benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Publicazion nueves: Ustories de Frida Piazza
scrit ai 10 December 2006 da les 10:41:46 da noeles

Gherdeina

 

Les "ustories" de Frida Piazza y sie mond dles paroles

"vivudes, cuedes fora o madurides sun bandafurnel" - Liber dé fora da Ingrid Runggaldier y publiché dal editour Raetia

Frida Piazza y Ingrid RunggaldierAi prums de dezember 2006 él vegnù prejenté a Urtijei al publich n liber nuef de Frida Piazza dal titul "Ustories" dé fora da Ingrid Runggaldier tres les Edizions Raetia. Ela à tamben metù adum n film soura la autoura. La idea de dé fora chest liber de stories é propi madurida entratant les enrescides per l film, conescian plu davejin anda Frida. Frida Piazza é a poura nia n personaje y na autorité per cie che reverda chestions linguistiches te Gherdeina. Ala é conesciuda per si trueps agn de enrescida  dl idiom gherdeina. Ala à dé fora deplù libri y à abiné adum milesc y milesc de paroles vedles y nueves te n sie dizionar. Sies enrescides féjela a ciasa sun sie computer. Ala ne à endere nia volù azeté les regoles dla grafia ofiziala, n fat per chel che an l'à astileda fora agn a la longia. Anda Frida Piazza y Ingrid Runggaldier.



 

 

 

Frida Piazza - Ustories de vivudes, cuedes fora o madurides sun bandafurnelL liber contegn entourn 20 conties. Te sies stories ti sofla ite la scritoura flé y vita al passé y al prejent, al real y a la fantasia. Sies figures é conesciudes o inventedes, ales se muev y rejona emperjonedes te sie pice mond, te chel che ales  fej sentì pert , p.ej. coche l paur sun sie luech o la vedova sajoneda te sie se raté daverta y moderna per i viadesc che ala fej, y entant chi che ala ne é nia bona de spié deplù che ala ne vedessa stajan a ciasa o jan sun plaza, o chel pere maridé da puech, che essa dut l davegnì davert, ma che stenta a se desgatié dai pici y gran festidesc. Entravegnudes de de vigni sort, contedes datrai coche les ciacoles te n luech olache duc conesc duc, y stories fora dla vita da vigni di, te cheles che al se refleteia y se entreceia la gran dejouta dl mond. Y sceben che ales é contedes con ert, pensedes y metudes adum a puntin con material linguistich sovenz nuef o nia conesciù o dinrer doré y audì, él stories contedes con na naturaleza y espressivité che les fej reduje (somié) a les "conties contedes" a ousc tl rejoné da vigni di deventan n ejempl dla tradizion orala ladina.

L liber pòn retré tla Cesa di Ladins a Urtijei o ence diretamenter pro l editour Raetia.

 

Nota biografica Frida Piazza

Frida Piazza é nasciuda ai 30 de jené dl 1922 a Urtijei coche chindejeisema de 18 nascius tla familia de anda Franziska Kostner da Stlujuc y de bera Zenz Prinoth da Brida. La seconda vera àla passé te n ospedal a Karlsruhe sciche secodienta de sala operatora con ejam statal. Do la vera àla emparé a ziplé tla scola d’ert a Urtijei pro Luis Piazza (1908-1977) che é plu tert deventé sie om. Do y do él nasciù i mutons Roswitha, Leander, Costanza y Fidelio. Frida à per trueps agn ziplé te berstot pro Luis. Ma bele abonora àla scomencé da se enteressé dla rejoneda ladina y da la enfruscé fora. Chisc studes ne ti à nia plu lascé gheneda y é deventés per ela l empegn de majera emportanza te sia vita. Sie di de laour scomencia dagnora con n druch dl pom che fej pié via l computer. Frida Piazza é steda una dla prumes te Gherdeina che à reconesciù la emportanza de nosta rejoneda. Dlongia sie laour linguistich àla metù ju tl gherdeina lirica y prosa dla leteratura mondiala y à publiché de plu operes sagistiches y leterares. Anter chestes él da recordé dantaldut l roman L Nost, publiché tl 1988. Tl 1997 ti à l'Université de Dispruch sourandé na onoranza de reconesciment per si meric tl laour de enfrusceda y tueda dla rejoneda ladina. La archirida de paroles de sia rejoneda dla oma per les salvé da la desmentianza y dal arbandon é un de si majeri festidesc. Paroles, frases, desinenzes, prefisc, morfems: chest é l material dl laour de Frida. Al é n laour de compilazion: abiné adum cie che jissa zenza perdù per for. Ma ence n laour de produzion, n laour creatif: se nuzé dl material linguistich che é da garat per l adaté a debujegns nuefs, crié paroles nueves per conzec nuefs con chel che nosta rejoneda à da pité: y ala à da pité truep sce n sà da jì a chirì. Sies truepiscimes traduzions da d'autres rejonedes y sies composizions leterares é nasciudes per prové fora, de mete per scrit, de mete tla pratica les paroles abinedes adum. Frida Piazza à scrit tamben enrescides sun argomenc de botanica, de astronomia y ensci inant y samben y dantaldut produzions leterares: poejies, stories, conties y aforisms. Chest mond de paroles é l mond de Frida Piazza, n mond che ne va nia da despartì da sia vita ajache al é sia vita.

 
Liams emparentés
· Deplú sun l tema Gherdeina
· Chier te noeles


L articul plu liet te chest tema Gherdeina:
Na festa per n fin de ben


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.386 seconc