L raport di ispetours engrandesc l fossel tl Consei de Segurté
L second raport prejenté enier (14.02.2003) dai mascims responsabli dles ispezions tl Irak, che é truep plu moderé y manco tl detai che l prum, à reafermé les desferenzies tl Consei de Segurté anter les pertes per y les pertes contra l'adoré la forza contra Bagdad. L cef di ispetours dl'ONU, Hans Blix, à afermé che fin a sen ne àn nia podù desmostré che l govern iraken despone d'ermes de desdruzion massiva. Al à amonì che te vigni caje pòn arjonje l dejarmament dl Irak te na maniera plu aslune, miour marcé y en pesc sce al é na cooperazion incondizioneda da pert dl rejim iraken. L responsabel svedeis à mesuré dassen sies paroles, cialan d'evité che al someie che al dae n vantaje a una dles does perts dla comunité internazionala despartida per chesta crisa.
En relazion a l'esposizion porteda dant al Consei de Segurté da pert dl secreter de stat di Stac Unis (USA), Colin Powell, en l'ultima edema per cialé de convence la comunité internazionala che les ressoluzions dl'ONU ne é nia vegnudes ademplides dal Irak, à Blix porté dant si dubes che les fotos prejentedes dal cef dla diplomazia di Stac Unis sie na desmostrazion clera de movimenc de materiai proibis. Al dij che al pò tamben ester che al se ae traté de trasporc de ermes convenzionales. L cef di ispetours à recordé che al é vegnù porté a termul 400 ispezions, zenza che an ae lascé alsavei dantpertfora zeche a les autorités irakenes. Con chesta afermazion à Blix contradit Powell che ova afermé dant en valgugn dis che l govern iraken conesciova avisa y dantfora i itinerars di ispetours y esperc de ermes.
