benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Esposizion tl Museo Ladin de Fascia enfin a auril 2007
scrit ai 21 December 2006 da les 22:45:56 da noeles

Cultura

 

Les pitures de Beppino Soraperra, l rossagn dles Dolomites

Al ti cialova duc i dis a les Dolomites, dantaldut al rossié di creps, cialan de pié sun teila chi atims canche les pizes se entenj

“Chisc  creps  me trasmet truepa gheneda y chesta gheneda vuei depenje zenza preconzezions y zenza retorica. Al cleca n dí per savei da entene certes emozions y depenje spo n cheder, samben ne él nia saurì, ma dessegur nia valch che an ne derza nia fora. Tla ert él una na cossa soula essenziala: avei zeche da dì.”


Chestes fova paroles de Giuseppe “Beppino” Soraperra (1912-1985) con cheles che al descrivova sie stil da depenje. El ti cialova vigni dí a les Dolomites che al ova arpizé desche meinacrep, ma ence con taulin y peniei, per fermé sun teila sies lumes, chel atim danterores can che les pizes se entenj dal rosa al arance plu da fuech: l rossié di creps, l rossagn dla doman y dla seira, o la “enrosadira” che an dij.
 
Dal 15 de dezember 2006 pòn vedei tl Museo Ladin de Fascia a Vich na cerna de oures dl pitour tla sala dedicheda ai temps moderns, belau desche encoronament dl troi che conduj da la “descorida” dles Dolomites da pert de geologs y botanics, tres l orì dl turism y dl alpinism per ruvé al enscidit revival ladin, la redescorida da pert dla jent fasciana de sies origines y de sies tradizions. Te chest cheder se logheia ite la oura de Beppino Soraperra y sia perzezion dla natura entournvia: na enconteda emozionala, fata de contrasc’ y de sproms en aiet, ma ence de pesc y de gheneda, de albes enciantedes deslanch les pizes corides de neif y de florides de soredl endoredes, plenes de colours scraienc.
Anter si depenc metus fora, touc en pert da la colezion dl museo y en pert da privac, ti la stica les pizes dolomitiches con duta sia maestosité, ma aboc láscel endere ence antervedei sia autra anima, chela manco conesciuda, chela fona, intima y trafonuda da scufs da vigni dì, desche an veid p.ej. tla ameda de Delba pro festil o che ten l guant. Y spo él n cheder che raprejenteia bonamenter l moment plu cruede tla vita dl artist, n Crist metú en crousc depent sun na breia de faesita touta da na baraca dl ciamp de conzentrament de Zwickau olache el fova gnú saré via dl 1944.
Giuseppe Soraperra ti à a poura nia dé truep a sia val de Fascia, nia demé desche artist, ma ence desche fondadour y diretour dl Istitut de Ert che porta encuei sie inom. Chesta esposizion dess ester n pice reconesciment da pert dl Istitut Cultural Ladin. Ala ne preten nia de ester completa, ma n moment per ne desmentié nia.
La esposizion é gnuda daurida ai 15 de dezember y romagnarà daverta enfin ai 14 de auril dl 2007 ti orars de daurida dl museum.
Dai 20 dezember 2006 al 6 de jené 2007: vigni dì da les 10.00 a les 12.30 y da les 15.00 a les 19.00 Dai 9 de jené ai 30 mei 2007: dal mertesc a la sabeda da les 15.00 a les 19.00 (sclut de domenia y de lunesc).
 

 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 3.66
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.364 seconc