunanza de lingaz de ester  vitala y inovativa, sce ala se embasta l'am de introduje n lingaz scrit unitar.


Cie ciamps de aplicazion nuefs à pa l RG daurì?
Bernard Cathomas: demé tres na forma scrita unitara él sté meso de arjonje a la fin di agn '90 lingaz n reconesciment parzial de ofizialité a livel de stat svizer. Chesta posizion giuridica nueva à delout trueps svilups. Leges emportantes, decrec y e.i. vegn sen metus ju te RG. Enscí se renoveia l lingaz demeztroi. Truepes oures nazionales, p.ej. "ARS Helvetica" (storia dl'ert te 12 volums), l "Lexicon Istoric" (verscion rumancia dl lexicon svizer), la "Istorgia grischuna" podova demé vegní realisedes ence tl lingaz rumanc te na forma scrita unitara. Atualmenter sonse do a enjigné ca mesums d'ensegnament per les scoles elementares. En general tegn cont encuei cotant deplù istituzions y impreises dl rumanc, dlongia i autri lingac, cie che ales ne essa danz nia fat, sce nos restovan inant spidicés te idioms. Cie che la aplicazion dl RG à fat pié via vegn documenté a na vida imprescionanta dal "Pledari grond", na gran banca linguistica che tol su damprovia lems nuefs y i desleria tres internet. An ne dess nience sotsciazé i trueps sic internet da archirì tres Google (perauter à Google ence na verscion te RG http://www.google.com/intl/rm/). Zenza RG ne éssen naine podù realisé na verscion rumancia de MS-Office con i coretours ortografics dla Microsoft laprò.

"
Cathomas: na comunanza de lingaz desmostra de ester  dassen vitala y inovativa, sce ala se embasta l'am de introduje n lingaz scrit unitar
"
Rumanc ne é nia demé na mendranza, ma ence n lingaz con n rai restrent. Ne resulteiel pa da chesta situazion nia debujegns che mendranzes con viadò sies sciables nazions-oma ne à nia?

Bernard Cathomas: samben, sciche lingaz mender mess i rumanc crié y se mete adum dut enstesc, ai ne pò nia importé produc linguistics. Chesta é na endesfida dassen grana, ma ence na poscibelté de prospetives nueves. Al nasc lercs creatives per trueps. L laour pò endere demé garaté, sce les forzes vegn conzentredes y ne vegn nia spaterledes via. Al suzed gonot che maioranzes tiza dejunions tla mendranza per la endeblí.


Ciunes é pa les prerogatives nia-renunziables per l souravive di retoromans y de autres mendranzes de apresciapuech la medema grandeza?
Bernard Cathomas:
  dant agn ovi trat adum les prerogatives te 7 ponc che fossa:
1. n sie raion de lingaz, 2. te chest raion linguistich méssel ester na economia sana, 3. doré l lingaz con conseguenza te duc i ciamps dla vita publica y privata (familia, scola, gliejia, politica, aministrazion y e.i.), 4. na forma scrita unitara doreda y reconesciuda a livel souralocal, 5. Mass-media a la auteza (radio, tv, stampa, multimedia), 6. la desponibelté de ester bilings o trilings da pert dla mendranza 7. n convive en pesc con les maioranzes. Chestes prerogatives pò vegnì arjontes te mesures desvalives, sce ales mancia endere daldut, spo éla scleta.

Intervista: Mateo Taibon.
 

Ladin Standard

· Tema: Ladin Standard
· articui endut: 78
· letures endut: 32519
  N standard scrit é na conditio sine qua non
  Gherdeina y l standard scrit
  Ladin dolomitan – ladin standard: retrospetiva y prospetives - V. pert
  Ladin dolomitan – ladin standard: retrospetiva y prospetives - IV. pert
  Ladin dolomitan – ladin standard: retrospetiva y prospetives - III. pert
  Survey Ladins: convegn a Trent-Vich
  Ladin dolomitan – ladin standard: retrospetiva y prospetives - II pert
  Fascia: Convegn Survey Ladins
  Ladin dolomitan – ladin standard: retrospetiva y prospetives - I. pert
  Cherta d'identité per ladin: SVP vuel tegní en pe la despartizion
· deplù -->  


Grijon

· Tema: Grijon
· articui endut: 21
· letures endut: 4759
  Svizra: n 40% dla popolazion grijona capesc rumanc
  Rumantsch Grischun te scola sen realté
  La Quotidiana, l sfuei da vignidì ti Grijons
  L Pledari Grond da puec dis te internet
  Radio Rumanc: coche l radio amplieia sie repertore musical
  N canal nuef per la tv rumancia
  MS Office empara Rumanc Grijon
  Televijion Rumancia: mudeda d'orar y ampliament
  Dai Grijons: na scola paritetica
  Dal 2005 inant vegn l rumanc standard ensegné tles scoles
· deplù -->  


 
Liams emparentés
· Deplú sun l tema Ladin Standard
· Chier te noeles


L articul plu liet te chest tema Ladin Standard:
Dal latin al ladin: storia dla evoluzion dl lingaz ladin


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: N standard scrit é na conditio sine qua non (ponc: 1)
da MateoTaibon ai 02 January 2007 da les 20:11:59
(Infos sun l utilisadour | Ti mané n messaje privat)
ara se trata de na pert de n'intevista plü lungia che gnará publicada tl numer söla Ladinia dla revista "bedrohte Völker - pogrom"

http://www.gfbv.de/pogrome.php




News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.393 seconc