benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Relazion dl dr. Fabio Chiocchetti en gaujion dla enduneda generala
scrit ai 15 December 2006 da les 20:28:33 da noeles

Fascia

 

Mendranza linguistica, identité, unité ladina ... demé blot paroles dl passé?

Dr. Fabio Chiocchetti se damana ciugn che dess ester i obietifs tla ativité dl Istitut tl davegní - Relazion dl diretour dl Istitut Ladin Majon di Fascegn en gaujion dla enduneda generala

Al é presciapuech doi agn che i nes damanon, olache ala va la comunanza ladina, olache ala va la Val de Fascia, cie prospetives che i on tedant per l davegní. I temps é zenz’auter mudés da canche dut somiova tant cler y saurì: l’aisciuda ladina, l’ester “ladins”, schendí  pert dl Popul Ladin dles Dolomites, duc col medem lingaz; donca l dert a la “parité de tratament”, les revendicazions de na “mendranza linguistica” che volova vegní reconesciuda y stravardeda aldò dla costituzion, aldò dl statut de autonomia.

L diretour dr. Fabio Chiocchetti mostra su les gran les contradizions di ladins.



L dovier dl ICL fova cler desche l soredl: sostegní con l laour scientifich y cultural chest prozes de emanzipazion dla comunanza de Fascia, ti dè “dignité” y fondament a sies revendicazions, ti dè les massaries per renforzé sia identité, per svilupé sie idiom tl cheder de na planificazion linguistica unitara: “L ladin é n lingaz desferent dai autres, y l fascian (desche l gherd. bad. fod. amp.) é pert de chest lingaz”. Chest fova l “verbo”, dut bel trasparent y cler.
Chest é sté l prinzip che à vidé l percours fat dal ICL te 30 agn de ativité, sun les pedies de chi che l'à volù y à metù su: Remo Locatin, Danilo del Garber, ma ence Luigi Heilmann, don Mazzel, p. Frumenzio Ghetta, Guido Jori, Giacomin Jellici, Simonin Maza, y tanc de autres…
Sun chest program l Moviment ladin se à trat do bel plan la maioranza dla jent de Fascia che a la dí duta enfin di agn ’70 fova valgamia tiebia en cont de chest. Merit de jent desche l mai desmentié Ezio Anesi, merit de Bepe Detomas y dla UAL, che à sapù de trasformé chi ideai te “obietifs politics” y sun chisc otegnì l consens dla jent.
"I nes damanon sce l “verbo”: l ladin é n lingaz desferent dai autres, y l fascian é pert de chest lingaz, che per tanc de agn à arvenú l laour cultural (y ence chel politich) é ciamò atual"
I resultac de chest prozes eise duc tedant, tant sun l ciamp politich (olache Fascia à davagné a la gauja dles mendranzes enfinamai l Govern Provinzial, y da Trent podéssela avei n livel de autonomia y de reconesciment enfinamai maiour de chel che enlaouta podòven vedei dantfora), unfat tant sun l ciamp cultural: y i ne rejone nia demé de libres y de publicazions, i rejone de “bens” desche memoria storica, prestije, visibileté, strutures, jent profescionalmenter enjigneda, relazions internazionales: dut chel che fej “rica” na comunanza, ajache “richeza” ne é nia demé chela mesureda dal tacuin o dal Pil.
Ma sen nes damanonse sce dut chest à ciamò valuta, per nosta jent. I nes damanon sce l “verbo” che per tanc de agn à vidé l laour cultural (y ence chel politich) é ciamò atual, i nes damanon sce la comunanza de Fascia vuel ciamò jí inant sun chel medem troi, sce ala crei ciamò te chi obietifs, sce ala crei ciamò tl program scientifich-cultural dl’ICL, y ence te chel politich-cultural dl’Union di Ladins y dla Union Autonomista.
Aja che sce ala ne fossa nia plu enscí, sce per i fascians (o ence per i ladins), “mendranza linguistica, autonomia, lingaz, identité, unité”  fossa deventedes blot paroles dl passé, conzec veresc y datant scì y no da giustifiché valch privilegh o valch contribut spezial, enlaouta fóssel ben da mudé endrez.
I ne sé nia da dí sce i son bele ruvés tant inant, ma segnai de chest vers él sauté fora n mudl, tant te Fascia che a livel dolomitan, i ne cade nia repete chel che é bele vegnù dit autró. Fosc ajache l’ICL per sia medema natura é n pont dret zite (sensibel) de nosta strutura soziala (n “pont nevralgich”, o doious, sce i voleis), y belapontin chilò se àn entenù che zeche é defat mudé: al tira n’autra aria.
 
