benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Radio y tv ladina
scrit ai 05 December 2006 da les 11:15:30 da noeles

Cultura

 

Tres l medem juech

Durni se enteresseia mindicé, ma cie che al giata ne sàl nience el - La obfrau Bioc-Gasser vuel se fé propaganda empera

COMENTAR: temps biblics

Ester él dagnora sté na galia con les trasmiscions tl radio y tla tv ladina per cie che reverda la convenzion con la RAI. 
Ti Grijons ti ésen jus permez al ampliament dles trasmiscions dl radio y dla televijion con n projet concret, te Sudtirol ti vàn permez con n scempl comunicat de propaganda dla obfrau Paola Bioc-Gasser per todesch. Bele da sie contegnù general y superfizial veiden che al é puecia convinzion viadedò. Sciche dl 2002 végnel endò fat empermetudes de ampliament dles trasmiscions radio y tv ladins. Ma fac concrec ne él suzedù enfin a encuei nia.



Ala à duré dal 1979 al 1988 enfin a che an à abù les prumes trasmiscions tv ladines, dantaldut per merit dla insistenza dla Generela. Dal 1988 inant ne él suzedù plu feter nia, auter che tres endò empromiscions de ampliament. Al é passé 18 agn, empede n aument concret tres endò comunicac, p.ej. chest dl 2002: "Na bona notizia ciamò frescia é l'empermetuda dl aument dles trasmiscions ladines dla RAI. Dedò che l'assessour Mussner s'à prové de arjonje l'aument dles trasmiscions ladines dla RAI, à ence l president dla provinzia Luis Durnwalder porté dant la chestion pro i responsabli a Roma." A la fin dl 2006 endò n comunicat dla obfrau SVP Bioc-Gasser che ti someia, n comunicat fotocopia che an tira fora vigni doi-trei agn. Cie che an ne veid endere iniò é na ghiranza concreta: tant de temp de aument pa, con cie mesums y personal déssel pa vegnì realisé y da cie ores de trasmiscion pa? An ne sà nia cie basa de tratatives che al é con la RAI a Roma o sce al  en n'é deguna y an tol demé la ocajion de dè fora n comunicat per rejons de propaganda. Al é saurì da capì che la RAI enstessa ne se fej nia promotoura. Zenzauter pòn rejoné de temps oramai biblics tla chestion de radio y tv ladins.

An ova bele enlaouta messù aspeté dal 1978 al 1988, 10 agn a la longia, per vedei les prumes trasmiscions tla televijon. L juech é tres l medem: an aspeta i momenc dles lites per giaté valch picera empermetuda y an ne damana y ne ghira nia unis per arjonje valch de sostanzial. Durnwalder se interesseia mindicé: al giata valch empermetudes, lascia scrive valch comunicat - chest iade a la Bioc - ma cie che al giata y cotant ne sàl nience el. La chestion podessa poester garaté miec, sce an essa n bon iade la legitimazion dl comité interladin, dla Lia di comuns, che ti dess de chest vers l sostegn a Durnwalder a na moda che la cossa ne fossa nia demé a livel de partì, ma a chel interprovinzial y cultural-linguistich. Che la aprovazion dl statut dla Lia di comuns va inant en prescia y al pèr demé desche formalité zenza mudazions, spo vegniràl tost aprové ence da les trei provinzies defata. La Lia di comuns podessa dé na sburla, poester sia pruma proposta de suzes.


Dut autramenter la chestion ti Grijons. Radio rumanc se damana de podei trasmete 24 ores al dì. I dis passés él vegnù enjonté autres 4 ores al dí, n iade demé a titul sperimental, ma dai 16 de jené inant dess les trasmiscions vegní regolarisedes. Per la maiour pert se tràtel de mujiga da meteman da les 5 dadoman enfin a les 6, canche an pò audí les prumes noeles. Autres 3 ores vegn metudes pro da seira. Chestes 3 ores, da les 20.00 a les 23.00, dess dantaldut arjonje i mutons y i joegn con mujiga y informazions aladò. Ence i rumanc dess podei ester informés te sie lingaz almanco enfin a les 23.00. Ma l fin é chel de ruvé a 24 ores al dí. Tost vegniràl metù pro na autra ora de mujiga enfina mesa nuet.
 

Liams y desçiaries
Plata dla RTR

An se damana de podei dé tres ence noeles entratant chesta ultima ora. La informazion, végnel dit, é pu n dovei fondamental dl servisc publich y perchel preténen che les informazions vegne dedes tres te vigni moment, almanco tles ores de trasmiscions. L slariament dles trasmiscions vegn realisé con deplù personal, provan de sparagné de n auter vers y con i contribuc suplementars che vegn diretamenter da Berna. An é tl enjigné ca i inoms nuefs da ti dé a les trasmiscions per tré joegn y mutons. N auter fatour che an tegnirà en consciderazion é chel dé tres mujiga locala. Te si 30 agn de trasmiscion àn fat n grumon de trasmiscions enfin a ruvé a n archif de 5000-7000 titui, perchel él dessegur registrazions assé da dé tres ence per valorisé i ciantautours rumanc y i cors. An à zenzauter duc i mesi per mete adum n program de mujiga che vegne aprijé y che ae ence n colour local. Ajache an vuel dantaldut arjonje i joegn él cler che an provarà de porté ite plu che al é meso l lingaz standard.
 Dal 2007 inant adoraràn ence tres deplù l standard a ousc tles trasmiscions revardentes les novités redazionales, metan averda che chest lingaz ne vae nia a dann dla spontanité, ti lascian samben la liberté de doré a ousc ai intervistés si respetifs idioms. (jp)

Ladin Standard

 Bele dl 2002 rejonòven de n ampliament: la Convenziun nöia RAI-Stat


 


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 6


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.379 seconc