Te chesta ocajion ne vegniràl nia demé fat n bilanz de n ann de laour rich de evenc, ma la Radunanza podarà tamben ester n moment de confront con i aministradours y i operadours culturai y economics dla val per rejoné deberieda dles endesfides y dles dificoltés che an se troa tedant encuei tl mené inant scomenciadives de defendura y de promozion dla identité ladina y tl laour che vegn fat per renové tla comunanza la coscienza y l spirit de partegnuda.

Tla radunanza vegniràl prejenté les ultimes publicazions dedes fora dal Istitut Cultural Ladin, anter l’auter n moment spezial ti vegnirà dediché a la contia per joenec “Chi él che à tema del varvarel?”, terz titul dla seria “L Dragonzel” realiseda en coedizion con l’Union di Ladins de Fascia. A la prejentazion tolarà pert l’autoura Beatrice Masini, che dantmesdì encontarà i tosec de n valgunes classes dles scoles de Fascia, y l grup musical “I Skaré” che viventarà la Radunanza con sia mujiga.

Per finì via la giorneda endreza via l’ICL adum a la Union di Ladins na festa musicala per joegn y tosec dles scolaes autes, viventeda endodanuef dal grup “I Skaré”. Te chela ocajion ti vegniràl partì fora a duc chi che tolarà pert desche scincunda na copia dla gustoula contia de Beatrice Masini, traslateda tl fascian da Lucia Gross.

La Radunanza Generala dl Istitut Cultural Ladin “majon di fascegn” vegn tegnuda en juebia ai 7 de dezember da les 5.00 domesdì tla Sala Grana dl’Istitut a Sen Jan; an jirà inant da seira con la festa dedicheda ai tosec y ai joegn de Fascia “I Skaré en Conzert” che scomenciarà da les 8.30 da seira, tres tla Sala Grana dl Istitut a Sen Jan.