L 2006, l’ann numer 30 per l’ICL, se à daurì con la chestion de “Fasha” y al se sera su con n’autra chestion: i cosc’ dla scomenciadiva “Carnascèr”. Per l’amour dl ciel, polemiches él dagnora sté, y critiches ence, anzi: les critiches che ales vegne demé, an pò dagnora mioré y comedé, i ne pretenon danz nia de fé dut dret y de ne falé mai: dl rest, “chi che fej fala, y chi che ne fej nia ne fala nia”, vegnível dit da chi agn.
Cie che i messon y i volon capí, é la rejon fona de chest cert malester, de chest “vent de rebuf” che vegn do cà, n vent che tocia tant la politica che la cultura, dut entourn, nia demé l’ICL, ma che chilò tI istitut messonse y volonse entene, ajache dovier de na istituzion desche chesta é chel de entene y de desplié ence l prejent, nia demé l passé. 
 

Fabio Chiocchetti

 Comentar: convegnenza y verité
 Chiocchetti: I ti daré mia ousc a la Union Autonomista Ladina
 Comité interregional ladin - n comentar de Fabio Chiocchetti

Donca l lingaz, problem zentral per na mendranza, problem demeztroi debatù, tant che Sergio Salvi dijova, rejonan de mendranzes: “ne uccide più la grafia che non la spada”. Ence chilò te Fascia (tla Ladina) àn dagnora chestioné entourn la grafìa, nia da nuef, ma sen someia la discuscion endò ciapé pé, con na valenza dl dut nueva.
A cialé endretura, i contrasc’ sautés fora en cont de toponomastica con desferenc comuns à duc plu o manco la medema raisc: al é na reazion contra i tentatifs de unificazion ortografica, tl inom dl particolarism local, de val o de paisc. Do tanc de agn de laour y de batalies (ence sun l teren politich: per agn essa TN volù che l fascian vegne scrit “a la trentina”…), chest sona per l ladin-fascian desche na renunzia al status de “lingua”, na renunzia che ruva belavisa tl moment che chest lingaz vegn reconesciù tres lege y ofizialisé publicamenter sun mapes, tabeles y documenc. Cialede che a Trent se la rìei de gust, a vedei coche i son a una en cont de “lingaz”!...
Defat, a chesta vida, végnel metù en discuscion (o enfinamai desconesciù) dut l percours de normazion y de elaborazion fat te chisc ultims 12-15 agn. L bel él che sen chestes reazions vegn fora nia demé anter la jent (desche al é dagnora suzedù), ma da pert o te anter les aministrazions, donca a livel istituzional. Tres chest végnel delegitimé defat la istanza che (ence tres lege) à tout su l’enciaria dla normazion linguistica, l’Istitut Cultiral Ladin: duc sà nout coche an essa da scrive, al ne conta nia sce al é jent che ti studia soura da trent’agn, lascia demé che an i clame “i spezialisc”, n bel festide. Corious, noé? Degugn ne se enfidassa de contesté i “calcui statics” de n enjinier, o i resultac dl’analisa dl sanch fates tl laboratore dl ospedal, ma en cont de lingaz vignun sà nout. Ma sce duc sà nout, a cie ueghel pa l’Istitut? I podassan ence mudé mistier…


