benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Moena: Prejentazion dl CD
scrit ai 10 December 2006 da les 18:44:34 da noeles

Fascia

 

"Amer volesse"

Prejentazion dl CD nuef de Emilio Galante en sabeda, ai 16 de dezember, da les 5.00 domesdí a Moena con program de cornisc

Amer volesseCiun él pa l contribut che la mujiga pò ti sporje permez a la vitalité de n lingaz de mendranza? Pò pa sia forma de sperimentazion espressiva ester n strument per slarié les funzions dl lingaz y smaioré sie prestije? La resposta pòn troé tl CD nuef dl musizist y componist bologneis Emilio Galante "Amer volesse", dé fora dal Istitut Cultural Ladin de Vich, olache la mujiga contemporana y sperimentala se lieia adum con l lingaz ladin per l viventé y tl medem temp per vegnì enstessa frutificheda dal lingaz.


La idea per la opera nasc dal spetacul realisé tl 2005 tl cheder dles manifestazions en gaujion de "Les nuetes di Museums" tl Museo Ladin de Fascia. La creativité musicala peia via rodunt dal lingaz ladin y da si sons che se formeia tres i tesć dles conties y dles poejies, ispiran con efec desfalifs les composizions.
L CD tol ite les composizions "La tousa sun l ciar dal fen" comiscioneda dal Festival de mujiga contemporana de Bulsan y "Les stries dl Latemar"  che nasc da does conties ritedes (arpedes) da les oujes de does vedles contastories fascianes che souraviv dutaorela tl archif sonour dl Istitut Cultural Ladin. Ales é vegnudes toutes desche linies melodiches sun cheles che al se formeia les composizions.
"Amer volesse" é na regoiuda de cianties ("Lieder") per sopran, fabló (flaut) y chitara y é ispiredes dai tesć de amour dl poet y pitour Claus Soraperra, testemonesc de n lingaz ladin vif y atual, y acompagnedes da chedres dl artist, reprodujus tl libret enjonté. L’ultim toch dl CD é "Aa-gar", nasciù da la contia dl scritour Mauro Neri y metù ju per ladin dai scolés dla scola populara de Moena che à tamben realisé i dessegns grafics che acompagneia l test. Te chest toch él la mujiga per fabló y eletronica che fej demé da comentar cherian l’ambient sonour per les scenes portedes dant da la ousc che conta.
L CD "Amer volesse" fova bele protagonist de n prum event a Trent tla cornisc dla "Sala delle Marangonerie" tl Ciastel dl Buonconsiglio con n conzert  tl program dl Festival "Sonata Islands". Sen  vegniràl prejenté te n pice conzert a Moena te "La Baita" en sabeda ai 16 de dezember da les 5.00 domesdí. Al event tolarà pert l componist Emilio Galante acompagné da Walter Zanetti a la chitara y l’autour dles liriches y di chedres Claus Sorapera. Do la prejentazion da les 9.00 da seira saràl n moment de mujiga con na Jam Session realiseda en colaborazion con la assoziazion de Cultura y de mujiga "La Grenz". (eb)
 
 
 
"Amer volesse"
Prejentazion del CD de Emilio Galante
en Sabeda ai 16 de dezember 2006
c/o La Baita
str. Sas Lonch 22, Moena
 
Program:
 
da les 17.00: Prejentazion dl CD y pice conzert
Emilio Galante (fabló y eletronica)
Walter Zanetti (chitara y chitara eletrica)
 
con la partezipazion de
Claus Sorapera de la Zoch
 
da les 18.30: aperitif y buffet
 
da les 21.30: Jam Session

 
Liams emparentés
· Deplú sun l tema Fascia
· Chier te noeles


L articul plu liet te chest tema Fascia:
Publicazions nueves: biografia sun Tita Piaz


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.442 seconc