Corious ence che les contestazions vegn fora canche al se trata de inoms “ladins”: depierpul ne à degugn mai protesté contra les tofles che la provinzia enstessa à metù fora con “Torrente AVISIO” blot per talian, o con inoms scric cochemai, o mez y mez (“Zester”, “ponte de L’Infern”…) dejosservan la lege per la defendura dla toponomastica ladina, desrespetan  si medems regolamenc. Chest va dut ben, al ne me pèr nia che zachei sibe entervegnus en cont de chest, ence sce l problem é vegnù segnalé plu outes.
Da zeche ora fòvel ence vegnù fora chela de fé en referendum, sun coche an essa da scrive “Fascia”. Ie fajesse la proposta de fé n referendum ciamò plu radical: ie ti damanasse a la jent sce ala crei ciamò che “l ladin é n lingaz desferent dai autres, y che l fascian (desche l gherd. bad. fod. amp.) é pert de chest lingaz”, o sce ala l conscidreia desche n dialet.
I é l’imprescion che la jent te Fascia conscidreie encuei dassen sie idiom desche n dialet (che an pò scrive cochemai), plutost che “n lingaz” degn de vegnì codifiché y elaboré. Ma sce i fascians medems rata de rejoné n dialet, l fascian essa ben da vegnì traté desche i autres dialec: nia plu mendranza linguistica, nia plu stravardeda, y leges, y finanziamenc y dut cant l rest. L’ICL podessa ence saré su baraca, y ti zede l Museo al APT, o a valch “cooperativa de servisc” che fajessa de chest pre de San Jan n bel “Parch dles triparies”, tip Fassaland o Babylandia, con laite l Museo a usaje y consum di turisc’, con “vivanes, bregostanes, topolins, gnoms y folec” dut adum. Auter che “nueva agorà”, auter che luech de memoria y de identité dla comunanza ladina de Fascia!...
 
Y vegnon al Carnascè!
La descrizion menuda di resultac dla scomenciadiva é a la leta, con apede i dac sun cosc’ y finanziamenc, che almanco la discuscion se poie sun zeche de segur, nia desche sun zifres cochemai desche al é suzedù tla Radunanza dl Comprensore. Ma almanco na prezisazion é de dovei. Tres chesta scomenciadiva ne volova l’ICL nia “fé l brave” en ocajion di 30 agn: per chel éssel basté na bela Zeltfest, con mujiga folk, mangé y beive gratis per duc, y al essa fat na figura mostro. Al à depierpul volù ti sporje a la Val de Fascia na ocajion per se profilé desche pont de referiment per la cultura populara a livel ence internazional, per fé de Fascia n luech de confront anter popui y tradizions desferentes, per ti dé a la val n contribut de “cualité” ence per sia “imaja” turistica.
Él vegnù spenù de massa? Al pò ben ester. Él ruvé puecia jent? Fosc ben, ence sce 5262 vijitadours ne é nience puech, ma dessegur podòvel en ruvé deplù. I lascion dut ester: sun i ejic y resultac podonse ben descore soura die a la longia. Chilò bàstel reporté les paroles dl diretor dl’APT de Fascia, Andrea Weiss, canche te na intervista a la USC àl reconesciù: “I prums che ne à nia cherdù te chesta scomenciadiva é stés i fascians”.
Da enultima un n resultat onse abù dessegur, al é does respostes a nosc interogatifs: 1) i temps ne é nia madurs per valch da de tel; 2) enfin a canche San Jan ne deventa nia  zeche de auter, l cuer de na “comunanza viva”, l zenter “storich” de na val entiera, chliò da seira ne càdel nia (ne àn nia bria) fé ativités, no spetacui, no mostres de n cert livel.
L Program de ativité 2007 tegn cont de chisc fac che carateriseia encuei la sozieté ladina y fasciana. Al sarà n ann de paussa, ma souraldut n ann de reflescion, na reflescion che tociarà la natura dl Istitut Cultural Ladin, sia funzion y sie medem davegní.

 Letura dret aconsieda 

 Senteda generala dl Istitut Majon di Fascegn
 Publicazions nueves: biografia sun Tita Piaz
  Fascia: Convegn Survey Ladins
 Scomenciadiva endrezeda via dal Istitut Ladin de Fascia
 Enconteda anter ICL y raprejentanc istituzionai y politics
 L ombolt y la jonta de Vich volessa scrive Fasha empede Fascia
 Na seconda generazion de coretours ortografics open-source
 Radunanza Generala dl Istitut Cultural Ladin 2003
 Coretours y adatadours morfologics per scrive saurí ladin


 
Liams emparentés
· Deplú sun l tema Fascia
· Chier te noeles


L articul plu liet te chest tema Fascia:
Publicazions nueves: biografia sun Tita Piaz


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.375 seconc